اوروجلوق احوالاتي
اوروجلوق احوالاتي
يازان :دوكتور جئري
اوروج توتماق
پروفسورموللا نصرالدينه دئدی لر:
-" اوروج توتماق چتين دير توتانميريق".
پروفسور كئچي ساققاليني تومارلاياراق :
- " اورج توتماقدان راحات ايش يئنه اوروج توتماقدير " دئدي
- " نئجه ؟"
-" اورجلوقدان قاباق ات يئميرديز ايندي ده يئمه يه جكسينيز. اورجلوقدان قاباق يئر- يئميش يئميرديز ايندي ده يئمه يه جكسينيز. اورجلوقدان قاباق ...."
اوروج يئمك
بيري پروفسور موللانصرالدينه دئيير : " سيزين آجيغينيزا اوروجومو يئييرم! "
پروفسور اوجادان گوله رك : " سنين خبرين يوخدور سن اون ايكي آيي اورجسان" دئيير.
نئچه گون اوروج توتموسان؟
بیریندن سورشورلار : " نئچه گون اوروج توتموسان ؟"
- " خسته اولدوغوم اوچون یالنیز بیر گون توتا بیلدیم " دئییر.
عینی سورونو اورادا دوران پروفسور موللا نصرالدین دن سوروشونجا :
- " بو آرخاداش مندن بیر گون چوخ توتموش" دئيير.
اوروج اولمايانين جزاسي
پروفسور موللانصرالدينين قارداشي اوغلو اوروج ، اوروجونو يئميشدي. دئييشيك ساليب پروفسور موللانصرالديني توتموشدولار. يازيق،دگنگ آلتيندا نه قدر باغيريردي من اوروج دئييلم او قدر برك دؤيولوردو...
اوروج يوخسا ناماز
بيريندن سوروشورلار :
- " ناماز ياخشي دير يوخسا اوروج؟ "
- " اوروج ! "
- "ندن ؟ "
- " اوروجو يئمك اولار آمما نامازي يوخ "
روشوتخورون اوروج توتماسي
روشوتخور مامور اوروجو باطيل اولماسين دئيه افطاردان سونرا روشوت يئييردي.
اوروج نئجه باطيل اولار؟
دالدادا يئمك يئينده بيري اوستونوزه چيخا!
يارانه لر و اوروجلوق آيي
بيليرسينيز نييه مرداد آيي يارانه لري اوروجلوق آيي نين باشيندا اؤده ندي؟
دئييلنلره گؤره ، اوروج توتمايانلار گره ك ۶۰ فقير- يوخسولون قارنيني دويورسونلار. بو شرعي مسئله دوغرولتوسوندا دؤولت و مجليس يارانه لري اورجلوق آيي نين باشينا ساليب ۷۰ ميليون فقيرين قاريني دويورماقلا ، جانلاريني نئچه ايل اوروج توتماقدان قورتارديلار.
بيلديري
آتاميز اوروج اوروج اوغلو بللي اولمايان شخصلر طرفيندن توتولوب بو قونودا بيلگي لري اولانلار بيزي نيگرانچيلقيدان قورتاريب موشتولوق آلسينلار.
رامازان اوروج اوغلو
تانري مالي
مامور بيرينه :
-" اشي اوروجون نييه يئييرسن.." دئيير.
كيشي اؤفكه ايله قيشقيرير :
-" اولان سنه نه !! دده ن ماليني يئييرم ! يئتيم ماليني يئييريم! ميللتين ماليني يئييرم! دؤولتين ماليني يئييرم! من بيله رم بیرده تانريم . سيزه كيم دئييبدبدير تانري ايله قولون آراسينا گيره سيز!!....
بير نئچه بالالار سؤزو:
اوروجا اؤز وئرسه نيز گلن ايل اون گون تئز گله جك .
اوروجو سن توت يئمه سي مندن.
اوروج اولماسا محرمين قدريني كيمسه بيلمز.
سحر ، ناهار ، شام يئمه سي بس دئييل اوباشدانليغادا دورور.
اوروجو يوخسول الي ايله توتارلار.
اوروج يئين قورتولدو اوروج توتان توتولدو.
ائلده اوروج وارايدي، ناماز - مچيد واري ايدي ؛ ائلده اوروج قورتولدو، ناماز – مچيد قورتولدو.
اوروجلوق قورتاراندا مؤهور – تسبئحين ائله يئره قويا گلن ايل تاپا بيله سن.
كيمي لري اوروج توتورلار اورجولوقدان سونرا ميللت – دؤولتين ماليني يئمه يه يئر آچسينلار.
اوروجو دالدا يئ نامازي قاباقدا قيل.
بيري اوروج توتماق اوچون توزاق قورموشدو تورونا محرم دوشدو.
ایرانین یئنی پول بیریمی : قارا
يازان : دوكتور جئري
سوبسيدلرين هدفلي لنديرمه سيله باشلاديلان ايقتيصادي ايصلاحاتين اولوملو سونوجلاري اؤزونو گؤسترينجه ، دؤولت بو پروسه نين سون آشاماسينا كئچمكده دیر.
دوزلدي هر جور ياراغي
بير قالدي ساققال داراغي
توكانيني بانكايا دؤنوشدورن محله نين اسكي باققالي مشدي غضنفرين وئرديگي خبره گؤره دؤولت، کاغیذین باهالاشدیغینا گؤره ،اؤلكه نين پول بيريميني دييشديره جكدير. يئني بيريم حاققيندا چئشيدلي اؤنريلر ايره لي سورولمكده دير. فارس لار: پارسي ، تورك لر : تومن، عرب لر : دينار، لورلار : لوريك ،كورد لر : كورون و... بيريميني اؤلكه پولونا اويغون گؤرورلر.
يئني بيريمين اويغولاماسيندا اولان باشليجا سورون اؤنريلن بيريملرين بوتون ايران خالقلاريني تمثيل ائتمه مه سي دير. بو اوزدن ، سئچيلن بيريم ،بوتون خالقلارين آراسيندا كؤكلو و يئرلي اولماسي گركلي ليگي بللی دیر . بو دوغرولتودا بيز ايران تاريخ و كولتور قايناقلاريندا چوخلو آراشديرما آپارديقدان سونرا هامي نين بگنه جگي بير سويلو - كؤكلو سؤزه توش گلديك . پارا بيريمينه سئچيله جك بو اويغون آد " قارا " سؤزو دور. "قارا" ايندييه دك بير پول بيريمي اولاراق ايشلنمه سه ده مين لر ايلدير پول سؤزونون آيريلماز بير بؤلومو اولاراق بوتون ايران خالقلارينين ديلينده ايشلنمكده دير. اؤرنك اوچون :
مثللرده :
كيشي نين قارا پولونو دئييرلر.
قارا گون اوچون قارا پول ساخلا.
در اين دونياي درويشي قارا پول گؤره ر هر ايشي
قارا پول اولدوم.
قارا پولا دگمز.
شئعيرلرده :
ائي اولان حؤکمو روان، حاکيمه حؤرمت، قارا پول!
وئي قيلان پيري جاوان، بيکسه عيززت، قارا پول!
سن دئييلسنمي آچان جنّتي-علا قاپيسين؟!
سن دئييلسنمي وئرن ناريده زحمت، قارا پول؟!
سن دئييلسنمي اولان بعضينه لعنت سببي؟!
ائتديرن بعضينه گؤروندا دا رحمت، قارا پول!
سن دئييلسنمي مگر بانيي و-بئيتول-فاحيش؟!
سن دئييلسنمي وئرن قاتيله جورأت، قارا پول!
سن دئييلسنمي توتان عاجيزي-ميسگين اليني؟!
يوخلوغوندور او فقيره غم و-نيکبت، قارا پول!
حئيف سندن قارا پول، کيم جوهلا يولداشيسان.
عوقلالار هامي سنسيز چکو ذيللت، قارا پول!
من پول اولسايديم اگر سعي قيلارديم کي، مودام
عوقلالارلا قيليم اولفت و صؤحبت قارا پول!
سهوسن اهلي-کمال ايله اولوبسان دوشمن،
فاني دونيايه باخيب بير ائله عيبرت، قارا پول!
اولسان ار اهلي-هميتله مووافيق، همراه،
سندن آثار قالار علم ايله حيکمت، قارا پول!
ور گئديب اهلي-شقاوتله مووافيق اولاسان،
قالاجاقدير اثرين عئيني-مذللت، قارا پول!
راضييا بسدي مذمت ائله دين قارا پولو!
عورفالن کسيب...، ائتمز دخي اولفت قارا پول.
محمد امين رسول زاده
سؤزلرده :
خر پول : فارس ديلينده پوللو و زنگين يئرينه ايشله نيلن " خر پول " سؤزو " قارا پول " –ون فارسلاشميش فورماسي دير.
ندن ايران پولونا "قارا " بيريمي اويغون گلير؟
ايران پولونون قايناغي قارا نفت اولدوغو اوچون پولونون بيريمي ده قارا اولسا داها اويوملو اولاجاقدير.
"قارا"-نين آنلاملاريندان بيري دگرسيزدير. " قارا " بيريمي بيزيم اوچون ايكي باشلي قيلينج اولا بيلر. پولوموز دگري دولار- يورودان اسكيك اولسا كيمسه بيزي قينايا بيلمه يه جك ترسينه يوخاري اولسا دوشمانلاريميز روسواي اولاجاق...
"قارا " – نين بير باشقا آنلامي كيفير دير. بيلديگينيز كيمي ، اؤلكه ده چوخلاري پوللاريني قارا يوللارلا اؤرنگين : قاچاقچيلق ، اوغورلوق و... اله گتيريرلر. بو پوللارا قارا پول دئييلير. بو پوللاري يئني دن دؤره يه سالماق اوچون آغارتماق گره كدير. " قارا " بيريميني سئچمكله پول آغارتماغا گره ك قالماياجاق چونكو پوللارين هاميسي " قارا " اولدوغوندان بو " قارا پوللار" اونلارين آراسيندا ايتيب بو آغير گؤره و بو عزيزلرين اوزه ريندن گؤتورله جك دير.
" قارا " نين آيري آنلامي ترياك دير. " قارا " بيريمني سئچمكله "قارا" يا دوشمه گين قارشيسي آلينا بيلر چون مومكوندور قارايادوشنلر " قارا" – ني "قارا " ايله دييشمكدن يورولوب قارادان ال چكه لر .
گولمه جه :
مؤحتاد : " قارا " اولاندا " قارا " اله دوشمور " قارا" اولاندا دا " قارا ".
"قارا " ، ائلجه ده چوخ ، بؤيوك و زنگين دئمكدير. " قارا " بيريميني سئچمكله ، يوخاريدا دئديگيميز كيمي خالقيميزين هاميسي " قارا پول" لو و يا فارسلار دئميشلي "خرپول "اولوب يوخسوللوغون داشيني بير يوللوق آتاجاقلار.
" قارا " ايله گؤزلرينيز آيدين اولانادك خوشجا قالين
