آذربايجان ائلادبياتيندان بير ناغيل: ياغسادا، ياغماسادا
آذربايجان ائلادبياتيندان بير ناغيل: ياغسادا، ياغماسادا
دوكتور جئري
بيرينين وار ايدي، بيرينين يوْخ ايدي! بير قادين وار ايدي. قادينين بير اوْغلۇ ايكي قيزي وار ايدي. قيزلاري نئچه آي ايدي، اۇزاقائلده ايكي قارداشا اره گئتميشديلر؛ بؤيۆگو اكينچييه كيچيگي ايسه كۆزهچييه. بير گۆن قادين اوْغلۇنۇ يانينا چاغيريب دئدي:
- اوْغلۇم! ايندي آلتي آيدان چوخدور باجيلارين اۇزاق ائله اره گئديبلر؛ بيز ايسه هلهليك اوْنلاردان بير ساليق تۇتماميشيق. سندن ايستهييرم گئديب سوْراقلاشاسان، گؤرهسن؛ باجيلارين آغگۆن اوْلۇبلارمي يا يوْخ؟
اوْغلان ساغ اليني ساغ گۆزۆنۆن اۆسته قوْيۇب سوْر-سوْوقاتدان ايكي بۇخچا باغلاييب اۇزاقائله يوْلا دۇشدۇ. آز گئتدي، چوْخ گئتدي، دره تپه دۆز گئتدي، سوْنۇندا اۇزاق ائله يئتيشدي. اؤنجه بؤيۆك باجينين ائوينه گئتدي. باجيسي بير دري، بير سۇمۇك اوْلمۇشدۇ. اوْغلان كئف-احواليندان سوْرۇشدۇ. باجيسي باشيني اۆزۆنتۆ ايله ترپهديب دئدي:
- آي قارداش نه كئفي.. نه احوالي؟.. اريم اكينچيدير، ياغيش ياغاندا دئيير؛ گۆلۆر؛ دانيشير. آللاه ائلهمهميش ياغيش ياغماياندا، اكينهجكلري قۇرۇيۇر، بۇ اۆزدن حيرصدن گليب مني آتير يۇمۇرۇق تپيگين آلتينا!...
اوْغلان بؤيۆك باجيسي ايله ساغاوْللاشيب كيچيك باجيسيگيله گئدير. باجينين رنگي ساراليب سوْلمۇشدۇ. احوالاتي سوْرۇشدۇقدا باجيسي گؤز ياشلاريني آخيدا- آخيدا دئيير:
- اريم كۆزهچيدير.. هاوا گۆنشلي اوْلاندا، دئيير؛ گۆلۆر؛ دانيشير. آللاه ائلهمهميش هاوا ياغيشلي اوْلاندا، كۆزهلري كوْرلانير، بۇ اۆزدن حيرصدن گليب مني آتير يۇمۇرۇق تپيگين آلتينا!..
اوْغلان باجيلارينين دۇرۇمۇنۇ اؤيرهنيب آناسينين يانينا قاييتديقدا دئيير:
- آناجان! ياغيش ياغسادا، ياغماسادا باجيلاريمين گۆنلري قارادير!
اوْ گۆندن، اۇلۇسۇمۇز(ميلّتيميز) سؤز سؤزه گلنده دئيَر:
- اؤلكه تحريملرده اوْلسادا، اوْلماسادا ....
- نفتين بوْشكاسي يۆز دوْلار اولسادا، اوْلماسادا....
- فيلانكس رئيس اوْلسادا، اوْلماسدا...
- دؤولتين خزينهسي دوْلو اولسادا، اولماسادا...
........
بوْرادا باجيلارين ناغيلي سوْنا ائردي. گؤيدن اۆچ آلما دۆشسهده، دۆشمهسهده اۇلۇسۇمۇزۇن اؤيكۆسو هله-هله سۆرمكدهدير...
شئيخيميزين احوالاتي
گئچنلرده سيزه شئيخيميزدن يازاجاغيميزا سؤز وئرميشديك. بيرينجي بؤلومو شئيخيميز بئله دئدي باشليغي آلتيندا اوخوموشدونوز ايشده ايكينجي بؤلوم:
شئيخيميزين احوالاتي
دوكتور جئري
يوْخسۇللارين درديندن..
شئيخيميزين آروادي قونشولارينا دانيشيردي:
- شئيخيميز، آغيزلارينا آيلارجا، ايللرجه اَت دَيمهين يوْخسۇللارين قايغيسيندان قيرخ گۆندۆر ات يئمير؛ خاويار يئيير...
پارتيبازليغا قارشي!
شئيخيميز پارتيبازليغا قارشيدير. اوْ، اگريبۇروق ايدارهسينين رئيسينين پارتيبازليقلا كۆرهكنلريني ايشه سوْخدۇغۇنۇ آنلايينجا اوْنۇ گؤرهويندن اۇزاقلاشديريب باجياوْغلۇسۇنو اوْنۇن يئرينه اوْتۇرتدۇردۇ.
آيدا نئچه كيلوْ ات يئييرسينيز؟
گليشمكده اولان اؤلكهلره گؤره يۇردۇمۇزدا ات تۆكهتيمينين دۆشۆك اوْلدوغۇنۇ آراشديران بير آراشديريجي شئيخيميزين قاباغيني كسيب سوْرۇشۇر:
- آيدا نئچه كيلوْ ات يئييرسينيز؟
شئيخيميز بيرآزجيق سال-چيخدان سوْنرا يانيتلايير:
- اوْتوز بئش كيلوْ، قيرخ كيلوْ !..
آراشديريجي اينانماميشجاسينا:
- اوْتوز بئش كيلوْ، قيرخ كيلوْ مو؟!
بو آرادا بير موْتۇرچۇ اوْنلارين يانيندان اؤته-اؤته:
- شئيخيميز داشـ...غيمي يئيهسن!-دئيه قيشقيرير.
شئيخيميز:
- بۇيۇرۇن بو ايكي يۆز اللي قيرامي!....
سؤزلوك:
آراشديرماق: تحقيق و بررسي كردن
آراشديريجي: محقق
آنلاماق: فهميدن
اؤته-اؤته: در حال گذر
اينانماميشجاسينا: با ناباوري
تۆكهتيم: مصرف
دۆشۆك: پايين، كم
قارشي: مخالف
قايغي: درد، غصه
كۆرهكن: داماد
گؤرهو: وظيفه
گليشمكده اولان اؤلكهلرده: كشورهاي در حال توسعه
يانيتلاماق: جواب دادن
سيز فقط منه اوستا-اوستا دئيين!..
سيز فقط منه اوستا-اوستا دئيين!..
دوكتور جئري
گۆلميرزه، تئيمور آغانين قهوهخاناسينا گيرديكده، بالا ماحمۇد، تئشهباش ايبيش ايله شۆمشه بايراما عؤمرۆنۆ قارا فهلهليكده سۆرتدۆگۆندن دانيشيب وايسينيردي:
- قيزيم ايكي ايلدير آداخليدير؛ جئهيز قوْشۇب بخت ائوينه گؤندهره بيلميرم. فهلهليك پۇلۇنۇن بركتي يوْخدۇ كي!...
تئشه باش ايبيش اۆزۆنتۆ ايله:
- آللاه يوْخ يئردن اوّل سنه سوْنرا بيزه بير قاپي آچسين-دئدي.
بالا ماحمۇد ايله شۆمشه بايرام اللريني گؤيه قالديرديلار:
- ايلاهي آمين!!
گۆلميرزه دۇمانلاري ياريب بالا ماحمۇدگيلين ماساسينا ياخينلاشدي:
- باخيشلايين آغالار! بير ياخشي بنّا آختاريرام...
بالا ماحمۇدۇن چاتيلميش قاشلاري آچيلدي:
- لاپ دۆز گليبسن، آختارديغين ائله قاباغيندا دايانيب!
تئشه باش ايبيش ايله شۆمشه بايرام بير بيرينين اۆزۆنه باخديلار.
بالا ماحمۇد:
- هله نه تيكديرمك ايستهييرسن؟- دئيه سوْرۇشدۇ.
- واللاه دۆزۆنو ايستهسن ائل حامامينا گئتمكدن يوْرۇلمۇشۇق ايستهييريك حيطده بير حامام تيكديرك...
بالا ماحمۇد گۆلۆمسهييب:
- چوْخ ياخشي ايش گؤرۆرسۆز، ايندي حامام ائو ايله ياريدير...-دئدي سوْنرا گۆل ميرزهنين ائوينين ايزليگيني آليب يارين گليب ايشه باشلاياجاغيني سؤيلهدي.
گۆل ميرزه گئدندن سوْنرا شۆمشه بايرام، بالا ماحمۇدون اۆستۆنه قاباردي:
- اوْلان سن هاچاندان بنّا اوْلمۇبسان بيزيم خبريميز يوْخدۇر؟
بالا ماحمۇد ديشلريني آغارتدي:
- ائله بو گۆندن..
تئشه باش ايبيش قايغين-قايغين:
- اوْلان الينه ايش وئررسن هااا...
بالا ماحمۇد آرخايين- آرخايين:
- هئچ زاد اولماز!- دئدي.
***
ائرتهسي گۆن، بالا ماحمۇد خرهچينين اۆستۆنده ديوار هؤرمكده، تئشهباش ايبيش آشاغيدا كرپيچ آتماقدا، شۆمشه بايرام ايسه قۆم-اَهك تۇتماقدا ايدي.
بالا ماحمۇد دؤنه-دؤنه تئشهباش ايبيش ايله شۆمشه بايراما تاپشيردي:
- گليب، گئدن اوْلاندا سيز فقط منه اوستا-اوستا دئيين.
تئشه باش ايبش هردن:
- ماحمۇد آغا نييه ايپ چكميرسن، نييه شۆمشه باغلاميرسان، نييه كرپيچلري بئله قويورسان؟- دئينده، بالا ماحمۇد اۆستونه قيشقيريب:
- اوْلان من اوستايام يا سن؟!...- دئييردي سوْنرا:
- منيم ايپيم هارادا ايدي؟.. منيم شۆمشهم اوْلسايدي شۆمشه بايرامي نييه گتيريرديم...
بو سؤزدن شۆمشه بايرام قيزيب دوْداق آلتي نه ايسه دئيهرك دئيينيردي.
....
***
گئجه ياريسي گۆل ميرزه خاريلتي سسيندن يۇخۇدان ديسكيندي، حيطه قاچدي، ايكي الي اوْلدۇ بير باشي، حامامين طاغي چؤكمۆشدۆ.
***
تئيمور آغانين قهوهخاناسيندا چوْو دوشموشدو؛ گۆل ميرزه گيري-گيري بالا ماحمۇدو آختارير، تاپسا اۇيغون يئرينه آغاج سوْخاجاقدي! بالا ماحمۇد ايله يوْلداشلاريندان ايز-توْز يوْخ ايدي...
***
سككيز ايل سوْنرا حاجي گۆل ميرزه ائويني سۆرتۆب نئچه قات بينا تيكمك ايستهدي. بيلهسيني معمار بايرامين دفترينه گؤندرديلر. حاجي گۆل ميرزه نه قدر اؤزونو زوْرا باسدي، معمار بايرامي هارادا گؤردوگونو آنيمسامادي. آنلاشمايا قوْل قوياندان سوْنرا معمار بايرام تئلفوْن آچيب:
- مهنديس ايبيش! زحمت اولماسا منيم اوْتاغيما گليب حاجي آغا گۆل ميرزه ايله گئديب ائوينين نقشهسيني چكين!..- دئدي.
سؤزلۆك:
آداخلي: نامزد
آرخايين: مطمئن
آنلاشما: قرارداد
آنيمساماق: به خاطر آوردن
ائل حامامي: حمام عمومي
ايزليك: آدرس
اۆزۆنتۆ: تاثر، تاسف
تيكديرمك: ساختن
چؤكمك: پايين آمدن، نشست كردن.
دؤنه-دؤنه: به دفعات
ديسكينمك: از جا پريدن
سۆرتمك: سپري كردن
قابارماق:درشتي كردن، پرخاش كردن
قايغين-قايغين: نگران
قوْل قوْيماق: امضا كردن
گيري-گيري آختارماق: به شدت در پي كسي يا چيزي بودن
ماسا: ميز
وايسينماق: افسوس خوردن
هؤرمك: (آجر) چيدن
هاچان: كي؟
يارين: فردا
