نييه اسد عمينين آياغي كسيلمير؟!
نييه اسد عمينين آياغي كسيلمير؟!
يازان: اوستاد دفتري
آژير قاريشيقلي چيغير-باغير سسينه كۆچهيه قاچديم. قوْنشۇمۇز، اسدعمينين قاپيسيندا بير آمبۇلانس دايانميشدي.جاماعات قاپيلاريندا قيم-قيم قيمليداييردي. اۆرهگيم اۆزۆزلدۆ... اسد عمي بير ايكي گون ايدي خستهلهنيب ائوده ياتيردي. اوْلمايا بيلهسينه بير شئي اوْلۇب؟ قالاباليغين ايچينه سوْخۇلدۇم. اسدعمينين رنگي ساپساري اوْلمۇشدۇ. آروادي ايله اوْغلو قوْلتۇقلارينين آلتينا گيريب آمبۇلانسا مينديرمك ايستهييرديلر آنجاق آمبۇلانسچي قوْيمۇردۇ. قاباغا گئچيب،"آغا سيزين وظيفهز مريضلري سۆرعتله مريضخانايا چاتديرماقدير..نييه مينديرميرسيز؟"دئديم. آمبۇلانسچي بير آلتدان بير اۆستدن منه باخاراق لاغ ايله،" اۆرهگين يانير آل دالينا، آپار ..."دئدي. سونرا اؤفكه ايله آمبۇلانسين قاپيسيني چيرپيب قازلادي. آمبۇلانس گؤزدن ايتينجه اسدعميبه دؤنۆب، "عئيبي يوْخدۇر، ايندي ماشينيمي يانديريب سيزي مريضخانايا آپارارام" دئديم؛ كئشگه دئمهييديم! اينديجه آمبۇلانسچينين اينساني وظيفهدن بوْيۇن قاچيرديغينين ندني آنلاييرديم. اسدعمينين آياغي گئديردي. يئرده بير گؤلمج دؤزلميشدي. آتيلان اوْخون گئري دؤنمهديگي كيمي، اۇچۇرتدۇغوم سؤزۆ قايتارا بيلمزديم. ماشينين تركينه بير موشامبا ساليب اسدعميني مينديرديك. شاهداماري كسيلنلر كيمي، سۇيۇ گئديردي يازيق اسد عمينين!
بير آز گئتديكده، ماشينين شوشهسيني آشاغي ائنديره-ائنديره دئديم:
- مريضخانا اۇزاقدير ايستهسز بير ياخشي دوْكتوْرا آپاراق..
اسدعمينين خانيمي باش-گؤزۆنه تاپدايا-تاپدايا:
- اۇستاد هر نه ائلهييرسيز ائلهيين آنجاق تئز اوْلون ...- دئيه سيزيلدادي.
***
آز سونرا دوْكتوْر جئرينين مطبينده دايانميشديق. دوْكتوْر، اسدعمييه باخاندان سونرا ميزينين آرخاسيندا اگلشيب بير شئيلر جيزما-قارا ائده-ائده سوْرۇشدۇ:
- برزيل اتي يئييبسيز؟
اسدعمي زاريدي:
- يوْوْخ...
- هيند دۆيۆسۆ يئييبسيز؟
- يوْوْ...
- "سبد كالا" يۇرمۇرتاسي يئييبسيز؟
- يوْوْ..
- دؤولتي ميوه يئييبسيز؟
- يوْوْ...
- ...
دوْكتوْر جئري داريخدي. آنلاديم؛ اسد عمينين دۇرۇتماسيني بير شئين بوينونا آتماق ايستهيير، تاپا بيلمير.سوسقونلوق اوتاغي بۆرۆدۆ.سالوْندان تئلئويزيون سسي گليردي. بيردن دوْكتوْرۇن دوداغي قاچدي.نۆسخهني اسدعمينين اوْغلۇنا اۇزاداراق:
- بير شئي دئييل، "تحريم"لردندير. بو ايگنه-داواني ايشلتسهز بير-ايكي گۆنه توْختايار-دئدي.
***
ائوده اوْتۇرمۇشدۇم قاپي چاليندي. ائشيگه چيخديم. اسدعمي قوْلۇنۇ اوْغلۇنۇن بوْينۇنا سالاراق قاپي آغزيندا گؤزلهييردي. آروادي ايسه مۇشامبا قوْْلتۇغۇندا گئندن باخيردي.
- خئير اوْلا اسد عمي !- دئديم.
دوْداقلاري تيترهدي:
- اۇستاد! اۆزۆمۆز كسمهدي بير آييريسنا دئيَك.. زحمت اوْلماسا بيزي بير آيري دوْكتوْرا آپار....
- مَيه دوْكتوْر جئرينين داوالاري دۆشمهدي؟!
- يوخ!..ائله بيل سيزين بو دوْكتوْر مدركيني دانيشگاهي آزاددان آليب....
غئيرتيمه دگدي،
- استغفرالله! استغفرالله!.. دوْكتوْر جئري "هاوايي" دانيشگاهيندان فارغالتحصيل اوْلۇب- دئديم.
اسد عمي سۇيۇ سۆزه-سۆزه:
- بئلهديرسه، نييه تشخيصي غلط چيخيب.. ايندي نئچه گۆندۆر تلويزيون دئيير: تحريملر گؤتۆرۆلۆب؛ آمما منيم نه تكجه آياغيم كسيلمهييب بلكه شيددتلهنيب ده!- دئدي.
آچيقلاما:
آياغي كسيلمك: قطع شدن اسهال
آياغي گئتمك:آياغي آچيلماق/ اسهال شدن
اؤفكه: عصبانيت
بوْيۇن قاچيرماق: امنتاع كردن
زاريماق: ناله و زاري كردن
سوسقونلوق: سكوت
شاهدامار: شاهرگ
قالاباليق: ازدحام
قيم-قيم قيميلداماق: به شدت ازدحام كردن
گؤلمج: حوضچه، استخر
گئندن: از دور، از كنار
لاغ: طنز، تمسخر
مۇشامبا: مشنبع، نايلون
ندن: علت، سبب
