زوْر ایله...
زوْر ایله...
دوكتور جئري
"قهفه" وئبلاقينين باشقاني نئچه گون بۇندان اؤنجه مطبه اۇغراياراق بيلديرميش:
دوكتور جئري بئي، نئچه گوندور "زوْر" ايله ايرانچيلاشميشام، دييه، يازينيزين باشليغي كيشور دوست و همسايه! سوريه اؤلكه سينين باشقانينا توخوندوغونوزو ظن ائتدييم اوچون بو يازينيزي اوخوماديم.gif)
فيلترينگ نئچه گوندور گير وئريب قه فه ني باغلاماليسان، يوخسا بيز فيلتر ائديريق دييه، قه فه نين اوستونه، "تمامي فعاليت هاي قه قه در چارچوب قوانين جمهوري اسلامي ايران تعريف ميشود" يازميشام
منيم كيمي زور ايله ميللت پرست! لر اوچون ده بير يازي ياز
نئتداشيميزين يانيتيندا:
قهفهچي دوْستۇم!...
اۇمۇد ائديريم، آپارديغين اؤنلملر ايشه ياراييب ايشين حاكيمه دۆشمهسين! يوْخسا چوْخ قوْرخۇلۇدور زوْر ايله سندن ائله بير ايرانچي دۆزلدهلر كسروي، افشار،بيات و...يانيندا چايچي اوْلسون!
گۆلمهجه:
وۇرا-وۇرا...
گزمهلر بير كيشيني اوْرۇج يئيركن تۇتۇقلاييب حاكيمي-شرعين يانينا گؤتۆرمۆشلر. حاكيم سوْرۇشمۇش:
- كافيرسن مي؟
كيشي:
- يوخ! مۆسلمانام!..- دئميش.
بۇ يانيتدان اؤفكهلهنن حاكيم، "مۆسلمان اوْرۇجۇنۇ يئيرمي؟"دئيه گزمهلره قيشقيرميش:
- كافيرليگيني بوينونا آلمايينجا وۇرۇن بو يوْلسۇزۇ!
دۇرۇمۇ بئله گؤرن كيشي، ايكي اليني گؤيه قالديريب سيزلاميش:
- تانريم! سن اؤزۆن شاهيد اوْل، بۇنلار وۇرا-وۇرا مني كافير ائدهجكلر!
حئكايه:
آديني دگيش!
آغا تئيمور شهرين گؤزۆنده بير قهوهخانا آچيب آديني "كوْر اوْغلۇ" قوْيمۇشدۇ. قهوهخانا چوخراق گنجلرين، اؤزلليكله اؤيرنجيلرين پاتۇغو ايدي. آغا تئيمۇرۇن ايشي تۇتۇب مۆشتريلري گۆنۆ گۆندن آرتماقدا ايدي. آنجاق بير گۆن مامۇرلار تؤكۆلۆشۆب قهوهخانانين قاپيسيني قۇرغۇشونلاييب تئيمور آغاني ايدارهيه آپارديلار.
آغا تئيمۇر قورخا-قورخا سۇچۇنۇ سوْرۇشدۇقدا سؤيلهديلر:
- قهوهخاناني پانتوركيستلرين چنليبئلي ائلهميسن...
بو يانيتدان آغا تئيمۇر ال-آياغا دۆشۆب چارهني امكداشليق ائلهمكده گؤردۆ.
- سيز دئييرسيز نئيلهملييم؟
مامۇرلار آغا تئيمۇرۇن قوْرخدۇغۇنۇ گؤرهرك بيلهسيني چوْخ زوْرا باسماييب تكجه:
- بو جريمهني تؤكندن سونرا گئت قهوهخانانين آديني دگيش- دئديلر.
- آديني نه قوْْيۇم؟
- مملكتيميزين بؤيوك آداملاري آز دئييل؛ حافظ، سعدي، خيام، ...
***
آغا تئيمور قهوهخانين آدي دگيشيب خيام قوْيدۇ. آدين دگيشمهسيله مۆشتريلرده دگيشدي. گنجلر، اؤيرنجيلر يئريني بۇغۇ بۇرما لوْطولارا، قوْچۇلار وئرديلر...
بۇ اوْلايين اۆستۆندن بير آي گئچمهميش، يئنه مامۇرلار تؤكۆلۆشۆب قهوهخاناني باغلاييب تئيمۇرآغاني ايدارهيه گؤتۆردۆلر.
آغا تئيمۇر يئنه سۇچۇنۇ سوْروشدۇقدا،مامۇرلار قيشقيرديلار اۆستۆنه:
- اوْلان اۇتانميرسان شهرين عرقايچنلريني، شرابايچنلريني ييغميسان باشينا!
آغا تئيمۇر كؤنلۆنده خيامين دده-ننهسيني سؤيه-سؤيه سوْرۇشدۇ:
- دئييرسيز نئيلهملييم!
- هئچ ... بو جريمهني تؤكندن سوْنرا گئت قهوه خانانين آديني دگيش!
تئيمۇر آغا ميزيلدايا-ميزيلدايا سوْرۇشدۇ:
- آديني فردوسي قويسام ياخشي دير؟!
مامورلار گۆلۆمسهييب:
- هه.. چوخ ياخشيدير!- دئديلر.
تئيمۇر آغا بو كز ايشيني برك تۇتدۇ.
- صاباح گليب، دئمهيهسيز نييه شهرين يالانچيلاريني،گوْپچولاريني، فيريلداقچيلاريني ييغميسان باشينا ها...!
مامورلار بركدن گۆلۆشدۆلر:
- يوخ دئمهريك!...
***
ايندي نئچه آيدير، اوّل آللاه، سوْنرا حكيم فردوسينين كؤمگي ايله تئيمور آغانين ايشي برك تۇتۇب. قهوهخانا ساغچيلارين، سوْلچولارين، اوْرتاچيلارين، ايدارهچيلرين، آلوئرچيلرين، راديوْ-تئلئويزيوْنچۇلارين، قزئتهچيلرين،حاجيلارين، نۆمايندهلرين، شۇرالارين، دللاللارين، روضهخوانلارين، بنگاهچيلارين، ... ييغينجاق يئري اوْلوب. مۆشتريلر هردن يالاندان "چاييميز حئسابلانيب" دئيه پۇل وئرمهسهلرده، تئيمۇر آغا آرخايين دير؛ قهوهخاناسينين آغزي هئچ واخت باغلانماياجاقدير ...
نييه اسد عمينين آياغي كسيلمير؟!
نييه اسد عمينين آياغي كسيلمير؟!
يازان: اوستاد دفتري
آژير قاريشيقلي چيغير-باغير سسينه كۆچهيه قاچديم. قوْنشۇمۇز، اسدعمينين قاپيسيندا بير آمبۇلانس دايانميشدي.جاماعات قاپيلاريندا قيم-قيم قيمليداييردي. اۆرهگيم اۆزۆزلدۆ... اسد عمي بير ايكي گون ايدي خستهلهنيب ائوده ياتيردي. اوْلمايا بيلهسينه بير شئي اوْلۇب؟ قالاباليغين ايچينه سوْخۇلدۇم. اسدعمينين رنگي ساپساري اوْلمۇشدۇ. آروادي ايله اوْغلو قوْلتۇقلارينين آلتينا گيريب آمبۇلانسا مينديرمك ايستهييرديلر آنجاق آمبۇلانسچي قوْيمۇردۇ. قاباغا گئچيب،"آغا سيزين وظيفهز مريضلري سۆرعتله مريضخانايا چاتديرماقدير..نييه مينديرميرسيز؟"دئديم. آمبۇلانسچي بير آلتدان بير اۆستدن منه باخاراق لاغ ايله،" اۆرهگين يانير آل دالينا، آپار ..."دئدي. سونرا اؤفكه ايله آمبۇلانسين قاپيسيني چيرپيب قازلادي. آمبۇلانس گؤزدن ايتينجه اسدعميبه دؤنۆب، "عئيبي يوْخدۇر، ايندي ماشينيمي يانديريب سيزي مريضخانايا آپارارام" دئديم؛ كئشگه دئمهييديم! اينديجه آمبۇلانسچينين اينساني وظيفهدن بوْيۇن قاچيرديغينين ندني آنلاييرديم. اسدعمينين آياغي گئديردي. يئرده بير گؤلمج دؤزلميشدي. آتيلان اوْخون گئري دؤنمهديگي كيمي، اۇچۇرتدۇغوم سؤزۆ قايتارا بيلمزديم. ماشينين تركينه بير موشامبا ساليب اسدعميني مينديرديك. شاهداماري كسيلنلر كيمي، سۇيۇ گئديردي يازيق اسد عمينين!
بير آز گئتديكده، ماشينين شوشهسيني آشاغي ائنديره-ائنديره دئديم:
- مريضخانا اۇزاقدير ايستهسز بير ياخشي دوْكتوْرا آپاراق..
اسدعمينين خانيمي باش-گؤزۆنه تاپدايا-تاپدايا:
- اۇستاد هر نه ائلهييرسيز ائلهيين آنجاق تئز اوْلون ...- دئيه سيزيلدادي.
***
آز سونرا دوْكتوْر جئرينين مطبينده دايانميشديق. دوْكتوْر، اسدعمييه باخاندان سونرا ميزينين آرخاسيندا اگلشيب بير شئيلر جيزما-قارا ائده-ائده سوْرۇشدۇ:
- برزيل اتي يئييبسيز؟
اسدعمي زاريدي:
- يوْوْخ...
- هيند دۆيۆسۆ يئييبسيز؟
- يوْوْ...
- "سبد كالا" يۇرمۇرتاسي يئييبسيز؟
- يوْوْ..
- دؤولتي ميوه يئييبسيز؟
- يوْوْ...
- ...
دوْكتوْر جئري داريخدي. آنلاديم؛ اسد عمينين دۇرۇتماسيني بير شئين بوينونا آتماق ايستهيير، تاپا بيلمير.سوسقونلوق اوتاغي بۆرۆدۆ.سالوْندان تئلئويزيون سسي گليردي. بيردن دوْكتوْرۇن دوداغي قاچدي.نۆسخهني اسدعمينين اوْغلۇنا اۇزاداراق:
- بير شئي دئييل، "تحريم"لردندير. بو ايگنه-داواني ايشلتسهز بير-ايكي گۆنه توْختايار-دئدي.
***
ائوده اوْتۇرمۇشدۇم قاپي چاليندي. ائشيگه چيخديم. اسدعمي قوْلۇنۇ اوْغلۇنۇن بوْينۇنا سالاراق قاپي آغزيندا گؤزلهييردي. آروادي ايسه مۇشامبا قوْْلتۇغۇندا گئندن باخيردي.
- خئير اوْلا اسد عمي !- دئديم.
دوْداقلاري تيترهدي:
- اۇستاد! اۆزۆمۆز كسمهدي بير آييريسنا دئيَك.. زحمت اوْلماسا بيزي بير آيري دوْكتوْرا آپار....
- مَيه دوْكتوْر جئرينين داوالاري دۆشمهدي؟!
- يوخ!..ائله بيل سيزين بو دوْكتوْر مدركيني دانيشگاهي آزاددان آليب....
غئيرتيمه دگدي،
- استغفرالله! استغفرالله!.. دوْكتوْر جئري "هاوايي" دانيشگاهيندان فارغالتحصيل اوْلۇب- دئديم.
اسد عمي سۇيۇ سۆزه-سۆزه:
- بئلهديرسه، نييه تشخيصي غلط چيخيب.. ايندي نئچه گۆندۆر تلويزيون دئيير: تحريملر گؤتۆرۆلۆب؛ آمما منيم نه تكجه آياغيم كسيلمهييب بلكه شيددتلهنيب ده!- دئدي.
آچيقلاما:
آياغي كسيلمك: قطع شدن اسهال
آياغي گئتمك:آياغي آچيلماق/ اسهال شدن
اؤفكه: عصبانيت
بوْيۇن قاچيرماق: امنتاع كردن
زاريماق: ناله و زاري كردن
سوسقونلوق: سكوت
شاهدامار: شاهرگ
قالاباليق: ازدحام
قيم-قيم قيميلداماق: به شدت ازدحام كردن
گؤلمج: حوضچه، استخر
گئندن: از دور، از كنار
لاغ: طنز، تمسخر
مۇشامبا: مشنبع، نايلون
ندن: علت، سبب
پيس آليشقانليقلار
پيس آليشقانليقلار
دوكتور جئري
اوستاد دفتري ائلچيليگه گئتميشدي. چوخلو دانيشيقدان سونرا قيز آتاسي سوروشدو:
- اوغلونوزون پيس آليشقانليغي يوخدور؟!
اوستاد دفترينين دوداغي قاچدي. آرخايين-آرخايين سايماغا باشلادي:
- منيم گولبالام... نه قزئت آلار، نه درگييه توْخوُنار، نه كيتاب اوخويار، نه اينتئرنئتده گزر، نه تراختور اويونونا گئدر، نه سياسته قاريشار، نه اورمو گؤلو ديلينه گلر، نه مدني فعاللارلا دوْلانار، نه....
قيز آتاسي اوستاد دفترينين سؤزونو كسيب جوْشقو ايله:
- بئله كۆرهكني بيز گؤيده آختاريرديق يئرده تاپديق..- دئدي، سونرا خانيمينا دؤندو:
- سيز نه دئييرسينيز خانيم؟
قيز آناسي گولومسهدي:
- من نه دئيه بيلهرم، آللاه مۆبارك ائلهسين.
- آللاه مۆبارك ائلهسين...
سؤزلوك:
آرخايين: مطمئن
آليشقانليق: اعتياد، عادت
ائلچيليك: خواستگاري
توْخوُنماق: دست زدن
جوْشقوُ: هيجان
درگي: مجله
دوْداغي قاچماق: گۆلۆمسهمك/ تبسم كردن
قزئت: گۆندهليك/ روزنامه
كۆرهكن: داماد
يارانه گولمهجهلري
يارانه گولمهجهلري
دوكتور جئري
بوندا بير ايش وار!
بير گون پيشيك سيچانا دئيير:
- بو دليكدن چيخ، او دليگه گير؛ سنه "يارانه" وئريم.
سيچان دئيير:
- بوندا بير ايش وار ...يوخسا سن موفتهسينه "يارانه" وئرمزسن!
يئني يامان
كوچهده ايگنه سالماغا يئر يوخ ايدي. ايكي قونشو داعوا ائلهييرديلر. بيري، او بيريني كيچيمسهمگه؛ تحقير ائلهمگه باشلادي:
- فيطرهخور...زكاتخور....يارانهخور...
يازيق وارليلار
ايكي يارانهخور دانيشيرديلار.
بيرينجيسي:
- گئنه بيز يارانه آليب گئچينيريك؛ گؤرهسن بو يازيق وارليلار نئيلهيهجكلر؟
ايكينجيسي:
- آللاه اونلارين كؤمگي اولسون!...
وارليليق بلگهسي
ائلچيليك تؤرهنينده/مراسيمينده/ قيز آتاسي، اوغلان آتاسيندان سوروشور:
- اوغلونوزون ايقتيصادي وضعيتي/دورومو/ نئجهدير؟
اوغلان آتاسي گولومسهيرك قولتوق جيبيندن رفاهي سايتينين پرينتيني چيخارديب قيزين آتاسينا اوزاداراق دئيير:
- ايقتصادي وضعيتيميز توپ كيمي دير.. باخين بيز يارانه آلميريق!...
وارلي ديلنچي!
ديلنچي اليندهكي كاغيذي گليب-گئدنلره گؤسترهرك يالواريردي:
- آللاهي سئورسيز منه كؤمك ائلهيين يارانهمي كسيبلر!
دوه
بيري قونشوسونا توختاقليق وئريردي:
- چوخ اوزولمه.. بو بير دوهدير هامينين قاپيسيندا ياتاجاق. بوگون سنين يارانهني كسيبلر صاباحدا بيزيمكيني كسهجكلر!..
عجيبه ميللت
- ايران ميللتي دونيانين ان عجيبه ميللتيدير.
- نئجه؟!
- بير گون اوجوزلو ايمكانلاردان واز گئچيب يارانهسيني آليرلار؛ او بيري گون يارانهدن واز گئچيب اوزجوزلو ايمكانلار آلماق ايستهييرلر!
يارانه آلماق ياخشيديرمي؟ پيسديرمي؟
يارانهلرين هدفليلنديرمهسينين بيرينجي گونونده، موخبير بيرينين قاباغيني كسيب سوروشور:
- يارانه آلماق ياخشيديرمي؟ پيسديرمي؟
- من هلهليك بيلميرم.. آنجاق راديو-تئلئويزيون هر نه دئسه او دوزدور!
قاييديب اوّلكي كيمي اولاجاغيق مي؟
قاييديب اوّلكي كيمي اولاجاغيق مي؟
دوكتور جئري
گيريش:
يئني دؤولت نئچه آيدير، بوتون ايمكانلاردان(راديو، تئلئويزيون، اينتئرنئت، اويدو، گوندهليك، كبليد و...) يارارلاناراق يارانهلرين شرّيندن قورتولماغا، دورومو اسكي حالينا قايتارماغا چاليشير. بو ايشده نه قدر باشاريلي اولاجاغي هلهليك بللي دئييل. قديمكيلر اولسايدي، بو ايشي بير گونده، اَن آز ايمكانلا يئرينه يئتيرمك اولاردي. اينانميرسينيزسا، "آذربايجان فولكلوريندان نمونهلر"(1) كيتابيندان اوخودوغوم حئكايهني سيزده اوخويون:
قاييتديق اولدوق اوّلكي كيمي!
مشروطهليكده، شجاعالدوله روسيه چار حؤكومتينين گؤزگؤرهسي يارديمي، اينگيليسلرين اوناييشي/موافقتي ايله تبريزه حاكيم كسيلير. او دؤنمده بو گونكو كيمي گوندهليك قزئت يوخ ايدي؛ راديو-تئلويزيون دا هله دوزهديلمهميشدي؛ اونا گؤره فوري خبرلري جارچي آراجيلغي ايله خالقا بيلديرَرديلر.
شجاعالدوله وريندن بير جارچي تبريز بازارينا گؤندهريلير. جارچي قيشقيراراق جار چكير:
- آييي...ي تبريزليلر... بو گوندن، عدليه قاداغان.. نظميه قاداغان.. اوز قيرخديرماق قاداغان...
سونرا دوشونور؛ گرهك چوخ شئيلري دئيه. قيسا كسير:
- خولاصه... قاييتديق اولدوق اوّلكي كيمي!
آچيقلاما:
(1)- آذربايجان فولكلوريندان نمونهلر،1-ينجي جلد، توپلايان دكتر-س.جاويد، انتشارات فرزانه، 1358
اؤزگه چيراغينا ياغ، اؤز چيراغيميزا سس!
اؤزگه چيراغينا ياغ، اؤز چيراغيميزا سس!
دوكتورجئري
فارس ادبياتينين اورتا ديرگي، اوستاد روغنيدن سؤز دوشموشدو.
اوستاد دفتري ديشلريني قيجيرتدي:
- نييه سن همشهريميز اوستاد روغنيني تانيميرسان؟!
چيگنيمي آتيب،"تانيميرام" دئديم.
- اوستاد، بركتلي دوخسان ايلليك عؤمرونده، فارس ديلينده يوزدن چوخ كيتاب يازيب!
- نييه ياواش دئييرسن، دئنن اؤزگه چيراغينا ياغ اولوب دا؟!
- يوخ.. آناديلي، توركجهيهده بؤيوك خيدمت ائلهييب..
- اولمايا ائلين درديني فارسجا سؤيلهييب؟!
- يوخ... اونداندا بؤيوك!
- ائلين تاريخ، كولتورونو فارسجا يازيب؟!
- يووخ... اوندان دا بؤيوك!
- يوخسا آنا ديلينين اوخوللاردا اوخوتدورماسيني ساوونوب؟
- يوووخ!... اوستاد آناديلينين اوخوللاردا اوخوتدورماسينا قارشيدير!!
- من لاپ فاريشيديرديم... اوستاد روغنينين بؤيوك خيدمتي ندير.. ؟!
- اوستاد دانيشاندا، فارسجاني تورك لهجهسي ايله دانيشار!!..
بايرامليق وئرمهنين خطرلري!
بايرامليق وئرمهنين خطرلري!
دوكتور جئري
ايقتيصادي دورومون آغيرليغينا گؤره، بو ايل ايستهديم، قوهوملارين اوشاقلارينا پول يئرينه قديمكيلر كيمي بويانميش يومورتادان، خوروز شيرنيدن، جورابدان اولوشان "سبد كالا" بايرامليغي وئرم. آغا خانيم قارشي چيخدي:
- اولمايا دؤولت تكين خالقي كؤهنه يومورتالارلا زيريغا سالماق ايستهييرسن !
من دؤولت كيمي سؤزه باخمايان دئييلم ، تئز واز گئچديم قراريمدان...
***
بايراملاشماغا باجاناغيمگيله گئتديك. اوغلو بالاجا ياشار قارشي يؤنده اوتوروب دؤولت ايشچيلري كيمي بايرامليغيني گؤزلهييردي. قولتوق جيبيمدن قات كسمهميش بير ايكيمينليك چيخارديب بيلهسينه اوزاتديم. دينمز-سؤيلهمز پولو آليب اوتاقدان چيخدي. چوخ چكمهدي تكرار اوتاغا قاييداراق گليب قاش-قاباقلا قاباغيمدا دايانيب دئدي:
- عماوغلو.. نييه زحمت چكدين..اللرين آغريماسين!...
كئجيكميش تشككوردن شاشاراق:
- تشككور لازيم دئييل اوغلوم.. بير شئي دئييلدي...- دئديم.
بالاجا ياشار سؤزلريمي باشي ايله اونايلاياراق آرتيردي:
- ماماجانيم بير ياندان دئيير ايكيميني ديلنچييه وئريرسن آلمير بير يانداندا دئيير گئت تشككور ائله!
بو يازيلاري دا اوخويا بيلرسينيز:
ايراندا گونده، "سيزده بدر" دير!
يوردوموزون آدي نهدير؟
يوردوموزون آدي نهدير؟
دوكتور جئري
اوشاق سوروشور:
- گؤلو قوروموش تورپاغي سويا گئتميش يوردوموزون آديني نهدير.. بيگلر؟!
چوخ هويتلي آغا هويوق-هويوق اوزومه باخير....
يارديمينا قوشورام:
- تاريخين درينليكلريندن باشلاياراق پهلويجه آتورپاتَكان، پارسجا آذربادگان، يونانجا آتروپاتنه، بيزانسجا آذربايگانون، ائرمنيجه آذرباياقان، سوريانجا آذربايغان، عربجه آذربيجان دئييلن؛ اينديسه دونيادا آذربايجان آدي ايله تانينان يوردوموزون آديني سوروشور؟!
چوخ هويتلي آغا دوداغيني بوزوشدورور:
- ائوينين آدرئسيني اونوتموش كيشي كيمي يوردوموزون آديني اؤزگهلردن اؤيرنمگه گرك يوخ!..- دئيير- يوردوموزون آدي: آغ اوستاندير، آش اوستاندير، اردبيل اوستاندير، زنجان اوستاندير، قزوين اوستاندير، خوياوستاندير، مرند اوستاندير، ميانداب اوستاندير...
كاكا عوثمان اوركلهنير:
- كورد اوستان يادينيزدان چيخماسين چوخ هويتلي-چوخ يوردلو آغالار!
بنزر يازي:
