من دئديم، سن نييه ايناندين؟!
من دئديم، سن نييه ايناندين؟!
دوكتور جئري
تاكسي‌نين قاپيسي آچيليب قونشوموز آسلان عمي آشاغي ائندي. هويوخدوم؛ تپه‌دن ديرناغا‌دك قان بولاشليقلي توز-تورپاق ايچينده‌ايدي؛ پالتارلاري جيريق-جيريق اولموشدو. آز قالا ييخيلاجاقدي. قولتوغانا گيريب قاپيميزين قاباغينداكي سككيده اوتورتدوردوم بيله‌سيني. ايسته‌ديم: " آسلان عمي اولمايا سنده سوروملولارين ديللرين آزاد اولاجاغي سؤزونه اويوب آناديلي گونونو قوتلاماغا چيخميشسان؟!" دئييم، دئمه‌‌ديم.
- آللاه يامانليق وئرمه‌سين آسلان عمي نه اولوب؟-دئديم.
سولوغونو آليب دئييندي:
- موسي قصّابي تانيييرسان؟
- بازار آغزيندا دوكاني اولاني؟
باشي ايله اونايلادي.
- ايكي آي بوندان قاباق بيله‌سينه بير اينك ساتديم، كئشكه اليم سينايدي ساتمايايديم. ساتاندان، گونو گونه ساتيب پولومو وئرمير. بو گون سحر چاغي گئنه پولومو ايسته‌مگه گئتميشديم. دوكانيندا بير آيري آغا اگلشميشدي. ايچري گيرمك ايسته‌ديگيمده آياغا قالخيب گولر اوزله يولومو كسيب: "مشه آسلان اينگين پولونو حاضيرلاميشديم، ياديمدان چيخدي دامداري‌دا قالدي؛ آخشام باشي گل آپار..."دئدي. آخشام باشي بير تاكسي توتوب دامداريسينا گئتديم. پولو ايسته‌ديم. دئدي: ايندي يوخومدو بير ايكي گون سونرا وئره‌جگم!.
دئديم: سحر اؤزون دئمه‌دين پولون حاضيردير آخشام گل آپار؟!
قاققاناق چكيب دئدي: من دئديم، سن نييه ايناندين!...
آنلاديم؛ سحر گؤردوگوم آغا، موسي قصابا اينك ساتماق ايسته‌ييرميش. موسي قصابدا آل-وئرين پوزولماماسي اوچون مني آل‌ديل ايله باشيندان آچميشدي.
موسي قصابين بو سؤزوندن قانيم ترسينه ايشله‌ييب اوستونه يومولدوم؛ اودا ايتلريني اوستومه كوشكوردوب مني بو گونه سالدي...
تاريخ : جمعه 9 اسفند 1392 | یازار : دوكتور جئري
