بو كز موللانصرالدينين شالواري!
بو كز موللانصرالدينين شالواري!
دوكتور جئري
موللانصرالدين ايله آروادي مجليسين قاباغيندان گئچركن گؤردولر ميللت وكيل‌لري بيربيرلري ايله ياخالاشيب قيزغين-قيزغين دارتيشيرلار. موللا، "قوي گئديم گؤروم نه خبردي؟" دئينجه آروادي ال-آياغا دوشوب يالوارماغا باشلادي:
- نولور گئتمه... قاداني آليم گئتمه...
موللا چاش- باش اولوب بونون ندنيني سوروشدو.
آروادين اوره‌گي چيرپينا-چيرپينا:
- او سويوق گئجه يادينداديرمي؟-دئدي.
موللا قاشلاريني چاتاراق:
-هانسي سويوق گئجه؟-دئدي.
- كوچه‌‌دن چيغير-باغير، داوا سسي گليردي.
موللا:
- هه..
آرواد:
- يادينداديرمي يورغاني چينينه آتيب،"قوي گئديم گؤروم نه خبردي" دئيه‌رك ائشيگه چيخدين؟
-هه..
-يادينداديرمي ائوه قاييداندا يورغان چينينده دئييلدي ؟
-هه..هه...
يادينداديرمي، "موللا داوا نه‌يين اوستونده ايدي سوروشدوغومودا نه دئدين؟
-هه..هه...هه.. "داوا موللانصرالدينين يورغاني‌نين اوستونده ايدي. يورغان اوغورلاندي..داوا ياتدي" دئديم...
آرواد يئنه يالوار-ياخارماغا باشلادي.
- بونلار يادينداديرسا، باشينا دولانيم گئتمه.
موللا آروادي‌نين سؤزلريندن باش تاپماميشجاسينا:
- نه دخلي وار؟!- دئدي.
آرواد گؤزلري‌نين ياشيني آخيداراق:
تاريخ : پنجشنبه 2 آبان 1392 | یازار : دوكتور جئري
نئجه شاخسئي ووردوم؟
نئجه شاخسئي ووردوم؟
دوكتور جئري
عاشورا گونو ياخينلاشديقجا يانغيم ايمام حسين(ع) يولوندا شهيد اولماغا گئت-گئده آرتيردي. گئجه‌لري مسجيدده كربلا فاجيعه‌سيندن، ايمام حسينين باشي‌نين كسيلمه‌سيندن، اهل-عيالي‌نين اسير-يئسير دوشمه‌سيندن دانيشيلاناندا بوغازيم تيخيلر، آرزولاييرديم؛ كئشگه ايمامين زامانيندا اولوب اوغروندا ساواشاراق شهيد اولايديم. ائويميزين آمباريندا قينيدا پاسلانميش اسكي بير قيلينج وار ايدي. اوزونلوغو آز قالا منيم بويومجا ايدي. قيلينجي اوستا رحيم دميرچي‌يه گؤتوروب سورتوب ايتيتمه‌سيني ايسته‌ديم. اوستا رحيم بير منه بير قيلينجا باخينجا يالاندان:
- آغابگيم بونلا باش ووراجاق- دئديم.
آخشام اوستو قيلنجي دميرچيدن آلديغيمدا گؤزلريمه اينانا بيلمه‌ديم. قلينج پار-پار پاريلداييردي، ميلچگي گؤيده ايكي‌يه بؤله بيلردي!
ائرته‌سي گوندن، آغ خلعتدن تيكيلي عربي دؤنومو گئييب حيطده شاخسئي-واخسئي مشقي ائده‌رك اؤزومو عاشور گونونه حاضيرلاييرديم. هردن سس-كويومه آنام پنجره‌دن بويلانيب:
- قوي يئره او قيلينجي؛ قول-قيچيني كسه‌جكسن!-دئييردي.
منده بير آن دوروقسانيب:
- آنا دويونجا باخ منه!...عاشورا گونو ايمامين اؤجونو (اينتيقاميني) كافيرلردن آليب اؤزومو شهيد ائده‌جه‌يم!-دئييردم.
آنام يايليغي‌نين اوجو ايله گؤزلري‌نين ياشيني سيليب:
- اوغلوم، سنه هله اوشاقسان...-دئيينجه من قيلينجي گؤيده فيرلاديب باشيما چالار كيمي ائده‌رك شاخسئي-واخسئي دئييب سؤزونو كسيرديم.
سونوندا عاشورا گونو گليب چاتدي. سحر شافاقدان يئريمدن قالخديم. آغ پالتاريمي گئيديم. دستماز آليب ايكي ركعت شهادت نامازي قيلديم. قيلينجي گؤتوروب ائشيگه چيخماق ايسته‌ديگيمده آنام نيگران-نيگران مني سوزه‌رك آغا بگيمين قولاغينا نمنه‌لر پيچيلدادي. آغا بگيم گليب قيلينجي اليمدن آلدي. دولوخسانديم؛ آز قالا آغلاياجاقديم.
- آغابگ نه قاييريرسان من اونلا باشيمي ياراجاغام-دئديم.
آغابگيم سرت-سرت:
- بو قيلينج ايله باباميزين باباسي‌نين باباسي آذربايجان-روس ساواشيندا چوخلو ساييدا سالدات اؤلدورموش. بو قيلينج عنتيقه‌دير؛ قورخورام دسته‌ده اوغورلاسينلار!-دئدي.
- گؤزلريمين ياشيني ساخلايا بيلمه‌ديم.
- بس من نه ايله باش ووراجاغام؟-دئديم.
آغابگيم قولومدان ياپيشيب ائشيگه چكه‌رك يوموشاقجا:
- نيگران اولما، باشدا ووراجاقسان- دئدي.
كوچه‌ده قيامت ايدي. گؤز-گؤزو گؤرموردو. گؤيه ساورولان سامان ايدي گؤزه دولان كول. شاخسئي-واخسئي سسي اوره‌كلري تيتره‌‌ديردي.قيلينجلار شاهلانيب سالينيردي. قان قوخوسو، تر قوخوسو آدامين بورنونو گيجيشديريردي.
آغابگيم مني دسته باشي كربلايي سئيف‌الله‌نين يانينا گؤتوروب:
- كبلايي بيزيم بو قارداشين باشيني چيرت-دئدي.
كربلايي سئيف‌الله گؤزونون قيراغي ايله منه باخدي. مندن قاباق سيرادا قونشوموز موسلوم آغانين اوغلو، محمد دايانميشدي. كربلايي سئيف‌الله، "يا حسين" دئييب قمه‌ني محمدين باشينا چكدي. سانكي خوروز باشي كسميشديلر؛ قان گؤيه فيشقيردي. كول باسديلار. محمد باييلدي.قولتوغونا گيريب اورتاليقدان گؤتوردولر. كربلايي سئيف‌الله يئنه "يا حسين" دئيب باغيردي. او نئجه ده دوشومده(خياليمدا) اويدوردوغوم شيمره اوخشاييردي. ايشده سيرا منه گلميشدي. كربلايي سئيف‌الله قمه‌ني قالديريب باشيما ياخينلاشديرينجا اليمي قاباغا آتيب وار گوجومله قيشقيرديم:
- پوخ يئميشم وورما!
بنزر يازيلار:
تاريخ : چهارشنبه 15 آبان 1392 | یازار : دوكتور جئري
دامازليق
دامازليق
دوكتور جئري
- زير..زير..
اؤزومو او يولا ووروب سايماديم. يئنه "زير...زير.."سسي آرخامدان گلينجه دؤنوب اؤفكه ايله سسلنديم:
- يولونا شاتير اوزاتماميشام كي؛ گل گئچده!...
مينيك ياناشيب داياندي. شوشه‌سي لام-لام آشاغي ائندي. فرمانين آرخاسيندا قارا گؤزلوكلو بيريسي اگلشميشدي. هوروت-هوروت باخديغيمي گؤرونجه گؤزلوگونو گؤتوردو.
جوشقولانديم:
- اده آبيل سنسن؟...
- گل اوسته- دئدي .
عابدوللاه بيزيم اسكي قونشوموز ايدي؛بيرگه بويا باش چاتيب بيرگه اوخولا گئتميشديك. آتاسي بازاردا يوك داشيياردي. گونلرين بير گونونده، آغير بير يوكون آلتيندا قاليب سوموكلري اوولموشدو؛ وام يوكو!..بانك طرفيندن ائولري حرراجا قويولوب ساتيلاندان سونرا داها عابدوللاهي گؤرمه‌ميشديم؛ گره‌ك اون-اون‌ايكي ايل اولاردي.
- ........
"هه.. !" دئييب اؤزومه گلديم. عابدوللاه سورغوسونو يئنه‌له‌دي:
- دئييرم نه قاييريرسان؟..
"هئچ" دئديم. "اله‌ييب، اله‌ييب كپگينه قاتيرام".
گولدو بركدن.
- آبيل دوغوشدان سن نه قاييرسان؟ بو دم-دستگاه ندير؟ اولمايا خزينه (گؤمولو) تاپميشسان؟!...
يئنه گولدو؛ قيزيل ساعاتينا باخاراق:
- ناهار اوستودور؛ بو ياخينلاردا بير رستوران وار؛ گئدك ناهاري يئيك سونرا تعريف‌له‌يه‌رم-دئدي.
كؤنلونو قيرماييب،"اولسون" دئديم.
ماشيني كيمي، آديني تانيماديغيم يئمگي يئديكدن سونرا عابدوللاه سؤزه باشلادي.
- حاجي قولونو تانييردين؟- دئيه سوروشدو.
- هانسي حاجي قولو؟ -دئديم.
- حاجي قولو اصناف! بازار آغزيندا حوجره‌سي وار ايدي.
- هه..هه تانييرديم. آللاه رحمت ائله‌سين مچيد-مونبر آدامي ايدي.
- هه! آللاه اونا غني-غني رحمت ائله‌سين او اولماسايدي ايندي منده سنين كيمي اله‌ييب، اله‌ييب گپگينه قاتيرديم.
عابدوللاه يئرينده ديكله‌نيب سؤزونون آرديني توتدو:
- تزه عسكرليكدن گلميشديم. سحر تئزدن ائودن چيخيب آخشام الي بوش ائوه قاييديرديم. يئريم ايشسيزلرين پاتوغو اولان بازار آغزي ايدي. بير گون حاجي قولو مني حوجره‌سينه چاغيردي. "سن رحمتليك مشه محرم هامبالين اوغلو دئييلسن؟" دئيه سوروشدو مندن. "نييه اؤزويم!"دئديم. بير چاي قاباغيما قويوب:
- آتان چوخ زحمتيميزي چكميشدي...ياخشي آدام ايدي..آللاه اونا رحمت ائله‌سين-دئدي. -ايندي نه ايش گؤرورسن اوغلوم؟
سئوينديم ؛ اوره‌گيمدن"حتمن حوجره‌سينده منه بير ايش وئره‌جكدير" گئچدي.
- ايشسيزم؛ ايش آختاريرام حاجي- دئديم.
حاجي قولو ساققاليني تومارلايا-تومارلايا:
- ايش باشلاماق اوچون الينده سرمايه‌ن واردير؟-دئيه سوروشدو.
- وار يوخ اوتوز مين تومنيم وار ، بونونلاداكي بير ايش گؤرمك اولماز حاجي! دئييب سئوينجك دوشونجه‌يه دالديم: حتمن حاجي قولو ايسته‌يير پول-مول ايختياريمدا قويسون!
حاجي قولو گولومسه‌دي:
- ايستهييرسن يوخسوللوغون داشيني بير يوللوق آتيب وارلاناسان؟!
سئوينجدن قاناد چيخارداجاقديم.
- حاجي بو نه سؤزدور، البته ايسته‌ييرم ..كور آللاهدان نه ايستر ايكي گؤز؛ بير اگري، بير دوز.
حاجي قولو اليني اليم اوستونه قوياراق آتاجاسينا :
- اوغلوم وارلانمانين سيريني سنه اؤيرجگم آنجاق اؤز آراميزدا قالسين...
(باشيمي ترپتمكله حاجيني آرخايين ائله‌ديم)
اوغلوم ايستهييرسن وارلاناسان گره‌ك سرمايه‌‌‌‌‌وين اوچدن بيري حارام مالدان اولسون- دئدي. سونرا آياغا قالخيب مني يولا سالا-سالا آرتيردي:
- ايندي اوغلوم قورخما! گئت بير ايشين اوجوندان توت، آللاه پوشتو-پناهين اولسون!
ماراقدان سؤزونو كسديم.
- سن نئيله‌دين؟...
عابدوللاه بيج-بيج گولدو:
- منده سرمايه‌مين دامازليغي آز اولماسين دئيه اوچدن بير يئرينه ياري-ياري حارام مال قاتديم.
داها بتر ماراقلانديم.
- سونرا نه اولدو؟
- نه اولاجاق؟ گؤرمورسن؟ ماليم گونو گوندن آشيب داشدي. ايندي اونلارجا حيط، ماشين، توكانيم واردير...
بيردن گؤزلريمين اؤنونده، شهريميزين وارلي-كارلي‌لاري سيرالاندي... گؤره‌سن بونلارين سرمايه‌لري‌نين دامازليغي نئچه‌دن نئچه‌‌ايدي؟...
اوره‌گيم بولاندي. آديني تانيماديغيم يئمك‌دن اولمالي‌ايدي. جلد عابدوللاه ايله ساغ‌اوللاشيب ائشيگه قاچديم. چتينليكله اؤزومو رستورانين قاباغينداكي قانووا (آرخا) چاتديرا بيلديم.
تاريخ : جمعه 1 آذر 1392 | یازار : دوكتور جئري
ناموسلو كارمند
ناموسلو كارمند
دوكتور جئري
قَرا بُلِتِغْ ييلْ اَجارْ
اُرُنْجْ بِلا ايلْ اَجارْ (1)
ديوان لغات الترك
ايشيم اگري‌بوروق ايداره‌سينده دويونه دوشوب آچيلميردي. دؤرد آي ايدي بير ايمضا اوچون "بوگون گئت، صاباح گل" ائتمكده ايديم. احوالاتي اوستاد دفتري‌يه دانيشديم. گولدو:
- بو گل-گئتده نئچه جوت باشماق ييرتيبسان؟
- اوچ جوت!..
- اوچ جوتدن ايكي جوتونون پولونو رئيسه قيسديرسايدين ايشين ايندي‌يه‌دك يولونا دوشموشدو.
سؤزوندن شاشيرديم:
- ياني سيز دئييرسيز روشوه وئره ايديم؟
- بونا روشوه دئمزلر. حاققي ناحاق ائله‌مك اوچون پول وئرسن روشوه‌‌دير. سنكي حقّي ناحقّ ائله‌مك ايسته‌ميرسن؟!...
باشيملا "يوخ" دئيه‌رك سوروشدوم:
- بس بو نه پولو دور؟!
- بونا ايشي توْوا مينديرمه پولو دئيرلر!
.....
سونوندا اوستاد دفتري مني قانديرميشدي. آخشام قارانليغيندان يارارلاناراق رئيسه توْولاما پولو قيسديرماق اوچون جامع مسجيدي‌نين قاباغيندا گؤزله‌ييرديم. رئيس مسجيددن چيخيب ماشينينا مينمك ايسته‌ينده بيله‌سينه توش گلميشجه‌سينه ياخينلاشاراق:
- اوووه... جناب رئيس ..خوش گؤردوك سيزي! - دئديم.
رئيس بير آلتدان- بير اوستدن منه باخاراق:
- گئنه سيزسيز؟!- دئدي.
ال-آياغا دوشوب پرونده‌ني قاباغينا آچاراق،" قوربان مني دولاندير اوشاقلارين باشينا بونا بير ايمضا آت..." دئديم؛ پروندهنين آراسينا بير اللي مين‌ليك قويموشدوم.
رئيس قاشلاريني چاتدي؛
- بو نه‌دير؟!...
- قوربان بو توْوا مينديرمه پولو دور؛ لوطفن قبول ائله‌يين ـ دئيه يانيت وئرديم.
رئيس سرت-سرت:
- آغا.. من ناموسلو بير كارمندم.. روشوه آلمارام...-دئدي.
اؤز-اؤزومه، "ائوين ييخيلسين اوستاد دفتري گؤر مني نه ايشه قويدون، ائويم ييخليدي؛ بدبخت اولدوم.." دئييب تئز اوستادين تاپشيريغي‌نين ايكينجي آشاماسينا گئچديم. جيبيمدن بير آيري اللي مين‌ليك چيخارديب پروندهنين آراسينا قويودوم.
- قوررربان....من اؤلوم‌م!...
رئيس:
- دئديم كي؛ من ناموسلو بير ...
بير آيري اللي مين‌ليك چيخارتديم؛
- سني بالالاري‌نين جاني..
- من ناموسلو....
سون اللي مين‌ليگيم ايدي..
- من نامو....
دولوخسانديم؛
- قوربان وار-يوخوم بودور نييه آلميرسيز؟!
رئيس سينيرلندي؛
- سيز ايجازه وئرميرسيز من سؤزومو قورتاريم آغا!!.
- بويورون..
- من ناموسولو بير كارمندم روشوه آلمارام، قوْي جيبيمه!
اتك يازيلار:
(1) قارا بولودو يئل آچار، دويونو روشوه آچار.
آشاما: مرحله
اورونچ: روشوه
ايل: دويون، ايلمك
تاپشيريق: تكليف
توش گلمك: راست گلمك
توْوا مينديرمك: سورعته مينديرمك، تسريع
دولوخسانماق: آغلاماق اوزره اولماق، بغض ائله‌مك
سرت: ايتي، زهميلي
سينيرلنمك: عصباني اولماق
شاشيرماق: تعجب ائله‌مك
قيسديرماق: اوْوجونا باسماق
يانيت: جاواب
تاريخ : دوشنبه 11 آذر 1392 | یازار : دوكتور جئري
كندينيزي تئلويزيوندان گؤرمك ايسته‌ييرسينيز مي؟!
كندينيزي تئلويزيوندان گؤرمك ايسته‌ييرسينيز مي؟!
دوكتور جئري
"ساري‌داش" بير كنددير آذربايجاندا، خوراساندا، همداندا و ....
"ساري‌داش"ليلارين كئفي‌نين اوستونه كئف يوخ ايدي. كندين وئريملي تورپاغي، بوللو سويو، ايليق هاواسي اوزوندن وار-دؤولتلري آشيب داشماقدا ايدي. "ساري‌داش"ليلارين هئچ غملري يوخويدو دئسك، يالان سؤيله‌ميشيك. اونلارين دونيادا بيرجه غملري وار ايدي؛ بو غم چوخدان ايدي اوركلرينده دويونچكله‌نيب يئر ائله‌ميشدي. قيش گئجه‌لري، آغ ساققاللار كندين قهوه‌خاناسيندا اوتوروب چايلاشيب، چوبوقلاشيب هر ياندان دانيشاندا سونوندا سؤزو-صؤحبتي بو درده، بو دويونچگه چكرديلر...
بير گون يئنه قهوه‌خانادا سؤز درددن، دويونچكدن دوشموشدو. كنده قوناق گلميش "قارا داش"لي حاجي بايرام چاشقينليقلا كندين آغ ساققالي مشه‌اسلاندان سوروشدو:
- سيز نه‌دن دانيشيرسيز من هئچ باشا دوشمورم؟!
مشه اسلان قلياني‌نين چوبوغونو سوموروب توستوسونو بوروق-بوروق پوفله‌يه‌رك دئدي:
- بو ماحالين كندلري اوزوك اولسا بيزيم "ساري‌داش" اونون قاشي‌دير آنجاق بونا باخماياراق ايندي‌يه‌دك بيزيم كندين آدي-سوراغي بير كره بئله اولسون راديو-تلويزيوندان ياييلماييب...
حاجي بايرام بونو ائشيده‌لي اليني دومبك قارنينا قويوب بركدن گولمگه باشلادي:
-هاه..هاه.هاه‌ه.. سيزين درديز ائله بو ايدي؟!...
مشه اسلان باشيني ترپه‌ده‌رك اونايلادي.
- سيزين درديز داواسي منده دير.-دئدي حاجي بايرام.
هامي يئرينده ديكه‌لدي. مشه بايرام جوشقو ايله:
- او نه‌دير؟- دئيه سوروشدو.
حاجي بايرام يئنه قاققيلدادياراق:
- درديز داواسي "گيرمان"دير- دئدي.
- "گيرمان" كيمدير؟- دئيه بيري سوروشدو.
- "گيرمان" بير كورددور، "قاراداش"دا ياشايير!..
مشه اسلانين گؤزلري ايشيلدادي:
- حتمن "گيرمان" راديو- تئلويزون ايشچيسي دير، ائله دئييل؟...
حاجي بايرام يئنه قاققيلدادي:
- يوووخ...
- حتمن راديو- تئلويزيوندا آدام- مادامي واردير.
- يوووخ...
مشه اسلان داريخدي.
- بس بو گيرمان نه‌كاره دير؟!
حاجي بايرام قارنيني تومارلاياراق سويوق‌قانليليقلا يانيت وئردي:
- چوباندير!..
قهوه‌خاناداكيلاردان بو سؤزدن يئرلريندن داشلانيب بيرگه سسلنديلر:
- چوباندير؟!!...
گولوش حاجي بايرامين اوزوندن سيليندي. چوخ جيددي سؤزلريني يئكونلاشديردي:
- "گيرمان" گلمه‌ميشدن بيزيم كندين احوالاتي سيزين كند كيمي ايدي آنجاق "گيرمان" گلندن بري مسئوللارين، راديو- تئلويزيونچولارين آياغي كنده آچيليب آرا-سيرا بيزي يوْخلاماغا گليرلر!
من قوْلومو سيزه ضامين وئريرم "گيرمان" گتيرسز موشگولوز حلّ اولاجاق!
*
ايكي گون سونرا "گيرمان" زورنا-قاوال ائشليگينده ساري‌داش كندينه گتيريليب قويون سوروسونون باشينا گئچيريلدي.
بير هفته سونرا، مسئوللار مركزدن "ساري‌داش" كندينه تؤكولوشدولر. راديو-تئلويزيون موخبيرلري فيلم چكيب گوزاريش توتوردولار. مسئوللارين بؤيوگو كندين خرمنليگينده "ساري‌داش"ليلارا ياخشي گله‌جگين موشتولوغونو وئره‌رك بو گؤروشلرين تكرار اولوناجاغيني سؤيله‌دي.
آخشام باشي قهوه‌خانادا ايگنه سالماغا يئر يوخ ايدي. بو گون "ساري‌داش" كنديني تئلويزيوندان گؤستريله‌جك‌ايدي. كندليلر چايلاريني ايستي-ايستي هورولداداراق گؤزلري‌نين قيراغي‌ايله ساعاتا باخيرديلار.
سونوندا ساعات يئدديني چالدي. اوستان خبرلري‌نين آپاريجيسي، برنامه‌نين اورتالاريندا ايزله‌ييجيلرين ديققتيني "ساري‌داش" كنديندن توتولان بيرگؤزاريشه چكدي.
ايستكان-نعلبكيلرين سسي سوسدو؛ قليانلار خورولتودان دوشدو؛ نفسلر سينه‌لرده گيزلندي؛ بوتون گؤزلر تئلويزونا تيكيلميشدي:
دوربين "ساري‌داش"دا گزيردي. ياشيل داغلار، اوجسوز بوجاقسيز باغلار، قاينار بولاقلار، داشقين چايلار، اوزون-اوزون سورولر دوربينين قاباغيندا سان گئچيردي سانكي. دوربين كندين ايچينه سوخولدو؛ مسجده، حاماما باش چكيب كوچه‌لري دولاشا-دولاشا خرمنليگه يئتيشدي. جاماعاتي سالاملايار كيمي قاباقلاريندا دوراقسانا-دوراقسانا اؤتدو؛ سونرا بوينونو كورسونون اوستونده دوران مسئولا چئويريب داياندي. مسئول دانيشماغا باشلادي:
- بسم الله الرحمن الرحيم
بيز بو گون چوخ خوشحاليق كي در خيدمتي مردم خونگرمي "زرددشت"-ايك. بو كندده كورد، فارس، تورك برادرانه با هم در صولح و صفا زندگانليق ائله‌ييرلر.......
سؤزلوك
آشيب داشماق: لبريز شدن
اؤتمك: عبور كردن
ائشليگينده: به همراهي
اونايلاماق: تاييد كردن
ايليق: ولرم، نه سرد نه گرم
بوروق-بوروق: حلقه -حلقه
چاشقينليق: حيرت، تعجب
چوبوقلاشماق: باهم تدخين كردن
جوشقو: هيجان
دوراقسانا-دوراقسانا: با درنگ حركت كردن
دومبك : طبل كوچك، تُنبك
دويونچك: عقده (در اين متن)
سويوق‌قانليليق: خونسردي
وئريملي: با بركت
يانيت: جواب
يئكونلاشديرماق: نتيجه گيري كردن ، خلاصه كردن
يوْخلاماق: سر زدن
تاريخ : پنجشنبه 5 دی 1392 | یازار : دوكتور جئري
قارنيزي "شوربا" ايله دويورمايين...!
قارنيزي "شوربا" ايله دويورمايين...!
دوكتور جئري
خوروزلانميشديلار؛ آز قالا بيربيري‌نين باشينا آتلانجاقديلار. اوستاد دفتري "مهر" دؤولتيني ساوونوردو، پروفسور نصرالدين ايسه "كليد"-ي.
بيري قيشقيردي؛ او بيري چيغيريردي؛ آرادا ميز يومروق يئييردي.
- "مهر" ياخشي ايدي...
- "كليد" گلمه‌سه‌ايدي "مهر" اؤلكه‌نين اورتا گولونه....
بيردن قاپي آچيليب فاطما ننه گيردي ايچري.
- قارنيزي "شوربا" ايله دويورمايين...
اوستونه قابارديم:
- سن بورادا نه قاييريرسان فاطما ننه، ناهاري چكديلر!...
***
فاطماننه داناباش كندي‌نين آغ بيرچگي‌دير. تويدا، ياسدا يئري مجليسن، سوفرانين باشي‌دير. جوما آخشامي گونو، حاجي بايرامين قيرخي ايدي. فاطماننه يانلاريني باسا-باسا حيطه گيردي. آذان چوخدان دئييلميشدي. حيطه كيمسه گؤرونموردو. فاطما ننه سسلندي:
- قيزلار!...
حيطين ديبينده‌كي دامدان، حاجي بايرامين تئهراندا اولان قيزي ائشيگه چيخدي.
- فاطما ننه نييه گئجيكميشسن؟.. گئچ اوتاغا ايندي ناهاريني گتيريرم..- دئدي.
فاطما ننه ايسته‌دي دئيه:" كيريخيب اؤيكونون آيري بير بؤلومونه گئتميشديم" ؛ دئمه‌دي.
- ناهار نمنه‌دير؟-دئدي.
- "آبگوشت".
فاطما‌ننه‌نين قولاقلاري تاققيلدادي. ايندي‌يه‌دك "آبگوشت" آديني ائشيتمه‌ميشدي."تئهران يئمه‌يي اولمالي‌دير" دئيه دوشوندو.اوتاغا گئچينجه شاشيردي. قادينلار "شوربا" يئمكده ايديلر. اؤزونو ساخلايا بيلمه‌دي:
- قيزلار قارنيزي "شوربا" ايله دويورمايين "آبگوشت" گلير- دئدي.
قادينلار گولوشدولر...
چهارشنبه 18 دی 1392 | یازار : دوكتور جئري
باس ائشيگه!
باس ائشيگه!
تاريخ اؤزگه‌لره ورق‌له‌نيركن بيزه تكرار اولور!
دوكتور جئري
ايبيشين جاميشي قيبيشين يونجاليغينا دوشموش؛ قيبيش حئيواني زميدن چيخارديركن ايبيش يئتتيشميش چوماقلا قيبيشين قولونو سينديرميش‌ايميش.
گون اورتاچاغي بير امنيه گلميش قيبيشين ساغ قولونا قاندال ووروب پاسگاها گؤتورموش‌ايميش. اونو فرماندهين اوتاغينا گئچيرميش‌ايمبشلر. اوتاقدا ايبيش فرماند‌ين ميزي‌نين قاباغيندا اوتورموش قاباغيندا بير چاي بوغلانيرميش‌ايميش. فرمانده نمنه‌لر چيزما-قارا ائتمكده‌ايميش امينه آياقلاريني بير بيرينه تاپداميش ديشاري چيخينجا فرمانده باشيني كاغيذلاردان قووزاميش قيبيشي گؤرموش:
- مردك! خجالت نكشيدي زدي گاو اين بينوا را ناكار كردي؟!-دئميش‌ايميش.
قيبيش اؤزونو ايتيرميش نه دئيه‌جگيني اونوتموش‌ايميش:
- جناب سروان....
فرمانده قيشقيرميش‌ايميش اوستونه:
- خفه شو...گمشو بيرون..
قيبيش داها بتر اؤزونو ايتيرميش اويان بويانا باخميش‌ايميش.
بو حركتدن فرمانده قودورموش‌ايميش:
- مردك.. مگه نگفتم گمشو بيرون!
قيبيش يازيق- يازيق:
- قوربان! "گمشو بيرون" ائله‌ييرم فقط قاپيني تاپانميرام!-دئميش‌ايميش.
***
سكسن ايل سونرا:
ايبيشين نوهسينين جاميشلاري قيبيشين نوهسينين يونجاليغينا دوشموش. قيبيشين نوه‌سي حئيوانلاري زميدن چيخارديركن ايبيشين نوه‌سي يئتميش قيبيشين نوهسينين قولونو سينديرميشدي.
گون اورتا چاغي بير مامور گليب قيبيشين ساغ قولونا قاندال ووروب پاسگاها گؤتوردو. اونو فرماندهين نوهسينين اوتاغينا گئچيرديلر. اوتاقدا ايبيش فرماندهين نوهسينين ميزي‌نين قاباغيندا اوتوروب قاباغيندا بير چاي بوغلانيردي. فرماندهين نوه‌سي نمنه‌لر چيزما-قارا ائتمكده ايدي. مامور آياقلاريني بير بيرينه تاپداييب ديشاري چيخينجا فرماندهين نوه‌سي باشيني كاغيذلاردان قووزاييب قيبيشين نوه‌سيني گؤردو:
- اَشي سن اوتانمادين بو يازيق كيشي‌نين جاميشلاريني ووروب شيل-كوت ائله‌دين! ائل بيل سن سود توليد‌ي‌نين قاباغيني كسمك ايستهييرسن؟... اسرائيل جاسوسو!...
قيبيشين نوه‌سي اؤزونو ايتيردي. نه دئيه‌جگيني اونوتدو:
- جناب سروان....
فرماندهين نوه‌سي قيشقيردي اوستونه:
- چوخ دانيشما... باس ائشيگه...
قيبيشين نوه‌سي باشيني آشاغي ساليب ائشيگه چيخدي. اوزون سوره قاپي‌نين داليندا داياندي. بير آياغيني گؤتوروب بيريني قويوردو. اوتاقدان پيرچا پيرچ سسي گليردي. قيبيشين نوه‌سي اؤزونو ساخلايا بيلمه‌دي؛ قاپيني آچيب باشيني ايچري‌يه اوزاداراق:
- قوربان ايچري‌يه باسا بيله‌رم؟!-دئيه سوروشدو.
***
گله‌جكده:
ايبيشين كؤتوكجه‌سي‌نين جار-جاميشلاري قيبيشين كؤتوكجه‌سي‌نين يونجاليغينا دوشه‌جكدير. قيبيشين كؤتوكجه‌سي حئيوانلاري زميدن چيخارديركن ايبيشين كؤتوكجه‌سي يئتيشيب قيبيشين كؤتوكجه‌سي‌نين قولونو سينديراجاقدير.
....
اينسانلار ايله اينكلر
اينسانلار ايله اينكلر
دوكتور جئري
يئني دؤولت گلندن اينسانلارين دورومو ياخشيلاشيب بو اوزدن اينكلرين موشكول‌لريندن يازاجاغيق
ماحمود آغاني بوراخين!
داناباشلي‌لار ساواشا ياراقلانيرديلار. تكه‌لي‌لر كؤوشن اوستونده، داناباشلي‌لارين ايكي اينگيني ووروب اؤلدوموشدولر. داناباش كندي‌نين خوجاباشيسي اؤنجه‌دن سالديري‌نين چيزگه‌سيني تاسارلاميشدي؛ علي ايله ولي آدلي ايكي قوللو-بيلكلي گنج توققوشما باشلامادان، تكه‌لي كندي‌نين پهلواني ماحمود آغاني توتوب ساخلامالي، بو سيرادا داناباش كندي‌نين پهلواني، حسن‌بيگ يومولوب تكه‌لي‌لري شيل-كوت ائتمه‌لي ايدي.
ساواش گونو گليب چاتدي. داناباشلي‌لارلا تكه‌لي‌لر قارشي قارشي‌يا گلديلر؛ گؤز-گؤزه بورون-بورونا دايانديلار. خوجا باشي گؤز باسينجا علي ايله ولي آتلانيب ماحمود آغاني يئره ييخديلار. آرا قاريشيب مذهب ايتدي. خوجاباشي حسن‌بيگه هيم وئردي. حسن بيگ باغيرا-باغيرا چوماغيني باشينا قالديرينجا آغاج آرخادان داناباشلي‌لارين بيري‌نين كلله‌سينه دَييب يئره سره‌له‌دي. حسن بيگ بونو گؤرونجه بو كز چوماغي ياناكي دولانديردي آنجاق قاباقداكي تكه‌لي باشيني اوغورلاييب آيري بير داناباشي قانا بوياندي. حسن بيگ تاكتيكي دَييشيب چوماغي آشاغيدان يوخاري‌يا وورماق ايسته‌ديكده آغاج اليندن چيخيب ويژيلتي ايله خوجاباشي‌نين قولاغي‌نين ديبيندن گئچدي. دورومو بئله گؤرن خوجاباشي قيشقيردي:
- علي!.. ولي!.. ماحمود آغاني بوراخين... حسن بيگي توتون!
حسنك كجايي؟
ايكي مامور بير اينگين قوللارينا قاندال ووروب عدليه‌يه گتيرديگيني گؤرجك شاشيرديم. اينگه ياناشيب احوالاتي سوروشدوم:
- سوچون نه‌‌ايميش؟
اينك باشيني آشاغي سالاراق:
- اينسانلارين "ارزاق عمومي"سيندا پوزغونلوق ياراتماق-دئدي.
- باشا دوشمه‌ديم، نئجه؟!
اينك اوزگون-اوزگون آچيقلادي:
- بولقور، كپك،يونجا كيمي يئملريميزين قات-قات باهالاشماسي‌نين آردينجا بيزده اؤلوم-قاليم ساواشيني قازانماق اوچون اينسانلارين يئيه‌جكلرينه گؤز تيكديك...
آخ بيلميرسن ماكاروني نئجه يئمه‌لي‌دير؟!...گؤيَرنتي نئجه يونجادان سولودور، دادلي‌دير!...آخ..تزه چؤره‌ك...آخ يئرآلما-سوغان...آخ..........
اينگين سؤزونو كسديم:
- جزانيز نه اولا بيلر؟-دئيه سوروشدوم.
گؤزلري ياشاردي:
- قورخورام كشتارگاها گؤنده‌ره‌لر- دئدي.
- سون سؤزون؟...
- ما...ما.. مو گشنمه.. حسنك كجايي!!
ايقتيصاد و طؤله ميخي
كنديميز داناباشدا، اوستا رحيم آدلي بير دميرچي ياشايير. فارسي ساوادي‌نين اولماديغينا باخماياراق چوخ آييق-ساييق، دوشونجه‌لي بيريسي‌دير. دئيير: اؤلكه ايقيصادي‌نين گؤسترگه‌سي طؤوله ميخي‌دير! ميللت طؤوله ميخي آليرسا دئمك ايقتيصاد يولوندا‌دير، چونكو هامي اينك بسله‌مك ايسته‌يير، بو اوزدن ات،سود، كود بول اولاجاق!...
ترسينه ميللت طؤوله ميخلاريني ساتيرسا دئمك دامداري‌لار باغلانيب ات، سود، كوددان دا خبر يوخدور!...
سيراغا گون اوستا رحيمين دوكاني‌نين قاباغيندان اؤتركن سوروشدوم:
- اوستا مملكتين وضعيتي نئجه‌دير؟
باشيني توولاييب:
- طؤوله ميخي آليريق!- دئدي.
آغ دانا، قارا دانا ايكيسي بير دانا!
موللانصرالدينين قارا داناسيني قاچميشدي، آغ داناني دؤيوردو. ندنيني سوروشدولار.
- بونو بوراخسام اوندان بتر قاچاجاقدير!-دئدي.
سؤزلوك:
اؤلوم-قاليم ساواشي : تنازع بقا
اوزگون: ناراحت
باغيرا- باغيرا: فرياد كشان
پوزغونلوق: اختلال
تاسارلاماق: طرح كردن، برنامه ريزي كردن
توققوشما: جنگ، برخورد
چيزگه: نقشه
خوجاباشي: كدخدا
دوروم: وضعيت
سالديري: حمله
سوچ: جرم
شاشيرماق: تعجب كردن
قارمالاماق: به زور گرفتن، تصرف كردن
قالديرماق : بلند كردن
قوللو-بيلكي: نيرومند، پرزور
كؤوشن: صحرا، حريم روستا
گؤسترگه: نشانگر
گؤيرنتي: سبزي
هيم وئرمك: اشاره كردن
يئم: غذاي حيوان
يئيه‌جك: غذا
ياراقلانماق: حاضر شدن، مسلح شدن
چوخ هويت‌لي ميللت
چوخ هويت‌لي ميللت
دوكتور جئري
بيز آذربايجانليلار چوخ هويت‌لي ميللت‌ايك. بيزيم كيمي چوخ هويت‌لي ميللت، سانيرام يئر اوزونده تاپيلماز. چوخ هويت‌لي اولدوغوموزون كؤكو نيسبي‌ليگه اينانديغيميزداندير بلكه. ساده بير سورغو ايله بيزيم چوخ هويت‌لي اولدوغوموزو آنلاماق چتين دئييل.
سيز هانسي ميللتدن‌سينيز؟
بيريسي بيزدن بو سورغونو سوروشسا، اؤنجه سوروشانين كيمليگيني اؤيره‌نيب سونرا يانيتلاياريق سورغوسونو.
سوروشان فارس اولسا، دؤشوموزو قاباغا وئريب، "تورك زبان"-يق دئيه‌ريك.
سوروشان كورد اولسا، "عجم" اولاريق.
سوروشان ائرمني اولسا، "موسلمان" آدلانديراريق اؤزوموزو.
سوروشان قوزئي آذربايجانلي اولسا، "ايرانلي"-لاشاريق.
سوروشان توركيه‌لي اولسا، بيز "آذري"-ييق افنديم، سؤيله‌يه‌ريك.
سوروشان آذربايجانين سونني توركلريندن اولسا، "شيعه" اولوب حضرت علي‌نين حاققي‌نين تاپدالانماسيندان سيزلاياريق.
سوروشان زنجان، همدان، قاشقايستان،خلجستان،خوراسان توركو اولسا، اؤزوموزو "آذربايجانلي"-ييق دئيه تانيتديراريق.
سوروشان اؤزوموز اولساق، "چوخ هويت‌لي ميللت‌ايك" دئيه‌ريك اؤزو اؤزوموزه.....
خوش خبر: پولوموزون دگري ايكي‌قات آرتدي!
خوش خبر: پولوموزون دگري ايكي‌قات آرتدي!
دوكتور جئري
قاش قارالميشدي. تو دئييردين گؤيده دونوردو. خيابان قيراغيندا بير آياغيمي گؤتوروب بيريني قويوردوم. سويوق سوموگومه، ايليگيمه، ايشله‌مكده‌ايدي. تاكسيلار، بسم‌الله‌دان قورخموش جينلر كيمي اؤنومدن ويزلاييرديلار. دؤزوموم توكندي. "دربست" دئيه قيشقيرديم؛ ساپ-ساري بير تاكسي قاباغيمدا دوندو. بيلمه‌ديم اؤزومو نئجه ايچري آتديم.دونوم آچيلينجا گؤزومون قيراغي ايله تاكسيچي‌يا باخديم. دوداق آلتي ميزيلداييردي. ميزيلتيسي گئت گئده اوجاليب ماهني‌يا دؤنوشدو. سسي هردن يوغونلاييب هردنسه اينجه‌ليردي:
يوغون سسله:
قوي خانيمي بگ آپاريب
تئزليگ ايله توي ائله‌سين،
سني‌ده‌جه من آلارام،
من ده بير بگ اولارام.
اينجه سسله:
پولون وار؟
يوغون سسله:
وار، وار.
اينجه سسله:
پولون وار؟
يوغون سسله:
بير آنبار!
اينجه سسله:
پولون وار، گله‌رم،
يوغون سسله:
بيليرم گلرسن.
اينجه سسله:
بئله، بئله ياريمسان
يوغون سسله:
بئله، بئله جانيمسان
اينجه سسله:
من گئده‌رم او اوغلانا
اونون پولو چوخ اولسون،
اونون پولو چوخ اولسون.
دردي،غمي آز اولسون
پولون وار؟
يوغون سسله:
وار، وار.
اينجه سسله:
پولون وار، گله‌رم
يوغون سسله:
بيليرم، گلرسن
اينجه سسله:
بئله، بئله ياريمسان،
يوغون سسله:
بئله، بئله جانيمسان.
ناي ناناناي ناناي ناناي ناناي ناناي ناي....
ماهني ميزيلتي‌يا دؤنوشونجه "آغزينا ساغليق" دئيه‌رك تاكسيچي‌يا دؤندوم:
- ماشا‌الله داماغين چاغدير.. اولمايا بو گئجه "سبد كالا" ايله ائوه گئديب خانيمي سئوينديره‌جكسن؟!
قاققاناق چكه‌رك:
- يوووخ باباااا... هله آداخلي‌يام... اوچ ايلدير آداخلي‌يام...-دئدي- آللاها شوكور ائله بيل پولوموزون دگري ايكي قات آرتيب؛ بئله گئتسه اينشاالله بو بايرام توي ائله‌ييب خانيميمي گتيره‌جگم!...
قولاقلاريم تاققيلدادي:
- نئجه، نئجه!... پولوموزون دگري ايكي قات آرتيب؟!...
تاكسيچي گولومسه‌دي؛ كؤينك جيبيندن ايكي اللي‌مينليك چيخارديب منه گؤسته‌ره‌رك آچيقلادي:
- سحردن آخشاماجان من چوخ ايشله‌سم اللي مين ايشله‌رم آمما بو گون يوز مين قازانميشام...
- حتمن منيم كيمي ياغلي موشتريلر تورونا دوشوب!
- يوخ.. پولوموزون دگري ايكي‌قات چوخاليب...
- منكي بير شئي باشا دوشمورم!
تاكسيچي بو كز جيبيندن بير ويزيت كارتي چيخارديب منه اوزاتدي. آلا-قارانليقدا كارتين اوزه‌رينده يازيلميش، "كؤهنه دمير، ميس، بوروش...." سؤزلريني سئچه بيلديم.
- واللاه من گئنه بير شئي باشا دوشمه‌ديم-دئديم.
تاكسيچي ايسته‌ييردي،"سنده نه پخمه‌سن" دئيه سؤزونو دگيشدي:
- دونن مسافيرلريمين بيري بو كارتي منه وئردي. سني مينديرمه‌ميشدن قاباق اونون يانيندان گليرديم. بو گون ايشله‌ديگيم دمير پوللاري كيلو ايله اونا ساتديم يوز مين تومن چيخارتدي.. تومنه-تومن دمير پوللاريميزين اوستونه گليب....
- يئتيشديك قارداش، زحمت اولماسا او كؤرپونون قاباغيندا ساخلا-دئديم.
تاكسي داياندي. آشاغي ائنديم.
- نئچه ائلر؟- دئديم.
- قابيلي يوخدور-دئدي- مين بئش يوز تومن!..
جيبيمدن ايكي دنه دمير بئش يوزلوك چيخارديب اووجونا باسديم.
- مين بئش يوزو كيرايه‌ن، بئش يوزوده وئرديگين خوش خبرين موشتولوغودور قارداش- دئديم.
آناديلينه فاتيحه!
آناديلينه فاتيحه!
دوكتور جئري
اوستاد دفتري‌نين عمّه‌سي اؤلموشدو. باش‌ساغليغي وئرمك اوچون آرخاداشلارلا ائولرينه گئتميشديك. اوستاد دفتري قاپي آغزيندا اگلشيب، گليب گئدنلري آغيرلاييردي. سؤز، فئورال آيي‌نين ييرمي بيري (ايسفندين ايكيسي) ، اولوسلار آراسي آناديلي گونوندن دوشدو. يولداشلار بو گوندن اولان آجيلي-آجيناجاقلي خاطيره‌لريندن دانيشيب، دارتيشيركن اوستاد پرريخته (اسكي اوستاد فرهيخته) قونوشوغا قاتيلدي:
- آرتيق بو سؤزلري بوراخين گئتسين! يئني دؤولت ائر-گئج مدرسه‌لرده آناديللري‌نين اوخوتدورماسينا قرارلي‌دير بير آز دؤزسه‌نيز....
پروفسور نصرالدين سؤزونو كسدي:
- آناديلي گونونون رسمي ايل‌سايارا گئچديگيني، چوماقسيز، دگنگسيز قوتلانديغيني گؤرمه‌يينجه چتين ايناناجاغيق بو لافلارا....
اوستاد دفتري ال-قولتوق،" دوغرودور، بو سؤزلردن چوخ ائشيتميشيك.."دئيه پروفسور نصرالدينين سؤزلريني اونايلادي. بو سيرادا قاپي آچيليب محله‌نين روحانيسي، موللا فرضعلي ايچري گيردي. اوستاد دفتري بويور ائدينجه منله قهوه‌چي آغا تئيمورون آراسيندا اگلشدي. اوستاد پرريخته دارتيشماني قالان يئريندن سوردورمك ايسته‌ييردي آنجاق اوستاد دفتري سؤزونو آغزيندا قويوب دارتيشيني بئله يئكونلاشديردي:
- وار اله گلر..مولك اله گلر..آناديلي الدن گئتدي.. گئتدي... بير داها اله گلمز.
موللا فرضعلي عبا-قباسيني ييغيشديريب قاش-گؤز ايله اوستاد دفتريني گؤستره‌رك ياواشجا آغا تئيموردان سوروشدو:
- مرحومه، والده‌يي مكرمه‌لري‌‌دور؟
آغا تئيمور سورودان بير شئي آنلاماميش كيمي، بليرسيزجه باشيني ترپتدي.
موللا فرضعلي اوجا سسله:
- اوخوياق مرحومه‌يي مغغوره‌يي تازه درگذشته؛ آناديلي حققينده فاتحة مع صلوات..
- اللَّهُمَّ صَلِّ عَلَى مُحَمَّدٍ وآلِ مُحَمَّد.....
بنزر يازيلار:
قوتلانمايان بايراميميز قوتلو اولسون! (آناديلي گونو)
موللانصرالدين و آناياسانين 15 نجي مادده سي
آذربايجان اوخوللاريندا توركجه اوخوناجاق !
باخ اوتان!
باخ اوتان!
دوكتور جئري
توركلرين آزينليق(بيزيم كيمي چوخونلوق يوخ) حاليندا ياشاديغي اؤلكه‌لرده، آناياسالاري‌نين 15-ينجي ماده‌سي‌نين نئجه ايجرا اولماسيني آراشديرماق ايسته‌ييرم!....
- دوكتور... دوكتور.. تئز گل بورايا!
چاغيران آغاخانيم‌دير. باياقدان پنجره قاباغيندا دايانيب قاپي-قونشونو ساييملايير. "گلديم!.."دئييرم. پنجره‌دن ائشيگه باخيرام؛ قونشوموز آغا نياز وانئتدن LSD تئلويزويونو يئنديرمكده‌دير. بير شئي باشا دوشمورم. "نه اولوب؟"دئيه سوروشورام. آغاخانيم ديشلريني قيجيرداراق:
- باخ اوتان!- دئيير.
يئنه بير شئي باشا دوشمورم." نه ايش گؤرموشم اوتانيم خانيم!" دئييرم.
- آغا نياز آرابا اوستونده يئرآلما-سوغان ساتماقلا LSD تئلويزويون آليب بيز هله-هله ويدئو چاغيندان قالان رنگي قاچميش اون‌دؤرد اينچ تئلويزيونا باخمالي‌ييق!- دئيه دولوقسانير.
اوتانيرام. جومجولوق تر اولورام. دئييرم:
- خانيم!
دئيير:
- هه..
دئييرم:
- گئت ايشكافدان "دسته‌‌چك"يمي( آغاخانيمين گؤزلري پارلايب دوداغي قاچير..)-ين اوستونده‌كي منديليمي گتير آنليمين تريني سيليم...
***
توركجه، قولاغيميزين ديبينده‌كي عراقين كركوك ائليندن باشلاياراق، قيبريس، مقدونيه، رومانيا، مولداواييا، كوزوو اؤلكه‌لرينده چئشيدلي دوزئيلرده رسمي كيمليگه صاحيب بير ديلدير.
كوزووو اؤلكه‌سي اوزه‌رينده تيكله‌ييرم. "كوزوو آنا ياساسيندا ديللر" باشليغي آلتينداكيني اوخويورام:
ماده 5 (ديللر)
1. كوزوو جومهوريتي‌نين رسمي ديللري آلبانجا و صئربجه‌دير.
2. توركجه، بوسناجا و رومجا بلدييه‌لر سوييه‌سينده رسمي استاتويا صاحيبدير و ياسايا اويغون شكيلده هر هانسي بير سوييه‌ده رسمي قوللانيمدا اولاجاقديرلار.
يازي‌نين آرديندا اوچ ديلده (آلبانجا، صئربجه، توركجه) يازيلميش بلدييه تابلولاري ديقّتيمي چكير:
اوجادان سسله‌نيرم:
-باخ اوتان!
آغاخانيم هيككه ايله:
- كيمه دئييرسن؟!- دئيه سوروشور.
- "فرهنگستان زبان فارسي"-يه دئييرم. گؤره‌سن دؤرد دؤوره‌سينه باخيب اوتانمير بونجا ديللرين اوخوتدورماسي‌نين قاباغينا شاتير اوزادير؛ داش آتير...
سونرا اؤز اؤزومه دئييرم: اولمايا كوزوو كيمي اؤلكه‌لرده، "فرهنگستان زبان فارسي"نين اولماديغينداندير ديللر اوخوللارا سوخولوب تابلولارا ديرماشير...
