نئجه شاخسئي ووردوم؟
نئجه شاخسئي ووردوم؟
دوكتور جئري
عاشورا گونو ياخينلاشديقجا يانغيم ايمام حسين(ع) يولوندا شهيد اولماغا گئت-گئده آرتيردي. گئجه‌لري مسجيدده كربلا فاجيعه‌سيندن، ايمام حسينين باشي‌نين كسيلمه‌سيندن، اهل-عيالي‌نين اسير-يئسير دوشمه‌سيندن دانيشيلاناندا بوغازيم تيخيلر، آرزولاييرديم؛ كئشگه ايمامين زامانيندا اولوب اوغروندا ساواشاراق شهيد اولايديم. ائويميزين آمباريندا قينيدا پاسلانميش اسكي بير قيلينج وار ايدي. اوزونلوغو آز قالا منيم بويومجا ايدي. قيلينجي اوستا رحيم دميرچي‌يه گؤتوروب سورتوب ايتيتمه‌سيني ايسته‌ديم. اوستا رحيم بير منه بير قيلينجا باخينجا يالاندان:
- آغابگيم بونلا باش ووراجاق- دئديم.
آخشام اوستو قيلنجي دميرچيدن آلديغيمدا گؤزلريمه اينانا بيلمه‌ديم. قلينج پار-پار پاريلداييردي، ميلچگي گؤيده ايكي‌يه بؤله بيلردي!
ائرته‌سي گوندن، آغ خلعتدن تيكيلي عربي دؤنومو گئييب حيطده شاخسئي-واخسئي مشقي ائده‌رك اؤزومو عاشور گونونه حاضيرلاييرديم. هردن سس-كويومه آنام پنجره‌دن بويلانيب:
- قوي يئره او قيلينجي؛ قول-قيچيني كسه‌جكسن!-دئييردي.
منده بير آن دوروقسانيب:
- آنا دويونجا باخ منه!...عاشورا گونو ايمامين اؤجونو (اينتيقاميني) كافيرلردن آليب اؤزومو شهيد ائده‌جه‌يم!-دئييردم.
آنام يايليغي‌نين اوجو ايله گؤزلري‌نين ياشيني سيليب:
- اوغلوم، سنه هله اوشاقسان...-دئيينجه من قيلينجي گؤيده فيرلاديب باشيما چالار كيمي ائده‌رك شاخسئي-واخسئي دئييب سؤزونو كسيرديم.
سونوندا عاشورا گونو گليب چاتدي. سحر شافاقدان يئريمدن قالخديم. آغ پالتاريمي گئيديم. دستماز آليب ايكي ركعت شهادت نامازي قيلديم. قيلينجي گؤتوروب ائشيگه چيخماق ايسته‌ديگيمده آنام نيگران-نيگران مني سوزه‌رك آغا بگيمين قولاغينا نمنه‌لر پيچيلدادي. آغا بگيم گليب قيلينجي اليمدن آلدي. دولوخسانديم؛ آز قالا آغلاياجاقديم.
- آغابگ نه قاييريرسان من اونلا باشيمي ياراجاغام-دئديم.
آغابگيم سرت-سرت:
- بو قيلينج ايله باباميزين باباسي‌نين باباسي آذربايجان-روس ساواشيندا چوخلو ساييدا سالدات اؤلدورموش. بو قيلينج عنتيقه‌دير؛ قورخورام دسته‌ده اوغورلاسينلار!-دئدي.
- گؤزلريمين ياشيني ساخلايا بيلمه‌ديم.
- بس من نه ايله باش ووراجاغام؟-دئديم.
آغابگيم قولومدان ياپيشيب ائشيگه چكه‌رك يوموشاقجا:
- نيگران اولما، باشدا ووراجاقسان- دئدي.
كوچه‌ده قيامت ايدي. گؤز-گؤزو گؤرموردو. گؤيه ساورولان سامان ايدي گؤزه دولان كول. شاخسئي-واخسئي سسي اوره‌كلري تيتره‌‌ديردي.قيلينجلار شاهلانيب سالينيردي. قان قوخوسو، تر قوخوسو آدامين بورنونو گيجيشديريردي.
آغابگيم مني دسته باشي كربلايي سئيف‌الله‌نين يانينا گؤتوروب:
- كبلايي بيزيم بو قارداشين باشيني چيرت-دئدي.
كربلايي سئيف‌الله گؤزونون قيراغي ايله منه باخدي. مندن قاباق سيرادا قونشوموز موسلوم آغانين اوغلو، محمد دايانميشدي. كربلايي سئيف‌الله، "يا حسين" دئييب قمه‌ني محمدين باشينا چكدي. سانكي خوروز باشي كسميشديلر؛ قان گؤيه فيشقيردي. كول باسديلار. محمد باييلدي.قولتوغونا گيريب اورتاليقدان گؤتوردولر. كربلايي سئيف‌الله يئنه "يا حسين" دئيب باغيردي. او نئجه ده دوشومده(خياليمدا) اويدوردوغوم شيمره اوخشاييردي. ايشده سيرا منه گلميشدي. كربلايي سئيف‌الله قمه‌ني قالديريب باشيما ياخينلاشديرينجا اليمي قاباغا آتيب وار گوجومله قيشقيرديم:
- پوخ يئميشم وورما!
بنزر يازيلار:
تاريخ : چهارشنبه 15 آبان 1392 | یازار : دوكتور جئري
