باخ اوتان!
باخ اوتان!
دوكتور جئري
توركلرين آزينليق(بيزيم كيمي چوخونلوق يوخ) حاليندا ياشاديغي اؤلكه‌لرده، آناياسالاري‌نين 15-ينجي ماده‌سي‌نين نئجه ايجرا اولماسيني آراشديرماق ايسته‌ييرم!....
- دوكتور... دوكتور.. تئز گل بورايا!
چاغيران آغاخانيم‌دير. باياقدان پنجره قاباغيندا دايانيب قاپي-قونشونو ساييملايير. "گلديم!.."دئييرم. پنجره‌دن ائشيگه باخيرام؛ قونشوموز آغا نياز وانئتدن LSD تئلويزويونو يئنديرمكده‌دير. بير شئي باشا دوشمورم. "نه اولوب؟"دئيه سوروشورام. آغاخانيم ديشلريني قيجيرداراق:
- باخ اوتان!- دئيير.
يئنه بير شئي باشا دوشمورم." نه ايش گؤرموشم اوتانيم خانيم!" دئييرم.
- آغا نياز آرابا اوستونده يئرآلما-سوغان ساتماقلا LSD تئلويزويون آليب بيز هله-هله ويدئو چاغيندان قالان رنگي قاچميش اون‌دؤرد اينچ تئلويزيونا باخمالي‌ييق!- دئيه دولوقسانير.
اوتانيرام. جومجولوق تر اولورام. دئييرم:
- خانيم!
دئيير:
- هه..
دئييرم:
- گئت ايشكافدان "دسته‌‌چك"يمي( آغاخانيمين گؤزلري پارلايب دوداغي قاچير..)-ين اوستونده‌كي منديليمي گتير آنليمين تريني سيليم...
***
توركجه، قولاغيميزين ديبينده‌كي عراقين كركوك ائليندن باشلاياراق، قيبريس، مقدونيه، رومانيا، مولداواييا، كوزوو اؤلكه‌لرينده چئشيدلي دوزئيلرده رسمي كيمليگه صاحيب بير ديلدير.
كوزووو اؤلكه‌سي اوزه‌رينده تيكله‌ييرم. "كوزوو آنا ياساسيندا ديللر" باشليغي آلتينداكيني اوخويورام:
ماده 5 (ديللر)
1. كوزوو جومهوريتي‌نين رسمي ديللري آلبانجا و صئربجه‌دير.
2. توركجه، بوسناجا و رومجا بلدييه‌لر سوييه‌سينده رسمي استاتويا صاحيبدير و ياسايا اويغون شكيلده هر هانسي بير سوييه‌ده رسمي قوللانيمدا اولاجاقديرلار.
يازي‌نين آرديندا اوچ ديلده (آلبانجا، صئربجه، توركجه) يازيلميش بلدييه تابلولاري ديقّتيمي چكير:
اوجادان سسله‌نيرم:
-باخ اوتان!
آغاخانيم هيككه ايله:
- كيمه دئييرسن؟!- دئيه سوروشور.
- "فرهنگستان زبان فارسي"-يه دئييرم. گؤره‌سن دؤرد دؤوره‌سينه باخيب اوتانمير بونجا ديللرين اوخوتدورماسي‌نين قاباغينا شاتير اوزادير؛ داش آتير...
سونرا اؤز اؤزومه دئييرم: اولمايا كوزوو كيمي اؤلكه‌لرده، "فرهنگستان زبان فارسي"نين اولماديغينداندير ديللر اوخوللارا سوخولوب تابلولارا ديرماشير...
