دامازليق
دامازليق
دوكتور جئري
- زير..زير..
اؤزومو او يولا ووروب سايماديم. يئنه "زير...زير.."سسي آرخامدان گلينجه دؤنوب اؤفكه ايله سسلنديم:
- يولونا شاتير اوزاتماميشام كي؛ گل گئچده!...
مينيك ياناشيب داياندي. شوشه‌سي لام-لام آشاغي ائندي. فرمانين آرخاسيندا قارا گؤزلوكلو بيريسي اگلشميشدي. هوروت-هوروت باخديغيمي گؤرونجه گؤزلوگونو گؤتوردو.
جوشقولانديم:
- اده آبيل سنسن؟...
- گل اوسته- دئدي .
عابدوللاه بيزيم اسكي قونشوموز ايدي؛بيرگه بويا باش چاتيب بيرگه اوخولا گئتميشديك. آتاسي بازاردا يوك داشيياردي. گونلرين بير گونونده، آغير بير يوكون آلتيندا قاليب سوموكلري اوولموشدو؛ وام يوكو!..بانك طرفيندن ائولري حرراجا قويولوب ساتيلاندان سونرا داها عابدوللاهي گؤرمه‌ميشديم؛ گره‌ك اون-اون‌ايكي ايل اولاردي.
- ........
"هه.. !" دئييب اؤزومه گلديم. عابدوللاه سورغوسونو يئنه‌له‌دي:
- دئييرم نه قاييريرسان؟..
"هئچ" دئديم. "اله‌ييب، اله‌ييب كپگينه قاتيرام".
گولدو بركدن.
- آبيل دوغوشدان سن نه قاييرسان؟ بو دم-دستگاه ندير؟ اولمايا خزينه (گؤمولو) تاپميشسان؟!...
يئنه گولدو؛ قيزيل ساعاتينا باخاراق:
- ناهار اوستودور؛ بو ياخينلاردا بير رستوران وار؛ گئدك ناهاري يئيك سونرا تعريف‌له‌يه‌رم-دئدي.
كؤنلونو قيرماييب،"اولسون" دئديم.
ماشيني كيمي، آديني تانيماديغيم يئمگي يئديكدن سونرا عابدوللاه سؤزه باشلادي.
- حاجي قولونو تانييردين؟- دئيه سوروشدو.
- هانسي حاجي قولو؟ -دئديم.
- حاجي قولو اصناف! بازار آغزيندا حوجره‌سي وار ايدي.
- هه..هه تانييرديم. آللاه رحمت ائله‌سين مچيد-مونبر آدامي ايدي.
- هه! آللاه اونا غني-غني رحمت ائله‌سين او اولماسايدي ايندي منده سنين كيمي اله‌ييب، اله‌ييب گپگينه قاتيرديم.
عابدوللاه يئرينده ديكله‌نيب سؤزونون آرديني توتدو:
- تزه عسكرليكدن گلميشديم. سحر تئزدن ائودن چيخيب آخشام الي بوش ائوه قاييديرديم. يئريم ايشسيزلرين پاتوغو اولان بازار آغزي ايدي. بير گون حاجي قولو مني حوجره‌سينه چاغيردي. "سن رحمتليك مشه محرم هامبالين اوغلو دئييلسن؟" دئيه سوروشدو مندن. "نييه اؤزويم!"دئديم. بير چاي قاباغيما قويوب:
- آتان چوخ زحمتيميزي چكميشدي...ياخشي آدام ايدي..آللاه اونا رحمت ائله‌سين-دئدي. -ايندي نه ايش گؤرورسن اوغلوم؟
سئوينديم ؛ اوره‌گيمدن"حتمن حوجره‌سينده منه بير ايش وئره‌جكدير" گئچدي.
- ايشسيزم؛ ايش آختاريرام حاجي- دئديم.
حاجي قولو ساققاليني تومارلايا-تومارلايا:
- ايش باشلاماق اوچون الينده سرمايه‌ن واردير؟-دئيه سوروشدو.
- وار يوخ اوتوز مين تومنيم وار ، بونونلاداكي بير ايش گؤرمك اولماز حاجي! دئييب سئوينجك دوشونجه‌يه دالديم: حتمن حاجي قولو ايسته‌يير پول-مول ايختياريمدا قويسون!
حاجي قولو گولومسه‌دي:
- ايسته‌ييرسن يوخسوللوغون داشيني بير يوللوق آتيب وارلاناسان؟!
سئوينجدن قاناد چيخارداجاقديم.
- حاجي بو نه سؤزدور، البته ايسته‌ييرم ..كور آللاهدان نه ايستر ايكي گؤز؛ بير اگري، بير دوز.
حاجي قولو اليني اليم اوستونه قوياراق آتاجاسينا :
- اوغلوم وارلانمانين سيريني سنه اؤيرجگم آنجاق اؤز آراميزدا قالسين...
(باشيمي ترپتمكله حاجيني آرخايين ائله‌ديم)
اوغلوم ايسته‌ييرسن وارلاناسان گره‌ك سرمايه‌‌‌‌‌وين اوچدن بيري حارام مالدان اولسون- دئدي. سونرا آياغا قالخيب مني يولا سالا-سالا آرتيردي:
- ايندي اوغلوم قورخما! گئت بير ايشين اوجوندان توت، آللاه پوشتو-پناهين اولسون!
ماراقدان سؤزونو كسديم.
- سن نئيله‌دين؟...
عابدوللاه بيج-بيج گولدو:
- منده سرمايه‌مين دامازليغي آز اولماسين دئيه اوچدن بير يئرينه ياري-ياري حارام مال قاتديم.
داها بتر ماراقلانديم.
- سونرا نه اولدو؟
- نه اولاجاق؟ گؤرمورسن؟ ماليم گونو گوندن آشيب داشدي. ايندي اونلارجا حيط، ماشين، توكانيم واردير...
بيردن گؤزلريمين اؤنونده، شهريميزين وارلي-كارلي‌لاري سيرالاندي... گؤره‌سن بونلارين سرمايه‌لري‌نين دامازليغي نئچه‌دن نئچه‌‌ايدي؟...
اوره‌گيم بولاندي. آديني تانيماديغيم يئمك‌دن اولمالي‌ايدي. جلد عابدوللاه ايله ساغ‌اوللاشيب ائشيگه قاچديم. چتينليكله اؤزومو رستورانين قاباغينداكي قانووا (آرخا) چاتديرا بيلديم.
تاريخ : جمعه 1 آذر 1392 | یازار : دوكتور جئري
