كندينيزي تئلويزيوندان گؤرمك ايسته‌ييرسينيز مي؟!
كندينيزي تئلويزيوندان گؤرمك ايسته‌ييرسينيز مي؟!
دوكتور جئري
"ساري‌داش" بير كنددير آذربايجاندا، خوراساندا، همداندا و ....
"ساري‌داش"ليلارين كئفي‌نين اوستونه كئف يوخ ايدي. كندين وئريملي تورپاغي، بوللو سويو، ايليق هاواسي اوزوندن وار-دؤولتلري آشيب داشماقدا ايدي. "ساري‌داش"ليلارين هئچ غملري يوخويدو دئسك، يالان سؤيله‌ميشيك. اونلارين دونيادا بيرجه غملري وار ايدي؛ بو غم چوخدان ايدي اوركلرينده دويونچكله‌نيب يئر ائله‌ميشدي. قيش گئجه‌لري، آغ ساققاللار كندين قهوه‌خاناسيندا اوتوروب چايلاشيب، چوبوقلاشيب هر ياندان دانيشاندا سونوندا سؤزو-صؤحبتي بو درده، بو دويونچگه چكرديلر...
بير گون يئنه قهوه‌خانادا سؤز درددن، دويونچكدن دوشموشدو. كنده قوناق گلميش "قارا داش"لي حاجي بايرام چاشقينليقلا كندين آغ ساققالي مشه‌اسلاندان سوروشدو:
- سيز نه‌دن دانيشيرسيز من هئچ باشا دوشمورم؟!
مشه اسلان قلياني‌نين چوبوغونو سوموروب توستوسونو بوروق-بوروق پوفله‌يه‌رك دئدي:
- بو ماحالين كندلري اوزوك اولسا بيزيم "ساري‌داش" اونون قاشي‌دير آنجاق بونا باخماياراق ايندي‌يه‌دك بيزيم كندين آدي-سوراغي بير كره بئله اولسون راديو-تلويزيوندان ياييلماييب...
حاجي بايرام بونو ائشيده‌لي اليني دومبك قارنينا قويوب بركدن گولمگه باشلادي:
-هاه..هاه.هاه‌ه.. سيزين درديز ائله بو ايدي؟!...
مشه اسلان باشيني ترپه‌ده‌رك اونايلادي.
- سيزين درديز داواسي منده دير.-دئدي حاجي بايرام.
هامي يئرينده ديكه‌لدي. مشه بايرام جوشقو ايله:
- او نه‌دير؟- دئيه سوروشدو.
حاجي بايرام يئنه قاققيلدادياراق:
- درديز داواسي "گيرمان"دير- دئدي.
- "گيرمان" كيمدير؟- دئيه بيري سوروشدو.
- "گيرمان" بير كورددور، "قاراداش"دا ياشايير!..
مشه اسلانين گؤزلري ايشيلدادي:
- حتمن "گيرمان" راديو- تئلويزون ايشچيسي دير، ائله دئييل؟...
حاجي بايرام يئنه قاققيلدادي:
- يوووخ...
- حتمن راديو- تئلويزيوندا آدام- مادامي واردير.
- يوووخ...
مشه اسلان داريخدي.
- بس بو گيرمان نه‌كاره دير؟!
حاجي بايرام قارنيني تومارلاياراق سويوق‌قانليليقلا يانيت وئردي:
- چوباندير!..
قهوه‌خاناداكيلاردان بو سؤزدن يئرلريندن داشلانيب بيرگه سسلنديلر:
- چوباندير؟!!...
گولوش حاجي بايرامين اوزوندن سيليندي. چوخ جيددي سؤزلريني يئكونلاشديردي:
- "گيرمان" گلمه‌ميشدن بيزيم كندين احوالاتي سيزين كند كيمي ايدي آنجاق "گيرمان" گلندن بري مسئوللارين، راديو- تئلويزيونچولارين آياغي كنده آچيليب آرا-سيرا بيزي يوْخلاماغا گليرلر!
من قوْلومو سيزه ضامين وئريرم "گيرمان" گتيرسز موشگولوز حلّ اولاجاق!
*
ايكي گون سونرا "گيرمان" زورنا-قاوال ائشليگينده ساري‌داش كندينه گتيريليب قويون سوروسونون باشينا گئچيريلدي.
بير هفته سونرا، مسئوللار مركزدن "ساري‌داش" كندينه تؤكولوشدولر. راديو-تئلويزيون موخبيرلري فيلم چكيب گوزاريش توتوردولار. مسئوللارين بؤيوگو كندين خرمنليگينده "ساري‌داش"ليلارا ياخشي گله‌جگين موشتولوغونو وئره‌رك بو گؤروشلرين تكرار اولوناجاغيني سؤيله‌دي.
آخشام باشي قهوه‌خانادا ايگنه سالماغا يئر يوخ ايدي. بو گون "ساري‌داش" كنديني تئلويزيوندان گؤستريله‌جك‌ايدي. كندليلر چايلاريني ايستي-ايستي هورولداداراق گؤزلري‌نين قيراغي‌ايله ساعاتا باخيرديلار.
سونوندا ساعات يئدديني چالدي. اوستان خبرلري‌نين آپاريجيسي، برنامه‌نين اورتالاريندا ايزله‌ييجيلرين ديققتيني "ساري‌داش" كنديندن توتولان بيرگؤزاريشه چكدي.
ايستكان-نعلبكيلرين سسي سوسدو؛ قليانلار خورولتودان دوشدو؛ نفسلر سينه‌لرده گيزلندي؛ بوتون گؤزلر تئلويزونا تيكيلميشدي:
دوربين "ساري‌داش"دا گزيردي. ياشيل داغلار، اوجسوز بوجاقسيز باغلار، قاينار بولاقلار، داشقين چايلار، اوزون-اوزون سورولر دوربينين قاباغيندا سان گئچيردي سانكي. دوربين كندين ايچينه سوخولدو؛ مسجده، حاماما باش چكيب كوچه‌لري دولاشا-دولاشا خرمنليگه يئتيشدي. جاماعاتي سالاملايار كيمي قاباقلاريندا دوراقسانا-دوراقسانا اؤتدو؛ سونرا بوينونو كورسونون اوستونده دوران مسئولا چئويريب داياندي. مسئول دانيشماغا باشلادي:
- بسم الله الرحمن الرحيم
بيز بو گون چوخ خوشحاليق كي در خيدمتي مردم خونگرمي "زرددشت"-ايك. بو كندده كورد، فارس، تورك برادرانه با هم در صولح و صفا زندگانليق ائله‌ييرلر.......
سؤزلوك
آشيب داشماق: لبريز شدن
اؤتمك: عبور كردن
ائشليگينده: به همراهي
اونايلاماق: تاييد كردن
ايليق: ولرم، نه سرد نه گرم
بوروق-بوروق: حلقه -حلقه
چاشقينليق: حيرت، تعجب
چوبوقلاشماق: باهم تدخين كردن
جوشقو: هيجان
دوراقسانا-دوراقسانا: با درنگ حركت كردن
دومبك : طبل كوچك، تُنبك
دويونچك: عقده (در اين متن)
سويوق‌قانليليق: خونسردي
وئريملي: با بركت
يانيت: جواب
يئكونلاشديرماق: نتيجه گيري كردن ، خلاصه كردن
يوْخلاماق: سر زدن
تاريخ : پنجشنبه 5 دی 1392 | یازار : دوكتور جئري
