ايكي جيزما- قارا
من كيمم؟
ديللري ايله اوركلري بير اولدوغوندان ان ياخين دوستلاريم دوشمانلاريمدير
تام ! ندن منيم سورولاريمدان قيزيرسان؟ ندن قيزماقدان اوزومو جيرماقلاماق ايسته ييرسن؟ بيليرسنمي توم اينسانلارين ايچريسينده بير جاناوار يئرله شيب ؟ بيليرسنمي بوتون اينسانلار بو جاناواري بولوب اؤلدورسه لر آرزولانان " آرمان شهر" و يا " اوتوپيا " يئر اوزونده گئرچكلـــــه شه جكدي. بيليرسنمي سنين ايچينده كي جاناوارين آدي ندير؟
تام! ندن گوزگو قارشيسيندا اوتوروب كيم اولدوغونو اؤزوندن سورشماقدان قورخورسان؟ (و قورخوروق) . اولا بيلر دئيه سن : " اولان ! من دلي دئييلم كي گوزگو قارشيسيندا اوتوروب اؤزومدن كيم اولدوغومو سوروشوم ! طبيعي كي من " رامين" – ام!" . آمما يوخ تام بئله دئييل . گوزگويه ياخشي باخسان بئله دئييل . "رامين" تكجه آتا-آنان سئويب سنين اوزه رينه قويدوغو بــيره ر آددير. بو آد " كامبيز" ويا " چنگيز" ده اولا بيلردي ؛ نئجه كي من سنين اوزه رينه " تام " آدي قويموشام و بو آلينتي آدلارين هئچ دخلي يوخدور بيزه و كيمليگيميزه .( سانيرام دده قورقوت كيتابيني اوخوموشسان . قديم توركلرده بير اينسانين اوستونه نئچه يول آد قويارديلار ايندييسه ده بو گلنك يئنه چوخ يئرلرده سورمكده دير ).
تام! گوزگويه ياخشي باخ! دوشون... دوشون.... و اؤزوندن سورش: " گئرچكدن من كيمم؟"
تام ! بوتون اينسانلارين ايكي كيمليكلري وار: قوندارما و گئرچك .آنجاق اينسانلارين چوخلاري قوندارما كيمليكلري ايله تانينيرلار. قوندارما كيمليگي اينسانا اؤزو و چئوره سي يارادير البته چئوره نين پايي بو آردا چوخدور. اينسان راحات و موتلو ياشاماق اوچون اؤزونو اؤزونون ديش دونياسييله عيارلايير(تنظيم له يير) . بو چوخ قولاي(راحات) ايشدير.خالقين ندن خوشلاري گليرسه اؤيله ياپ ! عيني آليش- وئريش كيمي! چؤرك بورج وئر قارشيليغيندا چؤرك بورج آل. توپلومدا نه يه اؤنم وئريليرسه اونو قازان : مقام ، پول ، شؤهرت ، مدرك ....
تام ! بو آرادا چوخلاري نين كيمليگيني يالنيز خالق يارادير . ياراديبدا قالديرير ، قالديرير لاپ باشي اوسته.... و سونرا ائله چالير يئره كي پوخو بورنوندان گلسين! (تاريخده مينلريني سايماق اولار)
آمما گئرچك كيمليگه گلينجه ؛ بو كيمليگي ياراتماق دئييل آختاريب بولماق گره ك . گئرچك كيمليگي بولونجا آرتيق بوتون گيزلر (سيرلار) چؤزوله جك.گيزلر چؤزولونجه هر شئيِ زامان ، مكان ، اشيا و... يالانچي اؤنميني ايتيريبب يئني آنلام قازانجاق ....
زامان ، مكان و اشيادير اولوم و اؤلومه آنلام وئرن و بونلار اؤنملريني ايتيرينجه..... (بوراسيني سن دوشون).
تام! گئرچك اينساني كيمليگيميزي تانيديغيميزدا بوتون تديرگينليكلر ، اينجيكلر، عصبيت لر و... اورتادان يوخ اولاجاقدير...
تام ! سن اؤزونو تانيميركن قارانليقداكي مني نئجه تانييا بيله جكسن؟ بير من كي ، اؤزوم اونو تانيماقدا قالميشام و اؤزومو آختاريرام!!.....
مني تاپسان منه خبر وئر.
ساغ اول
***********************************
پيشيكلرين تاريخي
من پيشيگم آجميشام
جيزما- قارا يازميشام
آغزيما " سيچان " وارسا
من آغزيمي آچميشام
(تام جهانگيروفون قيتليق ايللرينده يازديغي جيزما - قارا)
پيشيكلرين آجيناجاقلي تاريخيني اوخودوغومدا هئپ گؤزلريم ياشاريب دولوخسانميشام. تاريخده، پيشكلرين بير زامانلار اورمان– مئشه لرين سولطاني اولاراق آسلان آدلانديقلارينا تانيق اولوروق . آنجاق سومورگه چي اينسانلارين اورمانلارا آياقلاري آچيلديغيندان بري بـــــــــو اوره كلي حئيوانلار سيخما – بوغمايا دوشه رك مينياتوري آسلان كيمي كندلره و شهرلره قاچميشلار. كئچمیشده آسلان آدلانان پيشيكلر كندلرده ، كندلي لرين سود - قاتيغيندان(يوغورت ) اوغورلوق ائده رك ياشاملاريني سوردورموشلر؛ بو اوزدن بونلاردا كمونيستي دوشونجه لر يارانماغا باشلاميشدي. باش پيشیك، قارال ميياوين فيكرينجه ، پيشكلر بوتون كندلي لرين سود- قاتيقلاريندا اورتاق (شريك) ديرلار.
پيشيكلرين اوغورلوقلاريندان جانا دويموش كندلي لر سوندا دوشونوب داشينديقدان سونرا، پيشكلرين آغزيني سوته باسميشلار. بئله كي ،كندلي لر سودلري قايناديب پيشكلرين يوللاري اوستونده يئرلشديرميشديلر . پيشكلر يييه سيز سودلري گؤرونجه آخيشيب سودلري ايچينجه آغيز و ديللري يانميشدير.(دئييلنلره گؤره پيشيك سؤزو ائله بوردان تؤرنميشدير : آغيزي پيشميش ، آغيزي يانيق ) بونلا آغزي يانميش پيشكلر سود – قاتيق اوغورلاماغي ترك ائديب بير سوره آجيليغا دوشموشلر. آجيلق سونوجوندا پيشكلرين اوچ ميليونو جانلاريني الدن وئرميشدیرلر . كندلــــي لر سونوندا ، پيشكلرين بو آجيناجاقلي دوروملارينا آجيييب بير تيكه چؤرك بونلارين قاباقلارينا آتيب سيچانلارين توتماسيني بونلارا تاپشيرميشلار.
پيشكلرين موتلو چاغي صنعتي اينقلابا قدر سورموشدو. صنعتي اينقلاب باش وئريب سيچان داواسي ایختراع ائديلينجه ، پيشيكلرين قارا چاغي يئنه باشلاميشدي. بو دؤنمده، پيشيكلر قارينلاريني دويورماق اوچون كندلردن شهرلره آخيشميشلار. كندلرين بوللو – نعمتلي گونلرينه حسرت قالان پيشكلر بو كز شهرلرين فاضيلابلارينا سيغيناراق فلاكتلي يئني ياشاملاريني باشلاميشلار. گئجه لري قارينلاريني دويورماق اوچون آشقال قابيلاردا بيربيرلري نين جانينا دوشن پيشكلرين دورومو ، آيدين پيشكلري عوصيان جيزما- قاراسي ياراتماغا سوروكله ميشدي. تام جهانگيروف آيدين پيشيكلرين اؤنده گلن جيزما- قارچيلاريندان بيري ايدي. تام ايللر بويو ، فاضيلاب ايـــگي چكه رك دبيليو- سي جيزما- قاراسيني چيخارتماغي باشارميشدي.
چاغداش دؤورده ، پيشيكلر سيچانلارلا بيرگه فاضيلابلاردا ياشاييرلار. آنجاق هله ليك بللي دئييل سيچانلار پيشكلردن يئكه ليب لر ياخود پيشيكلر خيردالايبلار كي سيچانلارين قورخوسوندا آلتلارينا قاچيريرلار. پيشيك شوناسلارين اينجه له مه لرينه گؤره ، پيشكلر بو سرعتله كيچيليرسه چوخ ياخين گله جكده اونلارين سيچان اولما اولاسيليغي( احتمالي) قاچينيلمازدير.
يازيني تام جهانگيروفون يئني بير جيزما – قارا ايله بيتيريريك:
آسلانلاريميز پيشيك اولدو
پيشيكلريميز سيچان
دليك آختاريرام بو فاضيلابدان
من گره ك قاچام
قاچام!
