خوش خبر: پولوموزون دگري ايكي‌قات آرتدي!
خوش خبر: پولوموزون دگري ايكي‌قات آرتدي!
دوكتور جئري
قاش قارالميشدي. تو دئييردين گؤيده دونوردو. خيابان قيراغيندا بير آياغيمي گؤتوروب بيريني قويوردوم. سويوق سوموگومه، ايليگيمه، ايشله‌مكده‌ايدي. تاكسيلار، بسم‌الله‌دان قورخموش جينلر كيمي اؤنومدن ويزلاييرديلار. دؤزوموم توكندي. "دربست" دئيه قيشقيرديم؛ ساپ-ساري بير تاكسي قاباغيمدا دوندو. بيلمه‌ديم اؤزومو نئجه ايچري آتديم.دونوم آچيلينجا گؤزومون قيراغي ايله تاكسيچي‌يا باخديم. دوداق آلتي ميزيلداييردي. ميزيلتيسي گئت گئده اوجاليب ماهني‌يا دؤنوشدو. سسي هردن يوغونلاييب هردنسه اينجه‌ليردي:
يوغون سسله:
قوي خانيمي بگ آپاريب
تئزليگ ايله توي ائله‌سين،
سني‌ده‌جه من آلارام،
من ده بير بگ اولارام.
اينجه سسله:
پولون وار؟
يوغون سسله:
وار، وار.
اينجه سسله:
پولون وار؟
يوغون سسله:
بير آنبار!
اينجه سسله:
پولون وار، گله‌رم،
يوغون سسله:
بيليرم گلرسن.
اينجه سسله:
بئله، بئله ياريمسان
يوغون سسله:
بئله، بئله جانيمسان
اينجه سسله:
من گئده‌رم او اوغلانا
اونون پولو چوخ اولسون،
اونون پولو چوخ اولسون.
دردي،غمي آز اولسون
پولون وار؟
يوغون سسله:
وار، وار.
اينجه سسله:
پولون وار، گله‌رم
يوغون سسله:
بيليرم، گلرسن
اينجه سسله:
بئله، بئله ياريمسان،
يوغون سسله:
بئله، بئله جانيمسان.
ناي ناناناي ناناي ناناي ناناي ناناي ناي....
ماهني ميزيلتي‌يا دؤنوشونجه "آغزينا ساغليق" دئيه‌رك تاكسيچي‌يا دؤندوم:
- ماشا‌الله داماغين چاغدير.. اولمايا بو گئجه "سبد كالا" ايله ائوه گئديب خانيمي سئوينديره‌جكسن؟!
قاققاناق چكه‌رك:
- يوووخ باباااا... هله آداخلي‌يام... اوچ ايلدير آداخلي‌يام...-دئدي- آللاها شوكور ائله بيل پولوموزون دگري ايكي قات آرتيب؛ بئله گئتسه اينشاالله بو بايرام توي ائله‌ييب خانيميمي گتيره‌جگم!...
قولاقلاريم تاققيلدادي:
- نئجه، نئجه!... پولوموزون دگري ايكي قات آرتيب؟!...
تاكسيچي گولومسه‌دي؛ كؤينك جيبيندن ايكي اللي‌مينليك چيخارديب منه گؤسته‌ره‌رك آچيقلادي:
- سحردن آخشاماجان من چوخ ايشله‌سم اللي مين ايشله‌رم آمما بو گون يوز مين قازانميشام...
- حتمن منيم كيمي ياغلي موشتريلر تورونا دوشوب!
- يوخ.. پولوموزون دگري ايكي‌قات چوخاليب...
- منكي بير شئي باشا دوشمورم!
تاكسيچي بو كز جيبيندن بير ويزيت كارتي چيخارديب منه اوزاتدي. آلا-قارانليقدا كارتين اوزه‌رينده يازيلميش، "كؤهنه دمير، ميس، بوروش...." سؤزلريني سئچه بيلديم.
- واللاه من گئنه بير شئي باشا دوشمه‌ديم-دئديم.
تاكسيچي ايسته‌ييردي،"سنده نه پخمه‌سن" دئيه سؤزونو دگيشدي:
- دونن مسافيرلريمين بيري بو كارتي منه وئردي. سني مينديرمه‌ميشدن قاباق اونون يانيندان گليرديم. بو گون ايشله‌ديگيم دمير پوللاري كيلو ايله اونا ساتديم يوز مين تومن چيخارتدي.. تومنه-تومن دمير پوللاريميزين اوستونه گليب....
- يئتيشديك قارداش، زحمت اولماسا او كؤرپونون قاباغيندا ساخلا-دئديم.
تاكسي داياندي. آشاغي ائنديم.
- نئچه ائلر؟- دئديم.
- قابيلي يوخدور-دئدي- مين بئش يوز تومن!..
جيبيمدن ايكي دنه دمير بئش يوزلوك چيخارديب اووجونا باسديم.
- مين بئش يوزو كيرايه‌ن، بئش يوزوده وئرديگين خوش خبرين موشتولوغودور قارداش- دئديم.
