بایراملیق
بایراملیق
جيزما-قاراچي : دوكتور جئري
بايرام گلير ياز گلير
گئدير چوخدور آز گلير
فيشلر ائوده قالانيب
برق گئتمه ميش گاز گلير.
بايرام گلير ياز گلير
نغمه گلير ساز گلير
من تئلليني گؤزلورم
كئچل گئدير داز گلير.
قووالادي ياز قيشي
بیتدی سویوق قار ايشي
گؤردوك بيزده بايرامي
اوزو قارا گاز فيشي
بايرام گلير عار گلير
سازلار سوسور تار گلير
ايمداد دونو گئنديرسه
دونيا منه دار گلير
بایرام گلیر یالاندی
بورج بوغازا دایاندی
آلدیغیم یئر- یئمیشلر
اوچ ساییدا تالاندی
تدبیرلی اولاجاغام
بیر چانتا آلاجاغام
مشه بایرام گلمه دن
مشده قاچاجاغام
ياشي گؤزدن ساچام من
دردي كيمه آچام من
بو بايرامين اليندن
هارالارا قاچام من
یاز گلدی گؤروشه ليم
دردلري بؤلوشه ليم
توركون ديلي كسيليب
گل يالنيز اؤپوشه ليم
ايتلر و قوردلار..
ايتلر و قوردلار..
يازان : دوكتور جئري
آغ ايت ، قارا ايت ، ايكيسي بير ايت
بو گونلر ايتلر چوخ هورورلر. ايت هورَر كروان كئچر آنجاق دينمه سن ده قوردون آغزيني باغلاييبلار دئيرلر. بو اوزدن سوسماق ايت اؤلوسو كيمي آغيرگلير هردن آداما .
بو گونلر ايتلر چوخ هورورلر . آرديندا يوز ايت هورمه ين قورد ، قورد ساييلماز . چوخ هورن ايتدن ده قاپان چيخماز .اونوتما؛ ايتين سسيني ائشيتدين داشي گؤتور. ايت ايله بير چووالا گيرمه ؛ دوست اولما ، اولساندا چوماغي يئره قويما. بيل : ايت ايله ياتان بيت ايله اويانار . ايته اوز وئرسن گئديب اوتاغين باشيندا اوتورار ، آخماقلاري ايسه باغلاوادان پاي اومار.
بو گونلر ايتلر چوخ هورورلر. ندن؟ ندنيني قايالاردان سوروشماق گره ك. قايالار ايتلره كؤلگه اولماقدان قوردلارا يورد اولوبلار. ايتلرين كولگه سي آرتيق پيشيكدن ده اوفاجيق گؤرونور. يازيق ايتلر قايا كؤلگه سينده ياتميشديلار ائله سانيرديلار اؤز كولگه لري دير.
بو گونلر ايتلر چوخ هورورلر . ایتلر، غريب ايتلر كيمي قويروقلاريني پاچالارينا سوخوب قارغيش ائديرلر قوردلاري. قورخمايين؛ ايتين دوعاسي قبول اولسايدي يئددي گؤيدن سوموك ياغاردي.
بو گونلر ايتلر چوخ هورورلر. ايت ايتله گزه ر . ايت اولويار ايتي بولار آمما غريبه بير دورومدور بعضي ايتلر گزمگه قورد آختاريرلار.
بو گونلر ايتلر چوخ هورورلر. بو هورشمه لرين سونو نه اولاجاق :
دوروم:۱
آغ ايت ايله قارا ايت بوغوشور. قورد آراچيليق ائتدير. ايتلر باريشيب قوردو بوغورلار.
دوروم: ۲
آغ ايت ايله قارا ايت بوغوشور. قورد، آغ ايته قوشولور. قارا ايت بوغولور. آغ ايتلر ييغيشيب قوردو بوغاراق بايرام ائديرلر.
دوروم : ۳
آغ ايت ايله قارا ايت بوغوشور. قورد، قارا ايته قوشولور. آغ ايت بوغولور. قارا ايتلر ييغيشيب قوردو بوغاراق بايرام ائديرلر.
دوروم : ۴
آغ ايت ايله قارا ايت بوغوشور. قورد ، ايتي ايته بوغدورارلار دئيه دوشونور. ايتلر بوغولورلار. قورد آيا باخيب اولايير.
دوروم : ۵
آغ ايت ايله قارا ايت بوغوشورلار. قورد باخير . يورغون دوشموش يئنه ني نئجه بوغاجاغيني دوشونور.
دوروم : ۶
آغ ايت ايله قارا ايت بوغوشورلار. قورد باخير. ايتلر بير آن بوغوشماغي كسيرلر. قوردا يومولورلار. قورد قاچير. اورمانا گيرن يئرده ايتلر بوسقودا ياتان قوردلارين چنبرينه دوشورلر.
دوروم : ۷
آغ ايت ايله قارا ايت بوغوشمورلار . آغ ايت ايله قارا ايت كندده زينجيره چكليميشلر. قورد اورماندا اؤزگورجه سينه گزير.
دئمقيراسي
دئمقيراسي
یازان : دوكتور جئري
آچار سؤزلر : قيرا ،دئمقيراسي ،سولو قيراسي ، ديكتاتور
يازيميزا گئچمدن اؤنجه سايقيلي اوخوجولار قيفيللاماسينلار دئيه آچار سؤزلري بير آزجيق آچيريق.
قيرا : قارپيزگيللردندير ، قووونون اوگئي باجي اوغلوسو ساییلیر.
دئمقيراسي : دئمده اكيلن قيرايا دئييلير. دئمقيراسي چوخ شيرين اولوب اكمه سينده هئچ قايدا - قانون يوخدور و اؤزباشينا يئتيشر .
سولو قيراسي : سولو يئرلرده قايدا- قانونلا و مكانيزه اولاراق اكيليب كيميوي كودلار گوجونه يئتيش قيرادير. بو قيرا سولو اولار آنجاق شيرين اولماز.
ديكتاتور( ديكده +اوتور ) : ديك ده اوتوران ، باشدا اوتوران دئمكدير .
گيريش :
آرتيق، دئمقيراسي ائپيدئميسي دونياني بورويوب. بو اوزدن يازيميزدا دئمقيراسينا ، آسيب شوناسليق باخيميندان يانشاماق ايسته ييريك.
ديكتاتور كيمدير ؟
ديكتاتورلوق نه دئمكدير؟
ديكتاتور ديكده اؤتورمادان اؤنجه ، دئمقيراسيچي دير. خالقين دئمقيراسيني نه قدر سئوديگيني بيلير. خالقين آغيزي دئمقيراسينا يئتيشسين دئيه ووروشور. كولانلاردا ياتير ، بوستانچيلاردان يامان - يوووزو ائشيدير. اؤز سوروسوندن ياغيش تانريجاسينا قوربانلار كسيب يالوارير . دئمقيراسيچي ايللر بويو موباريزه دن سونرا بير شئيي باشا دوشور :خالقين يارديمي اولمادان بير خيرچا بئله يئتيشديره بيلمه يه جكدير . خالق دئمقيراسي ايسته ييرسه پوشتك قوروب اونو ديكه چيخارتمالي دير دئيه باشلايير خالقي ايقناع ائتمگه .دئمقيراسي شيرين دير. خالق دئمقيراسيني سئوير ، ايسته يير . بئله ليكله خالق دئمقيراسيچيني ديكه چيخاردير. دئمقيراسيچي ديكده اوتورور . ديكتاتور اولور. ديكده ، كيمسه نين گؤره بيلمه ديگي يئني گؤرونتولر سرگي له نير ديكتاتورون گؤزلري نين اؤنونه. دئمقيراسينا يئني بير آچيدان باخماغي باشارير. ديكتاتور ديكده دئيير : " قيراسئور خالقيم! هئچ بيليردينيزمي سولو قيراسي ، دئمقيراسيندان ياخشي دير؟"
بو تومجه ديكتاتورلوغون باشلانيش نوقطه سي دير و سولوقيراني زور ايله خالقين بوغازينا سوخماغا ديكتاتورلوق دئييلير.
دئمقيراسي نئجه قورونا بيلر؟
خالقلار، دیکده اوتوراني ديكه چيخارمادان اؤنجه قوللاريني ايپ ايله مؤحكم باغلامالي ؛ (بعضي خالقلار ديكده اوتورانين آياغيني باغلاييرلار آنجاق طرف ديكه چيخينجا اللري ايله آياغي نين ايپيني تئز آچير) هرزامان آغيزيندان سولو قيرا لافي چيخسا ايپي چكيب اونو كله - ماياللاق آشاغييا سالمالي ديرلار.
ديكتاتور دئمقيراسيچي اولابيلرمي؟
ديكتاتور ، ديكه چيخينجا سولوقيراسيچي اولور. ياني هرنه وار ديكين باشيندادير و ديكتاتورلار ديكدن ائنديريلينجه يئني دن دئمقيراسيچي كيمليكلرينه قاووشموش اولورلار. تاريخده يوزلر اؤرنك سايا بيلريك . اؤرنگين : اعلاحضرت پالاني و...
البته بعضي ديكتاتورلاردا وار ، سولو قيراسيني بوياييب دئمقيراسي يئرينه خالقلارين خوردونا وئريرلر. خالقلار آزاجيق ديققتله دئمقيراسيني ، سولو قيراسيندان آييرد ائده بيلرلر.
ندن ديكتاتورلار دونيادا اولان دئمقيراسي حركتلريني قيل قولاي اولاندا سؤزده دستكله ييرلر؟
حيكايه دئيير :
خالق ، " توتون ! توتون ! " دئيه بير اوغرونو قووالاييرديلار. قاباقدا قاچان زيرنگ اوغرو ، قارشيدان گلنلري آلداتماق اوچون مالي چالينمشلاردان بتر باغيريردي: " قويمايين قاچدي ! توتون ! تو....."
بير قولتوقدا نئچه قيرا يئرله شر؟
بير قولتوقدا بير قيرا يئرله شر . ايستر دئمقيراسي اولسون ايستر سولو..
دونيادا باشلانان دئمقيراسي حركتلري اولوملو بير سونوجا واراجاق مي؟
خالقلار و ميللتلر ايپ و قولتوق قونوسونا اؤزن گؤسترسه لر كسينليكله سئودالارينا قووشاجاقلار .
سون
ديل و ديش گونو
۲۱ فئورال دونياليق آناديلي گونو قوتلو اولسون
ديل و ديش گونو
يازان : دوكتور جئري
۲۱ فئورال ،دونياليق آناديلي گونودور. ۱۹۹۹ اينجي ايلدن بري بوتون دونيا ميللت لري ايله بيرگه بيزيم اؤلكه ده ده بو گون زوپا - دگنك ائشليگينده قوتلانماقدادير. ديلين اؤنمي هر كيمسه يه بللي دير . من بو دوغرولتودا موباريزه آپاران بوتون چاليشقانلاريميزين اللريني بير- بير سيخيب باشلاري نين ياشيل قالماسيني اولو تانري دان ديله ييرم. آنجاق چاليشقان قارداشلار ! منجه بو موباريزه ده تكجه ديله يوخ ، ديشه ده ديققت يئتيرمه لي سينيز. بيزيم ايراندا تكجه ديليميز يوخ بلكه ديشلريميزده آرادان گئتمكده دير. شاشيرمايين! بير آزآجيق دؤزسه نيز قونونو بير دوكتور اولاراق بيليمسل آچيدان آچيقلاياجاغام. بيلديگينيز كيمي مملكندين ايرسمي ديلي فارسجا دير و يئنه بيلديگينيز كيمي ده " فارسي شكر است " . ياني فارسي شكر دير ؛ ياني فارسي شيرين دير ، ياني فارسي شربت دير بالدير ...
بيليم آداملاريني آراشديرديقلارينا گؤره شيرينين ديشه ضرري اولوب ديشين چورومه سينه ندن اولار. بو گون فارس ديلي نين شرينليگيندن ديلداشلاريميزين ديشلري قورخونج بير بيچيمده چورومكده دير. تاسفله بو اولاي گؤزلردن يايينميش كيمسه بونون فرقينده دئييل. بو گئديشين قاباغي آلماق اوچون، چاليشقانلار، ديلداشلاري فارسجا قونوشدوقدان سونرا و يا فارسجا كيتاب اوخدوقدان سونرا ديشلريني توركجه ايله ميسواك وورمالاري قونوسوندان اويارمالي ديرلار. باري ديل گئدسه ده ديشلر يئرينده قالسين...
جئري نيوز خبر آژانسي مملكندده گزه رك ديل و ديش و بو گون حاقدا بير گؤرسل راپورت حاضيرلاييب . بيرليكده باخاليم:
شاهنامه فردوسي ناققالي نين ديشلري
بسي رنج بردم در اين سال سي
نه ديشلر ايتيرديم بدين پارسي
فارسجا گوگول
بير شوونيست : مزدور اجنبي! چرا دروغ مي گي؟
فرهنگستان فارسي ايشچيسي
آرخالوقلار (باستان شوناسلار) هخامنيشي تمدونون ايزلريني آختاريرلار
اصيل ايران پيشيگي و مسواك سورونو
بابا ! ماما! ديشلريمه يازيغينيز گلسين
كلاس سيز فارسي بيلمه ين كندلي قيزي
من ديشلريمي چوخ سئويرم ، ائشيديرسنمي ؟
من ديشلريمي چوخ سئويرم ، ائشيديرسنمي ؟
من ديشلريمي چوخ سئويرم ، ائشيديرسنمي ؟
ايرانين ۱۳۹۰ مودئل ماشين لاري
جئري نيوز :
ياخيتين باهالاشماسي و ايران ماشين اوزمانلاري نين اؤنرديكلري يئني ماشين مودئللري:
پیشیکان
پرآت
اؤكوزلي
ائششپورت
ايران ماشين اوزماني و يئني طرحي
آيي دوستلوغو
آيي دوستلوغو
يازان : دوكتور جئري
بوش توفنگ ايله وورولسون
قوروموش اورمو گؤلونده بوغولسون
جانسيز قارقالار گؤزونو اؤيسون
قازيلماميش قويويا دوشسون
ياپيلماميش چؤرك قنيمي اولسون
كؤرپو آلتيندا قاليب ماشينلار اوستونوندن كئچسين...
كيمسه دئسه ائلئشديري (تنقيد) پيس بير ايشدير.
آنجاق! بوردا بير آنجاق وار ، آنجاق
ائلئشديرمن يولداشلار! آنتي ادبياتچي داداشلار ! آنتي آنتي ادبياتچي قارداشلار و من كيمي هير ايله پيري آييرد ائتمه ين كول باشلار!!
ديقتللي اولمالي ييق! چوخ ديققتلي اولمالي ييق قاشي آلان يئرده ووروب گلينين گؤزونو چيخارتماياق. ادبياتيميزي چوخ سئويديگينيزدن آيي كيمي داورانماياق . آيي دئديم . آيلار اؤلكه سي روسيا ياديما دوشدو . بيلميرم بيليرسينيز يا يوخ، آيي روسيانين سيمگه سي دير. دئييرلر اسكي زامانلاردا روسيادا ، لئنين و استالين گورباگوراوف آدلا ايكي آيي ياشاييردي. بو آييلار، آييسال ايلكه لر اوزه رينده بير آيي ليق اولوشدورموشدولار آدي اس.اس .ري . بو آييلار اؤز يوردلاري نين آداملاري ايله ياناشي باشقا اؤلكه لرين آداملاريني دا چوخ سئورميشلر ؛اؤيله كي سئوديكلريندن آداملارين اؤزه رينه ميلچك قوندورمازديلار عيني سيمگه لري آيي يولداش كيمي . بو آييلار و تؤرمه لري ۷۰ ايل اس. اس. ري ده آييليق ائده رك ميليونلار اينسانين ميلچكلريني قووماغي باشارميشديلار. اس. اس. ري آييليغي بيلينن و بيلنمه ين ندنلره گؤره سونوندا شيش خسته ليگينه توتولوب ۱۹۹۱ نجي ايلده پارت دئيه پارتلاميشدي.
سؤز حيلووسوز چيلپاق آتي كيمي هارادان باشلادي هارالارا چاپدي؟ سانيرام آيي نين فايدالارينا گؤره دانيشيريديق. هه ! آيي چوخ فايدالي و سئويملي بير حئيوان دير. آييلار بالي چوخ سئورلر اؤزلليكله نوبئل دادي وئرن بالي. آيي دوستلوغو دونيادا مثل دير. آيي...
يازيميز بيتمك اوزه ره دير و ايشده سونوج آلماق سوره سي گليب چاتميش كيمي گؤرونور.
جيزما- قارانين سونوجو:
آييق اولمالي ييق چوخ سئوديگيميزدن آيي كيمي داورانمایاق آيي فايدالي حئيوان اولسا بئله...
من دیلنچی دئییلم!
من دیلنچی دئییلم!
یازان : دوکتور جئری
من ديلنچي دئييلم ، اوشاغيم خسته خانادادير ، پولوم يوخدو چيخاردام ،اولسا منه يارديم ائده سه نيز.
من ديلنچي دئييلم، پولوم قورتولوب يولدا قالميشام ، اولسا منه...
من ديلنچي دئييلم، آيليغيم دالييا دوشوب ، كيرايه ني وئرمه سم ائو يئيه سي اثاثلاريمي ائشیگه تؤكه جك ، اولسا منه ...
من ديلنچي دئييلم، خسته يم داوا آلماغا پولو قالماييب، اولسا منه...
من ديلنچي دئييلم، برقي كسيبلر اوشاقلاريم قارانليقدا قاليب اولسا منه...
من ديلنچي دئييلم، قيزمين بيلم يوردو شهريه سي دالي دوشوب اونو ائشيگه اؤتورورلر اولسا منه...
من ديلنچي دئييلم، ائوه ياوان چؤرك آلاجاق ايديم پولوم آزدي اولسا منه...
من ديلنچي دئييلم، شئعير كيتابيم باسين ائوينده قاليب چيخاردانميرام اولسا منه...
من ديلنچي دئييلم، ايشيمدن اؤتورولموشم اولسا منه...
من ديلنچي دئييلم پولوم يوخدو آرواد ائوه قويمور اولسا منه...
من ديلنچي دئييلم....
- اشي سنه نه اولوب بئله اؤز- اؤزونه اويودورسن . گؤرن دئير آللاه ائله مه ميش آغيليني قاچيرميسان...
دوكتور جئري گؤزلوگونو بورنون اوستونه ائنديريب اوستوندن گؤزلريني تيكدي گؤزومه . بيردن قاش – قاباغي آچيلدي :
- اولان موللانصرالدين كيشي سنسن ! سني گؤيده آختاريرديم يئرده تاپديم. اشي سن هارالارداسان ؟ يوخسان!!...داریخمیشدیم سنه ..
- واللاه اوغلوم بير گئجه ده ميليونئر اولوب. گئتميشديم اونو گؤروم.
- اولمايا بانك – مانكدان پول-پله بيله سينه چيخيب ، چوخ شوكور ! چوخ شوكور ! دئمك سيزده يوخسوللوغون داشيني آتدينيز هه ...
- يوخ اشي ! اوغلومون خانيمي اوچوز (3 قلو) دوغوب.
دوكتورون گؤزلري آز قالدي ائشيگه پيرتلايا . شاشقينليقلا سوروشدو:
- بونون نه دخلي وار ميليونئر اولماغا؟
گولمسه يرك ائكله ديم :
- چوخدا دخلي وار! دؤولت هر كؤرپه نين حئسابينا اون ميليون ريال پول ياتيردير. سگگيزيوزسكسن مين ريالدا چؤرك و سوبسيد پولو وئرير.بونلاري توپلاييب اوچه چارپسان ائله ير: اوتوزايكي ميليون آلتميش دؤرد مين ريال. هله بو پول گونو گوندن دوغوب چوخالاجاق بئله.
دوكتور گولدو. باياقكي دئينگن آدام دئييلدي سانكي.
- باياق اؤز- اؤزن نه آچيب قوشوردون – دئيه سوروشدوم.
دوكتور منديله گؤزلوگونون آلتيندان گؤزلري نين ياشيني سيله - سیله ميزيلدادي:
- موللا قارداش ! آدام آياغيني ائودن ائشيگه قويا بيلمير. آدديم باشي تانيماديق آداملار ، آدامين قاباغيني كسيب " من ديلنچي دئييلم .." دئيه آدامدان پول ایسته ییرلر. وئريرسن اولمور ؛ وئرميرسن هئچ اولمور! آدام لاپ بئله معطل قالير بو ايشه . شهريميزه ديلنچي سيز شهر دئييرلر بيلميرم بلكه بو اوزدندير . بو دوروملا سونوموز هارا چاتاجاق يئنه بيلميرم. آللاه هامييا سنين اوغلون كيمي بير قاپي آچسين...
بؤركومو قاشيمين اوستونه يئنديريب باشيمي قاشيياراق سوروشدوم( ديليم لال اولايدي سوروشمايايديم ):
- چوخداندير يوخسان ، هارالارادا گزيرسن دوكتور! اولمايا اؤزون دئميشلي ائودن ائشيگه چيخميرسان؟!
- هه موللا ! دوغرو دئييرسن، ائودن ائشيگه چيخميرام. نئچه واختدير بازار كاساد اولوب مطب ايشله مير. مطبه خسته دن چوخ بورجلو گلير. بير آيدير تئلفونومو كسيبلر اينتئرنتده گئده بيلميرم . بوگون ، بيريندن بورج آلیب تئلفونومو آچديريم دئيه ائشيگه چيخديم شانسدان سنين گول اؤزونله گؤزلريم ايشيقلاندي. اولسا منه بئش- اون تومن بورج وئر. بيليرسن من ديلنچي – ميلنچي دئييلم . سنين پولونو بئش – اون گونون ایچینده قايتارارام .
اليمله آلنيمين تريني سيليب گؤزلريمي يئره تيكه رك:
- دوكتور بئي دوزونو ايسته سن من اؤزوم ديله نيرم . ائششگيمين آرپا- ساماني قورتولوب آجيندان اؤلمك اؤزه ره دير. سنين يانينادا پول آلماق اوچون گلمیشدیم آنجاق بللي اولان سن ديلنچي اولمايا – اولمايا مندن بتر ديلنچي سن.- دئيه دوكتوردان اوزاقلاشديم.
ميرجعفر باغيروو علي آغا واحيدي نييه سرخوش آدلانديريب؟
ميرجعفر باغيروو علي آغا واحيدي نييه سرخوش آدلانديريب؟
آذربايجاندا ايلک کيتابخانا – موزه دن رئپورتاژ
بورا علي آغا واحيد آدينا کيتابخانا – موزه دير. آذربايجاندا واحيد کيتابخانا- موزه....بلکه، بعضيلري نين هله ده خبردار اولماديغي بير مکان..... کيتابخانا – موزه نين تاريخچه سي اوللر قيرميزي اوکتيابر آدلانديريلان بو کيتابخانا-موزه يه 1993-جو ايلدن علي آغا واحيدين آدي وئريليب. علي آغا واحيد آدينا کيتابخانا – موزه نين رهبري صداقت سئييدزاده دئيير کي، بورا اوللر يالنيز کيتابخانا کيمي فعاليت گؤستريب: - کيتابخانا کوللئکتيوي 1993- جو ايلده مدنيت ناظيرليگينه موراجيعت ائتدي کي، کيتابخانايا واحيدين آدي وئريلسين. 1995- جي ايلده ايسه واحيدين 100 ايلليک يوبيلئيي کئچيريلدي. او عرفه ده مسله قالديرديم کي، اگر واحيد آدينا موزه ياراديلاجاقسا، کيتابخانين بير اوتاغي بونون اوچون آيريلسين. چونکي، او زامان واحيدين ياشاديغي ائو آرتيق سؤکولموشدو. تکليف بيَنيلدي و 1995- جي ايلدن بورا کيتابخانا-موزه آدلانديريلدي. آنجاق نه اولسون؟! موزه هله تام ياراديلماييب. کيتابخانا – موزه نين رهبري صداقت سئييدزاده بيلديرير کي، وسايط آيريلماسي اوچون مدنيت و توريزم ناظيرليگينه موراجيعت ائديبلر: - هامي نين بو مسله باره ده خبري وار. بيزه يئنه ده گؤزله مک قالير. هر ايشده چتينليکلر اولور. هر حالدا يئنه ده نه ايسه يارادا بيلميشيک. موزه ايله باغلي ماراقلي لاييحه ميز وار. واحيدين ياشاديغي آب وهاواني بوردا ياراتماق ايسته ييريک. صداقت سئييدزاده اونو دا قئيد ائتدي کي، واحيده مخصوص اشيالارين چوخو عاييله سي طرفيندن نيظامي موزه سينه وئريلديگيندن، اونلاري يئنيدن الده ائتمک چتيندير.
علي آغا واحيدين حياتي اوغلو راميز ايسگندرووون ديلي ايله:
- علي آغا محمدقولو اوغلو ايسگندروو (علي آغا واحيد) 1894- جو ايلده فئورالين 18-ده باکيدا دوغولوب. 1965 -جي ايلده وفات ائديب. 20 ياشيندان قزللر يازماغا باشلاييب. 1916- جي ايلده " تاماهين نتيجه سي " آدلي ايلک کيتابي ايشيق اوزو گؤروب. " موللا نصرالدين " ، " کيرپي " ژورناللاريندا ساتيريک شعئيرلري چاپ ائديليب. عوموميتله ساغليغيندا 13 کيتابي ايشيق اوزو گؤروب. واحيد تيجارتله ده مشغول اولوب.1919 -جو ايلده مشهده گئدير. هم زيارت، هم تيجارت. اورادان بؤيوک عميسي حاجي آبباسقولو ايله ايران خاليلاري گتيريب، باکيدا ساتارلارميش. او دؤورون اينسانلاري دا واحيدين ياراديجيليغيني ديرلنديريبلر.1922 جي ايلده م.ه.صابيرين يوبيلئيي اولاندا آتام ياريم ساعات مئيخانا دئييب. بو، نريمان نريمانووون ديقتيني چکيب. او زامان ايلک دفعه دؤولت موکافاتي واحيده وئريليب. 1943- جو ايلده امكدار اينجه صنعت خاديمي آدينا لاييق گؤرولوب.
واحيد رئپرئسسييادان نئجه قورتولدو؟
اوغلو راميز ايسگندروو: - علي آغا واحيد ايچکي ايچن دئييلدي. آنجاق رئپرئسسييايا گؤره اؤزونو ايچکي ايچن کيمي گؤستريردي کي، اونا توخونماسينلار. بير گون ميرجعفر باغيرووا رئپرئسيا ايله باغلي بير سيياهي وئريبلر. آتامين دا آدي اوردا اولوب. ميرجعفر باغيروو آتامين آدي نين اوستوندن خط چکيب کي، بوتون گونو سرخوش اولان آدامدي. اوندان بيزه نه زييان گله جک. واحيد بير موددت ياخشي شراييطده ياشاماييب. حتّی، بونولا باغلي ميرجعفر باغيرووا شئعير ده يازيب. سونرالار باغيروو واحيدي يانينا چاغيرتديريب، اونا 1951-جي ايلده 2 اوتاقلي منزيل وئريب. واحيدين باغيرووا يازديغي شئعير:
ائويمي گؤرسه ناخيرچي، دئير، سامانليقدير،
هاواسي يوخ، همي نمدير، همي قارانليقدير.
ديواردا آغجاقانادلار، يئر اوسته تاختابيتي،
هوجوما باخ گئجه لر، گؤر نه حؤکمرانليقدير.
هونردير آي ياريم هر کيم بو ائوده عؤمر ائلسه،
اينانمارام ديريله، شوبهه سيز، اويانليقدير.
چوخ عريضه يوللاميشام باکسووئته، رايسووئته،
گؤزله مکدير ايشيم، مسله دومانليقدير.
دوزلتسه نيز سيز اگر، رهبريم، منه بير اوتاق،
يوز ايل تشککوره لاييق، بو، داستانليقدير.
واحيدي مست ائدن روس قيزي
52. ياشيندا علي آغا واحيد آناملا تانيش اولور. آنام آتامدان 25 ياش کيچيک اولوب. بونا باخماياراق اونلار، 1948- جي ايلده ائوله نيرلر. آنجاق ديني کبينلري اولور. آتام آنامدان دؤولت کبيني کسديرمگي ايسته ييب. آنجاق آنام دئييرميش کي، من جاوانا اره گئده جم. عاييله ده ايکي اوشاق اولموشوق -باجيم و من. هله بونونلا باغلي آتامين بير شئعيري ده وار:
تانريم منه وئردي بير اوغول، بير قيز
قيزيم فيرنگيزدير، اوغلوم راميز.
واحيد پولينا آدلي باشقا بير روس قيزي ايله ده ائولي اولوب. او، آتامين پالتاريوياني اولوب. بير گون آتامي مست ائيله ييب، دؤولت کبيني کسديريب. اونو دا دئييم کي، واحيد گؤزلليک، سئوگي شاعيريدير. او، هميشه قوبئرناتور باغيندا (اينديکي فيلارمونييا باغي) گزنده الينده يا قيزيلگول، يا دا نووروزگولو اولارميش. قيزلگول گؤزلليک، نووروزگولو اينجه ليک رمزيدير. يقين کي، واحيد ده او گؤزلليگي، اينجه ليگي خانيملارا بنزه ديرميش.
کؤنلوم نئجه سنسيز، گؤزه ليم، ناله سيز اولسون،
بولبول دايانارمي گولونه حسرت اولاندا؟
علي آغا واحيد خالق شاعيري اولماسا دا خالقين شاعيريدير. آللاهين آذربايجان خالقينا وئرديگي بخشيشدير.
گؤزل حياتيني، واحيد، فنايه صرف ائتمه،
سني زمانه يئتيرمز دوباره، بير دنه سن.
چئویری : جئری نیوز
ائلئشديري اوملئتی
ائلئشديري اوملئتی
يازان : دوكتور جئري
بير جوجه باققاللا گئديب بير دنه يومورتا ايسته يير. باققال شاشقينليقلا – " ياووروم ، يورمورتا آلماق يئرينه، آنانيزا دئييردينيز بيردنه يورمورتلاياردي " – دئيير.
جوجه گؤزلريني سوزدوره رك جوگگولده يير:
- " آنام دئيير كي، آدام (!) يوز تومنليك يورمورتانين اوستونده اؤزونو ييرتماز ".
ايندي حيكايه ، يازارلار ايله ائلئشديرمنلرين( تنقيدچي) حيكايه سي دير. كيمي لري : " ائلئشديرمنلر قيسير تويوقدورلار ؛ يومورتلامازلار آنجاق يومورتادان ياخشي ، ياغ يورمورتا، شور يومورتا، ايليق يورمورتا، قايقاناق و سايره پيشيره بيلرلر" و كيمي لري ايسه :" يوخ ، ائلئشديرمنلر آناش تويوغا بنزه ييرلر؛ يومورتلايا بيلرلر آنجاق يومورتانين اوجوز اولدوغونا گؤره اؤزلريني زورا باسميرلار. " دئييرلر. آنجاق ايندي بيزيم سورونوموز " يومورتالاماق يا يومورتالاماماق " دئييل؛ سورون يورمورتاني نئجه پيشيرمكدير. ائلئشديرمنلر يومورتالاماق يئرينه فالاني ايچسه لرده نوشوجانلاري اولسون آمما باشقالاري نين يومورتاسيني پيشيرنده ديققتلي اولوب آدامين زهله سيني "هرنه يومورتا وار" دان آپارماسينلار. ائلئشديرمنلر، يومورتاني دويونله ييب سؤز دئينده گره ك ائلئشديري نين قوشوللاريني گؤزدن قاچيرماسينلار. قوشوللارين باشليجاسي بونلاردير:
1- كند و شهر يومورتاسي آراسيندا فرق قويماسينلار. بيرينه يومورتان ايكي ساريلي دير ديگرينه ايسه يومورتانين ساريسي يوخدور دئمه سينلر.
2- يومورتادان يون قيرخماسينلار.
3- يومورتايا قولپ قويماسينلار.
4- يومورتانين ترسه گلمه سينه ندن اولماسينلار.
5- يورمورتا بوياماسينلار.
6- يومورتا اويونو چيخارتماسينلار.
7- يازار ايله يومورتا دؤيوشدورمه سينلر.
8- فالا اولماسا يومورتا اولماز سؤزونو اونوتماسينلار.
9- بير آز يورمورتا يوكو داشسينلار.
ائلئشديرمنلريميز بو ساده قوراللارا اويماقلا باشلاريني لاخ يومورتا تولازلايانلاردان قورويا بيلرلر يوخسا باشلارينا " چرچي ايله كيشي " – نين حيكايه سي ده گله بيلر:
گتيرمزليكدن بيركيشي نين آياغي ايليشيب چرچي نين يومورتالاريني سينديرير. چرچي كيشي نين ياخاسيندان توتوب يومورتالارينين پولونو ايسته يير. كيشي پولونون اولماديغيني سؤيله يينجه چرچي اؤفكه ايله قيشقيراراق :
- " اوندا ايسه منيم يومورتالاريمي يومورتلامالي سان! يوخسا ووراجاغام اؤلون يئرده قالا " - دئيير.
يئركؤكو بايرامي
يئركؤكو بايرامي
بوگون بازار ، ۲۸ آذر ، بارسلان ايلي؛ آغزيميز يئركويويه يئتيشدي.
بو گون گول ، بولبول آدي ايله تانينان اؤلكه ميزده ، سياست دئنكلملري (معادله لري) بير بيرينه دگيب ايلك كز اولاراق دونيادا آغيزلار يئركؤكويه يئتيشدي. بوندان بئله اؤلكه ميزه گول،بولبول و يئركؤكو اؤلكه سي دئمه لي ييك . هووورااااااااااااااا.......
يوز ايللر سونراسي يئر كؤكو ايله گؤروشمك
يئر كؤكويه سالام.....
يئركؤكو سئوينجي....
يورولوكدن چيخان يئركؤكو سياستيندن اوچ گؤرونتو ....
يئركؤكو بايرامي بوتون يئركؤكو گؤرمه ميشلره قوتلو اولسون
آغلاما!
آغلاما!
يازان :دوكتور جئري
محرمليك آيي دير و آغلاما بازاري چوخ قيزغين.كيمي نين اورگي آغلايير، كيمي نين سؤزو ، كيمي نين ايسه گؤزو. آغلاماق ياشامين آيريلماز بير كسيمي دير. اينسانين اولومو آغلاماقلا باشلاييب اؤلومو ايسه آغلاماقلا بيتير. اولوملا اؤلومون آراسي يئنه دولودور آغلامالار ايله. بيري ممه اوچون آغلايير، بيري ديش ، بيري ديل، بيري ... بيريده حسين (ع) اوچون آغلايير. كيمي نين بير گؤزو آغلاياندا اوبيري گؤزو گولور ، كيمي نين ايسه گؤزلري آغلاياندا بيغي گولور. آتالاريميز " اؤلويه آغلامازلار، ديريه آغلايارلار " دئيبلر آنجاق بيزيم ان بَتر آغلامالاريميز اؤلولر اوچوندور . دئييرلر اؤلو اؤلنده شئيطان نم هاراسينا بير بارماق بال ياخار بلكه بو اوزدندير. آغلاماغين اؤزونه اؤزگو قوراللاري وار. " آغلاماغين باجارمايان اؤلوسونو تون به تون سالار" دئميشلر يئنه آتالاريميز. آِغلاملارین بير بؤلومو ايچدن گلیر یعنی ذاتی دیر.اؤرنك اوچون: كؤرپه نين ممه اوچون آغلاماسي و يا اوشاغين اويونجاق دوكاني نين قاباغيندا يئره سريليب زيرين – زيرين اؤكوتمه وورماسي.
و ايكينجيسي ايسه ، اؤيرنملي و قازانماليدير كي اؤزونه اؤزگو اوخوللاردا اؤيره ديلير. نئجه آغلاياسان ،نئجه غش ائله يه سن ، نئجه سسي يوخونلادييب نازيكله ده سن ، نئجه گؤزلريندن پير- پير ياش اله يه سن ونئجه....
محرمليك آيي دير و آغلاماغين بازاري چوخ قيزغين. آتالاريميز " حسينه آغلاييرسان ، يزيده ده آغلا " دئييبلر. ايشده ائي بئش ميليون آليب اون گون روضه دئينلر، ائي نوحه آغجيندان پارا درنلر، ائي زينجير ، دؤيول ساتلانلار، ائي چين- ژاپوندان طبيل و قارا پارچا ايدخال ائدنلر، ائي مذهبي ديزيلر ( سريال) دوزلدنلر، ائي ميللتين وار- يوخوندان ائحسان وئرنلر ، ائي يزيدين ايش تؤرتمه (اشتغال زايي) فورصتيندن يارارلانانلار و ائي ...
بيرآزدا يزيده آغلايين. اشي ! يزيد اولماسايدي هارادان امام حسين(ع) دوكاني آچاجاق ايدينيز. هارادان بير ايلين گليريني بير آيدا قازاناجاق ايدينيز؟ هارادان....
محرمليك آيي دير وآغلاماغين بازاري چوخ قیزغين. بيز امام حسينه آغلاييريق حسينه ايسه بيزه....
