آذربايجان ائلادبياتيندان بير ناغيل: ياغسادا، ياغماسادا
آذربايجان ائلادبياتيندان بير ناغيل: ياغسادا، ياغماسادا
دوكتور جئري
بيرينين وار ايدي، بيرينين يوْخ ايدي! بير قادين وار ايدي. قادينين بير اوْغلۇ ايكي قيزي وار ايدي. قيزلاري نئچه آي ايدي، اۇزاقائلده ايكي قارداشا اره گئتميشديلر؛ بؤيۆگو اكينچييه كيچيگي ايسه كۆزهچييه. بير گۆن قادين اوْغلۇنۇ يانينا چاغيريب دئدي:
- اوْغلۇم! ايندي آلتي آيدان چوخدور باجيلارين اۇزاق ائله اره گئديبلر؛ بيز ايسه هلهليك اوْنلاردان بير ساليق تۇتماميشيق. سندن ايستهييرم گئديب سوْراقلاشاسان، گؤرهسن؛ باجيلارين آغگۆن اوْلۇبلارمي يا يوْخ؟
اوْغلان ساغ اليني ساغ گۆزۆنۆن اۆسته قوْيۇب سوْر-سوْوقاتدان ايكي بۇخچا باغلاييب اۇزاقائله يوْلا دۇشدۇ. آز گئتدي، چوْخ گئتدي، دره تپه دۆز گئتدي، سوْنۇندا اۇزاق ائله يئتيشدي. اؤنجه بؤيۆك باجينين ائوينه گئتدي. باجيسي بير دري، بير سۇمۇك اوْلمۇشدۇ. اوْغلان كئف-احواليندان سوْرۇشدۇ. باجيسي باشيني اۆزۆنتۆ ايله ترپهديب دئدي:
- آي قارداش نه كئفي.. نه احوالي؟.. اريم اكينچيدير، ياغيش ياغاندا دئيير؛ گۆلۆر؛ دانيشير. آللاه ائلهمهميش ياغيش ياغماياندا، اكينهجكلري قۇرۇيۇر، بۇ اۆزدن حيرصدن گليب مني آتير يۇمۇرۇق تپيگين آلتينا!...
اوْغلان بؤيۆك باجيسي ايله ساغاوْللاشيب كيچيك باجيسيگيله گئدير. باجينين رنگي ساراليب سوْلمۇشدۇ. احوالاتي سوْرۇشدۇقدا باجيسي گؤز ياشلاريني آخيدا- آخيدا دئيير:
- اريم كۆزهچيدير.. هاوا گۆنشلي اوْلاندا، دئيير؛ گۆلۆر؛ دانيشير. آللاه ائلهمهميش هاوا ياغيشلي اوْلاندا، كۆزهلري كوْرلانير، بۇ اۆزدن حيرصدن گليب مني آتير يۇمۇرۇق تپيگين آلتينا!..
اوْغلان باجيلارينين دۇرۇمۇنۇ اؤيرهنيب آناسينين يانينا قاييتديقدا دئيير:
- آناجان! ياغيش ياغسادا، ياغماسادا باجيلاريمين گۆنلري قارادير!
اوْ گۆندن، اۇلۇسۇمۇز(ميلّتيميز) سؤز سؤزه گلنده دئيَر:
- اؤلكه تحريملرده اوْلسادا، اوْلماسادا ....
- نفتين بوْشكاسي يۆز دوْلار اولسادا، اوْلماسادا....
- فيلانكس رئيس اوْلسادا، اوْلماسدا...
- دؤولتين خزينهسي دوْلو اولسادا، اولماسادا...
........
بوْرادا باجيلارين ناغيلي سوْنا ائردي. گؤيدن اۆچ آلما دۆشسهده، دۆشمهسهده اۇلۇسۇمۇزۇن اؤيكۆسو هله-هله سۆرمكدهدير...
