سيز فقط منه اوستا-اوستا دئيين!..
سيز فقط منه اوستا-اوستا دئيين!..
دوكتور جئري
گۆلميرزه، تئيمور آغانين قهوهخاناسينا گيرديكده، بالا ماحمۇد، تئشهباش ايبيش ايله شۆمشه بايراما عؤمرۆنۆ قارا فهلهليكده سۆرتدۆگۆندن دانيشيب وايسينيردي:
- قيزيم ايكي ايلدير آداخليدير؛ جئهيز قوْشۇب بخت ائوينه گؤندهره بيلميرم. فهلهليك پۇلۇنۇن بركتي يوْخدۇ كي!...
تئشه باش ايبيش اۆزۆنتۆ ايله:
- آللاه يوْخ يئردن اوّل سنه سوْنرا بيزه بير قاپي آچسين-دئدي.
بالا ماحمۇد ايله شۆمشه بايرام اللريني گؤيه قالديرديلار:
- ايلاهي آمين!!
گۆلميرزه دۇمانلاري ياريب بالا ماحمۇدگيلين ماساسينا ياخينلاشدي:
- باخيشلايين آغالار! بير ياخشي بنّا آختاريرام...
بالا ماحمۇدۇن چاتيلميش قاشلاري آچيلدي:
- لاپ دۆز گليبسن، آختارديغين ائله قاباغيندا دايانيب!
تئشه باش ايبيش ايله شۆمشه بايرام بير بيرينين اۆزۆنه باخديلار.
بالا ماحمۇد:
- هله نه تيكديرمك ايستهييرسن؟- دئيه سوْرۇشدۇ.
- واللاه دۆزۆنو ايستهسن ائل حامامينا گئتمكدن يوْرۇلمۇشۇق ايستهييريك حيطده بير حامام تيكديرك...
بالا ماحمۇد گۆلۆمسهييب:
- چوْخ ياخشي ايش گؤرۆرسۆز، ايندي حامام ائو ايله ياريدير...-دئدي سوْنرا گۆل ميرزهنين ائوينين ايزليگيني آليب يارين گليب ايشه باشلاياجاغيني سؤيلهدي.
گۆل ميرزه گئدندن سوْنرا شۆمشه بايرام، بالا ماحمۇدون اۆستۆنه قاباردي:
- اوْلان سن هاچاندان بنّا اوْلمۇبسان بيزيم خبريميز يوْخدۇر؟
بالا ماحمۇد ديشلريني آغارتدي:
- ائله بو گۆندن..
تئشه باش ايبيش قايغين-قايغين:
- اوْلان الينه ايش وئررسن هااا...
بالا ماحمۇد آرخايين- آرخايين:
- هئچ زاد اولماز!- دئدي.
***
ائرتهسي گۆن، بالا ماحمۇد خرهچينين اۆستۆنده ديوار هؤرمكده، تئشهباش ايبيش آشاغيدا كرپيچ آتماقدا، شۆمشه بايرام ايسه قۆم-اَهك تۇتماقدا ايدي.
بالا ماحمۇد دؤنه-دؤنه تئشهباش ايبيش ايله شۆمشه بايراما تاپشيردي:
- گليب، گئدن اوْلاندا سيز فقط منه اوستا-اوستا دئيين.
تئشه باش ايبش هردن:
- ماحمۇد آغا نييه ايپ چكميرسن، نييه شۆمشه باغلاميرسان، نييه كرپيچلري بئله قويورسان؟- دئينده، بالا ماحمۇد اۆستونه قيشقيريب:
- اوْلان من اوستايام يا سن؟!...- دئييردي سوْنرا:
- منيم ايپيم هارادا ايدي؟.. منيم شۆمشهم اوْلسايدي شۆمشه بايرامي نييه گتيريرديم...
بو سؤزدن شۆمشه بايرام قيزيب دوْداق آلتي نه ايسه دئيهرك دئيينيردي.
....
***
گئجه ياريسي گۆل ميرزه خاريلتي سسيندن يۇخۇدان ديسكيندي، حيطه قاچدي، ايكي الي اوْلدۇ بير باشي، حامامين طاغي چؤكمۆشدۆ.
***
تئيمور آغانين قهوهخاناسيندا چوْو دوشموشدو؛ گۆل ميرزه گيري-گيري بالا ماحمۇدو آختارير، تاپسا اۇيغون يئرينه آغاج سوْخاجاقدي! بالا ماحمۇد ايله يوْلداشلاريندان ايز-توْز يوْخ ايدي...
***
سككيز ايل سوْنرا حاجي گۆل ميرزه ائويني سۆرتۆب نئچه قات بينا تيكمك ايستهدي. بيلهسيني معمار بايرامين دفترينه گؤندرديلر. حاجي گۆل ميرزه نه قدر اؤزونو زوْرا باسدي، معمار بايرامي هارادا گؤردوگونو آنيمسامادي. آنلاشمايا قوْل قوياندان سوْنرا معمار بايرام تئلفوْن آچيب:
- مهنديس ايبيش! زحمت اولماسا منيم اوْتاغيما گليب حاجي آغا گۆل ميرزه ايله گئديب ائوينين نقشهسيني چكين!..- دئدي.
سؤزلۆك:
آداخلي: نامزد
آرخايين: مطمئن
آنلاشما: قرارداد
آنيمساماق: به خاطر آوردن
ائل حامامي: حمام عمومي
ايزليك: آدرس
اۆزۆنتۆ: تاثر، تاسف
تيكديرمك: ساختن
چؤكمك: پايين آمدن، نشست كردن.
دؤنه-دؤنه: به دفعات
ديسكينمك: از جا پريدن
سۆرتمك: سپري كردن
قابارماق:درشتي كردن، پرخاش كردن
قايغين-قايغين: نگران
قوْل قوْيماق: امضا كردن
گيري-گيري آختارماق: به شدت در پي كسي يا چيزي بودن
ماسا: ميز
وايسينماق: افسوس خوردن
هؤرمك: (آجر) چيدن
هاچان: كي؟
يارين: فردا
