فارسجانلي بايرام
فارسجانلي بايرام
دوكتور جئري
گئجه ياريدان گئچميشدي. تهران سوسوب هامي اويوموشدو. يوخو گؤزومدن داميردي. قورخانايا (اسلحه خانايا) گؤزَتچي(نگهبان) دوراجاقديم. اوزومه بير چيرپي سو ووروب يوخونو قاچيرتماق اوچون توالئت سرويسلرينه گئتديم.ساللانا-ساللانا ايچري گيرديكده عجيب-غريب، اَنايين سسلر دقتيمي چكدي:
- چ چ چ چ چششش...
- ج ج ج ج جگگ ...
- ق ق ق ق قيغغغ....
يوخو باشيمدان قاچدي. ايره لي له ديكده گوزگو (آينا) قارشيسيندا بيريني گؤردوم. اليمي آرخادان چيگنينه قويدوم. گئري دؤندو. بايرام ايدي. يئنه قي قي قييغغغغ.... سسي چيخارتدي . قورخدوم بو كز.
- بايرام نولوب؟ بوغازيندا بير شئي قاليب؟ ايسته ييرسن بير آفتافا سو گتيريم ؟ - دئديم.
سرتجه - يوخ...- دئدي سونرا اوز گؤزونو تورشاديب ائكله دي:
- تمركزومو پوزدون اوغلان!..
- نه تمركزو؟- دئيه سوروشدوم.
- لهجه سيز دانيشماق اوچون حرفلري فارسلار كيمي تلفظ ائتمَگه چاليشيرام!....ق ق قيغغغغ...غغ....
ماراقلا سوروشدوم:
- نييه بورادا تمرين ائديرسن؟
- آخي سسين انعكاس تاپديغي اوچون(يانكيلانديغي اوچون) بورا چوخ الوئريشلي دير- دئيه يانيتلادي بايرام.
بايرام بيزيم كندلي ايدي. هوشلو-باشلي بيريسي ايدي داها اؤنجه لري.عسگرليگه گلمه ميشدن قاباق كنكور سيناقلارينا بيرگه حاضيرلانيرديق. هر گون،شهرين ائل كيتابخاناسينا (عمومي كيتابخاناسينا) گئديب درس اوخويوردوق. آنجاق بير گون، كيتابخانايا وارديقدا، ايران آدي آلتيندا باسيلان گؤن جيلدلي قالين فارس تاريخ و ادبيات كيتابلاري، كيتابليغين باش رفلريندن بايرامين تپه سينه تؤكولوب اونو آلتينا آلدي. گوجلوكله بايرامي كيتابلارين آراسيندان چيخارتديق؛باييلميشدي. اوچ گون خسته خانانين تختي اوستونده اوزاناقلي قالدي. دوكتورلار ساغالماسيندان ال اوزسه لرده او سونوندا اوياندي. آنجاق ايكي تَهَر بير تَهَر اولموشدو. آذربايجانلي بايرام، فارسجانلي اولموشدو...
ائرته سي گون احوالاتي اوشاقلارا آنلاتديم. گولوشدولر؛ توالئته، ديل آكادئميسي آدي وئرديلر.بو اولايدان بئش-اون گون سونرا بؤلوگون(گروهانين) ياتاقخاناسي بؤيوك بير توققوشمانين آلاني اولدو. بايرام، فارس عسگرلري باشينا ييغاراق،"من متعصب دئييلم" دئيه باشلادي توركلره جوك دئمَگه. دورومدان اولدوقجا اؤفكه له نن آراز آدلي سولدوزلو عسگر، بايرامين اوستونه يومولوب آغزي-بورنونو بيربيرينه قاتدي. بو چكيش-بكيشده بؤلوك باشي(فرمانده گروهان) ايچري گيردي.اولانلاري اؤيرنينجه درحال سوچلولاري جزالانديردي: آراز اوچ گون دوستاقدا ياتمالي ايدي، بايرام ايسه اوچ گون تووالئتده كئشيك چكه جك ايدي. اؤز- اؤزومه دئديم:
- بو مانقورت بايرامين شانسينا باخ، تام ايسته ديگي يئره گؤزتچي اولدو!
آچيقلاما:
متن ده كي فارسجانلي سؤزو ، فارسوفيل سؤزجوگو قارشيليغي كيمي ايشله نيب دير. ( گئچميشده آنگلوفيل لريميز و روسوفيل لريميزده اولوب)
