یئرلی اوران زنگینلشدیرمه تئکنولوژیسی
موشتولوق: اوران زنگينلشديرمه تئكنولوژيسيني گوجلنديرمك اوچون لوبيا، مرجيمك و بوتون تورپ چئشيدلري نين سوبسيدي قالديريلماياجاقدير.
موللانصرالدين و سوبسيدلرين حيكايه سي
موللانصرالدين و سوبسيدلرين حيكايه سي
يازان : دوكتور جئري
موللانصرالدینین باجی اوغلوسو موللادان ۵۰ مین بورج ایسته ییر. او بو پول ایله آلیش- وئریش ائده رک بیر آیین ایچینده ۲۰ مین قازانیب ۱۰ مینین موللایا ۱۰ مینین ايسه اؤزونه گؤتوره جگيني سؤيله يير. موللا باجي اوغلوسونون الينين آغير اولدوغونو و پولونو گئري قايتارماياجاغيني بيليردي آنجاق اونون سؤزونوده يئره سالماقدا ايسته ميردي. بونا گؤره بير آز دوشوندوكدن سونرا ال آتيب جيبيندن ۱۰ مين چيخارديب دئيير :" باجي اوغلو! من سنين ۱۰ مينين ايسته ميرم ، آل بو سنين ۱۰ مين قازانجين ، قوي ۴۰ مينيمده منه قالسين".
ائي " ممالك محروسه ايران" دا ياشايان ميللتلر!! ايشده حيكايه ، سوبسيدلرين حيكايه سي دير. حيكايه لر يئنه تيكرار اولور. حيكايه لريني بيلمه ين ميللت اؤزگه لره قول اولور. ائي ميللت ! گلين "دولت عليه ايران" - ين ۱۰ مينليك قازانجيني بو باشدا وئريب حيكايه ني كئچميشده كي كيمي شيرينليكله بيتيرک . يارين گؤره رسينيز ايش باشقا جورا اولدو ها! دئمه يين دئمه ديم. بيلنلر بيلمه يينلره دئسين . ائي " ممالك محروسه ....
موللانصرالدین دؤولت خانيما : " بو سوبسيديرسه هاني منيم اؤزپوللاريم ، يوخ! بو اؤز پوللاريمديرسا هاني به سوبسيد؟!..."
اورمو گؤلونون قوروماسي نين فايدالاري...
اورمو گؤلونون قوروماسي نين فايدالاري...
يازان : دوكتور جئري
بو گونلر چئشيدلي سايتلاردا اورمو گؤلونون قوروماسيندان تؤرنه جك ضررلره گؤره يوزلرجه يازي ياييلماقدادير. آنجاق يولداشلار! قلمداشلار! بير آز ايگيمسر (نيك بين) اولون! نئجه دئييرلر تانري ايكي يومروغو بير باشا وورماز . تانري دميرقاپيني باغلاياندا آغاج قاپيني آچار. نه اولور، ائولرينيزده اوتوروب رنگلي چايي آرمودي ايستكاندا ايچنده باشيميزي پامبيقلا كسمك ايسته ين دوشمانلارلا آغيزآغيزا وئرمه يين. سيزدن ريجا ائديرم كؤتومسرليك(بدبينليك) گؤزلوگونو گؤزلرينيزدن گؤتورون . ياخشي باخين . سيز ندن اورمو گؤلونون قورماسي نين فايدالاريني گؤرمك ايسته ميرسينيز؟ اولمايا ديش اوغوزدان پارا آليرسينيز؟ ائله ائتمه يين گليب دولارلاري جيبينيزدن چكيم ائشيگه ائل- عالمه رذيل ائديم سيزي. دونيادا گؤلمجلري ، دنيزلري قورداراق اكين يئري دوزلديرلر. سيز بورادا ، اوَل آللاه ايكينجي گؤره وليلريميزين امگي ايله قوروماقدا اولان اورمو گؤلو ايشي نين قاباغينا داش آتماق مي ايسته ييرسينيز؟! سيز داش آتان اولسايدينيز ندن گؤلون اورتاسيندان يول چكيب داش دولدوراندا گليب داش آتمادينيز بو ايش تئز بيتسين. ييرمي- اوتوز ايل چكمه سين...
هه! دنيز قوروتماغا گؤره دانيشيرديم . سيز بيليردينيزمي اورمو گؤلونون قورماسي ايله بيزيم يوزلر كيلومئتر اكينه بيله جك يئرلريميز اولاجاق؟ سيز بيليردينيزمي بو يئرلرين شوراكت اولدوغونا گؤره خييارشور اكمَگه چوخ ال وئريشلي اولاجاقدير؟ سيز بيليردينيزمي بيز بو يئرلرده خييارشور اكمكله دونيانين بيرينجي خييارشور ايخراج ائدن اؤلكه سينه دؤنوشه جه ييك؟ بيزه توختاياجاق ميلياردلار دولار گليردن خبرينيز وارميدير؟
اورمو گؤلونون قورماسييله بؤلگه ميز كويئرله شيب هاواسي ايستي له شينجه ميللتيميز دوه بئجرمكله هم ياخشي پارا الده ائده بيليب همده بوحئيوانلاردان داشيت و يوكلت آرابالاري يئرينه فايدالاناراق ياخيتين(سوخت) باهاليغيندان قورتولا بيله جكلر. (ياخيتدان سوبسيدين قالديراجاغيني اونوتمايين).كويئرين اؤزليلكريندن بيري ده دؤولت ياتيريمي نين بو يئرلرده يوكسك اولدوغودور؛ بيز بؤلگه ميزي دوزلاغا دونوشدورمكله بو آيريجاليقدان اولدوقجا يارارلاناجاغيق.
بؤلگه ميزين دوزلاغا دؤنوشمه سي نين فايدالاريندان تكجه بيز يوخ، گله جك قوشاقلاريميزدا يارارلاناجاقلار. مينلر ايل سونرا ، تؤره مه لريميز چورومه ميش اؤلولريميزي دوزلاقلاردان چيخارديب دونيا موزئيلرينه ساتاراق ياخشي پارا قازانيب دوزلو روحوموزا رحمت اوخوياجاقلار.
يازيمين سونوندا بير موشتلوغومدا وار سارساقلارا، آخماقلارا و مانقورتلارا. ايللر بويو ايدي سيزسايقيلي شوراكتداشلاريميزي شوردريايا تؤكمكله قورخودوردولار ،آنجاق ايندي الينيزي اورگينيزه قويوب راحات اويويون، شوردريا قورويور....
موللانصرالدین و آرپانی هدفليلنديرمه حیکایه سی
موللانصرالدین و آرپانی هدفليلنديرمه حیکایه سی
یازان: دوکتورجئری
كئچميشلرده ،دونيا چاپيندا تاخيل فيياتي نين آرتديغيندان موللانصرالدين آرپاني هدفليلنديرمك فيكرينه دوشور. بو اوزدن ائششگي نين گونده ليك آرپا جيره سيني يارييا كسير. بير ايكي گون كئچير. موللا ائششگين حاليندا بير دگيشيكليك گؤرمه يينجه دوشونور هدفليلنديرمه نين آرديني توتسون. بونا گؤره ياري آرپا جيره سيني يئنه ياري ائدير. ائششك يئنه اؤز حاليندا قالير . بونو گؤرن موللا آرتيق، هدفليلنديرمه يين آرديني بوراخمير. بئش اون گون سونرا موللا يئنه هدفليلنديرمك اوچون آغيلا گيرنجه گؤرور ائششك اوزون – اوزون اوزانيب اؤلوب. موللا اوزونتو ايله اؤز اؤزونه دئيير :" ياخشي هدفليلنديرمه يه اؤيرنميشدي آمما نه يازيق دوشوب اؤلدو."
دئييرلر موللانين بير آغيللي آروادي وار ايدي. اولايي اؤيره نيجه اوزونو موللايا توتوب : " آ باشي داشلي كيشي! آرپاني هدفليلنديرمك يئرينه ياخشيسي بو ايدي ائششگين گؤزونه بير ياشيل گؤزلوك وورايدين سونرا ساماني يونجا يئرينه باسايدين قاباغينا يئيَيدي كئف ائلييَيدي." دئيير...
یئتیم قالمیش اورمو گؤلو
یازان: دوکتورجئری
دوننین حیکایه سی :
بير يئتيم اوشاق ديوارين ديبينده اوتوروب آغلاييردي.قولتوغوندا بير بوخچا تزه چؤرك اولان بير كيشي اونا ياخينلاشيب:" بـــــالا نييه آغـــلاييرسان؟" دئيه سوروشور.اوشـاق ايچيني چـــكه رك: " آجام " دئيير. كيشي اوشاغين يانيندا چؤمبه ليب آغلاماغا باشلايير. اوچونجو كيشي گليب اولانلاري اؤيرنديكدن سونرا ايكينجي كيشييه اوزونو توتوب:" بونون آغلاماغي يوخدوركي چؤركلردن بيردنه وئر اوشاغا ، آغلاماسين " دئيير. ايكينجي كيشي الي نين دالي ايله گؤزلري نين ياشيني سيله رك : " چؤرك – مؤرك وئرنمه رم آنجاق نه قدر ايسته سه نيز اونون حالينا آغلايا بيلرم!" دئيير.
بوگونون حیکایه سی:
ائي يئتيم قالميش اورمو گؤلو! ايشده آغلا. بيزده آغلاييريق. اونلارجا سد كوزه سيني چيينيميزده توتوب حالينا آغلاييريق. بير دامجي سو وئرمه ريك سنه البت ، آنجاق نـــــه قـــــــــــــــدر ايسته سن آغلاريق. يئتيم قالميش اورمو گؤلو ! او قدر آغلا لاپ گؤزون ياشي قوروسون. دوزلاغا دؤن . قوي يئل- كولك دوزونو دولدورسون گؤزلريميزه ، گؤزلريميز گؤرن اولسون. دوست دوشماني سئچن اولسون. دوزلاريني سپه له اكينه جكلريميزين اوزه رينه. باغلاريميزين ، بوستانلاريميزين اوزه رينه .. قورخما هر ياني قوروت . آخي دئييرلر يئتيم پاخيل اولار!... پاخيل اول يئتيم قالميش اورمو گؤلو! پاخيل اول . پاخيل اولسان نئيله يه جكسن!؟ هر ياني دوزلاغا ، كويئره (كويره) دؤندرديكدن سونرا بيليرسنمي نه اولاجاق سنين آجيغينا!؟ بؤلگه ميز توريستي اولاجاق. هه ! دوز ائشيتدين؛ توريسيتي اولاجاق!!.. تهراندان ، كرماندان اصفهاندان ، تؤكولوب گله جكلر كويئر گزمه يه! البته بيزيم كويئرين اؤزونه اؤزگو اؤزلليگي اولاجاق باشقا كويئرلردن . بيزيم كويئرين يانيندا سدلر وار! توريستلر اوردا قـــايق سوروب، باليق توتوب ، اوزه بيلرلر بئله. سن بيلميرسن كويئرين گئجه لري نه قدر گؤزل اولور. اولدوزلاري نه قدر پارلاق اولور . بونو اسكي كويئرلي لر سؤيله ييرلر.
اينديسه آغلا! آغلا! يئتيم قالميش اورمو گؤلو! بيزده آغلاييريق! سني گؤز ياشيميزلا دولدورا بيلمه سك بئله ، سني اوتانج تري ايله دولدورا بيلمه سك بئله، سني 2500 ايلليك آغ يالانلارلا دولدوراجاقلار. آغلا! آغلا! بيزده آغلاييريق....
