ميلياردئر اولماق ايستهييرسينيزمي؟
ميلياردئر اولماق ايستهييرسينيزمي؟
دوكتور جئري
اؤلكهميزده ميلياردئر اولماق باشقا اؤلكهلرده گؤره چوخ قوْلايدير؛ نه اؤزل بيليك-اردم ايستهيير نه اولاغاناۆستو بارجاريق- باشاري. دؤرد يؤنۆنۆزه ايتي باخسانيز گۆنده نئچه-نئچه ميليادئرين گؤبهلك كيمي اورتايا پيرتلاديغيني گؤرهجكسينيز. سيزده ميلياردئر اوْلماق ايستهييرسينيزسه، ال، ال اۆستۆنه قوْيماييب سۇندۇغۇمۇز يوْل گؤستريجي اؤيكۆلره اؤزن گؤسترمكله قيسا سۆره ايچينده وارليلارين سێراسينا قوْشۇلۇن.
ترقّي پيلّهلري
پوْليس بوْيلاندي. آلا-قارانليقدا، كۆچهنين ديبينده گؤزو ايكي قارالتيني سئچدي. الچيراغينين ايشغيني كۆچهيه جالادي. ايكي كيشي، بيري نردويواني ديوارا داياييب بيريسي ايسه يۇخاري چيخماقدا ايدي. اليني تاپانچاسينين اۆستۆنه قۇيۇب سسلندي:
هوْييي... اوْرادا نه قاييرسينيز؟!
آشاغيداكي كيشي سوْيۇققانليليقلا:
- هئچ!... اوْغلوم اگريبۇرۇق ايدارهسينده ايشه آلينيب بيلهسينه نئجه ترقّي پيلّهلريني چيخاجاغيني اؤيرهديرم...-دئيه يانيت وئردي.
چيخار
بير زنگين گنجدن سوْرۇشدۇلار:
- قيسا سۆره ايچينده نئجه ميليادئر اوْلدۇنوز؟
زنگين گنج:
- چيخاريم وار ايدي!...- دئيه يانيت وئردي.
- بير آز آچيقلايا بيلرسينيزمي؟
- ييرميمين پولوم وار ايدي. بير سبد آلما آلديم، آلمالاري ساتيب قازانجي ايله ايكي سبد آلما آلديم؛ ايكي سبدي، دؤرد سبد ائلهديم؛ دؤردو، سككيز... بير آي سونرا...
- بير آي سونرا ميليادئر اوْلدونوز مۇ ؟!
- هه!... بير آي سونرا آتام ايدارهلرينده ايختيلاس ائلهدي من زنگين اوْلدوم!
ال اۆستونده ال
آغا رئيس، آخشام آروادينا دانيشيردي:
- بوگۆن ايدارهده بير اوْغرۇ ايشچي ياخالاديق.. شرفسيز منيم جيبيمدن ده پول اوْغۇرلاميشدي...
آرواد قايغين-قايغين:
- نئچه اوْغۇرلاميشدي؟..- سوْرۇشدۇ.
رئيس اۆزۆنتو ايله فيسيلدادي:
- بيلميرم... مراجعه ائدنلرين بيريندن رۆشوت آلميشديم، هله سايماميشديم!
دؤولت پولونون بركتي وار!
قوْنشۇمۇز احمدآغا ساده بير دؤولت ايشچيسيدير، آيدا سككيز يوز مين آيليق آلير. تزهليكده، ايكييۆز ميليون وئريب بير ماشين آليب. شهرين يۇخاريسيندا بير ميلياردليق ائو آلديغي دا سؤيلهنير. دۆنن يوْل اۆسته مني گؤتۆردۆ. ديلينين آلتيندان سؤز چكمگه چاليشديم.
- احمد آغا بير شئي سوْرۇشسام آجيغينيز گلمزمي؟
- يوخ!
- عمّهنيز اؤلۆبمۆ ؟
- يوخ!
- پول تاپيبسينيزمي؟
- يوخ!
- يوخ يئردن بيلهنيزه پول يئتيشيبمي؟
- يوخ!
- بئله ايسه، سؤرۆشماسي عاييب اولماسين، سككيز يۆز مين آيليقلا نئجه بو ماشيني آليبسينيز؟!
احمد آغا گۆلۆمسهدي:
- دؤولتين وئرديگي آيليق آز اولسادا پۇلۇنون بركتي وار.. نه قدر خرجلهييريك قۇرتۇلماق بيلمير!...
سؤزلۆك
اؤزل : مخصوص
اؤزن: دقت، اعتنا
اؤيكۆ : حكايت
اؤيۆد: نصيحت
اردم: فضيلت
اولاغاناۆستو : فوق العاده
اۆزۆنتو: تاسف
بارجاريق: توانايي
بيليك: دانش
چيخار: لياقت، شايستگي
زنگين: دارا، متمول
سۆره: مدت
سۇنماق: تقديم كردن
سوْيوق قانليليق: خونسردي، بيتفاوتي
سێرا: صف
قازانج: سود
قايغين: نگران
قوْشۇلماق: پيوستن
قوْلاي : آسان
گنج: جوان
يؤن: جهت
يانيت: جواب
