ناموسلو كارمند
ناموسلو كارمند
دوكتور جئري
قَرا بُلِتِغْ ييلْ اَجارْ
اُرُنْجْ بِلا ايلْ اَجارْ (1)
ديوان لغات الترك
ايشيم اگري‌بوروق ايداره‌سينده دويونه دوشوب آچيلميردي. دؤرد آي ايدي بير ايمضا اوچون "بوگون گئت، صاباح گل" ائتمكده ايديم. احوالاتي اوستاد دفتري‌يه دانيشديم. گولدو:
- بو گل-گئتده نئچه جوت باشماق ييرتيبسان؟
- اوچ جوت!..
- اوچ جوتدن ايكي جوتونون پولونو رئيسه قيسديرسايدين ايشين ايندي‌يه‌دك يولونا دوشموشدو.
سؤزوندن شاشيرديم:
- ياني سيز دئييرسيز روشوه وئره ايديم؟
- بونا روشوه دئمزلر. حاققي ناحاق ائله‌مك اوچون پول وئرسن روشوه‌‌دير. سنكي حقّي ناحقّ ائله‌مك ايسته‌ميرسن؟!...
باشيملا "يوخ" دئيه‌رك سوروشدوم:
- بس بو نه پولو دور؟!
- بونا ايشي توْوا مينديرمه پولو دئيرلر!
.....
سونوندا اوستاد دفتري مني قانديرميشدي. آخشام قارانليغيندان يارارلاناراق رئيسه توْولاما پولو قيسديرماق اوچون جامع مسجيدي‌نين قاباغيندا گؤزله‌ييرديم. رئيس مسجيددن چيخيب ماشينينا مينمك ايسته‌ينده بيله‌سينه توش گلميشجه‌سينه ياخينلاشاراق:
- اوووه... جناب رئيس ..خوش گؤردوك سيزي! - دئديم.
رئيس بير آلتدان- بير اوستدن منه باخاراق:
- گئنه سيزسيز؟!- دئدي.
ال-آياغا دوشوب پرونده‌ني قاباغينا آچاراق،" قوربان مني دولاندير اوشاقلارين باشينا بونا بير ايمضا آت..." دئديم؛ پروندهنين آراسينا بير اللي مين‌ليك قويموشدوم.
رئيس قاشلاريني چاتدي؛
- بو نه‌دير؟!...
- قوربان بو توْوا مينديرمه پولو دور؛ لوطفن قبول ائله‌يين ـ دئيه يانيت وئرديم.
رئيس سرت-سرت:
- آغا.. من ناموسلو بير كارمندم.. روشوه آلمارام...-دئدي.
اؤز-اؤزومه، "ائوين ييخيلسين اوستاد دفتري گؤر مني نه ايشه قويدون، ائويم ييخليدي؛ بدبخت اولدوم.." دئييب تئز اوستادين تاپشيريغي‌نين ايكينجي آشاماسينا گئچديم. جيبيمدن بير آيري اللي مين‌ليك چيخارديب پروندهنين آراسينا قويودوم.
- قوررربان....من اؤلوم‌م!...
رئيس:
- دئديم كي؛ من ناموسلو بير ...
بير آيري اللي مين‌ليك چيخارتديم؛
- سني بالالاري‌نين جاني..
- من ناموسلو....
سون اللي مين‌ليگيم ايدي..
- من نامو....
دولوخسانديم؛
- قوربان وار-يوخوم بودور نييه آلميرسيز؟!
رئيس سينيرلندي؛
- سيز ايجازه وئرميرسيز من سؤزومو قورتاريم آغا!!.
- بويورون..
- من ناموسولو بير كارمندم روشوه آلمارام، قوْي جيبيمه!
اتك يازيلار:
(1) قارا بولودو يئل آچار، دويونو روشوه آچار.
آشاما: مرحله
اورونچ: روشوه
ايل: دويون، ايلمك
تاپشيريق: تكليف
توش گلمك: راست گلمك
توْوا مينديرمك: سورعته مينديرمك، تسريع
دولوخسانماق: آغلاماق اوزره اولماق، بغض ائله‌مك
سرت: ايتي، زهميلي
سينيرلنمك: عصباني اولماق
شاشيرماق: تعجب ائله‌مك
قيسديرماق: اوْوجونا باسماق
يانيت: جاواب
تاريخ : دوشنبه 11 آذر 1392 | یازار : دوكتور جئري
