يۇخۇ گؤرمگي باجارماق!
يۇخۇ گؤرمگي باجارماق!
دوكتور جئري
گئچنلرده آدييوخ ايدارهسينه چاغيريلميشديم. آدييوخ قارداش اۆز- گؤزۆنۆ تۇرشاداراق سْورۇشدۇ:
- گئنه آغا تئيمۇرون قهوهخاناسيندا نه مينبره چيخميشدين؟!
سوْرغۇنۇ آنلاماميشجاسينا دوْداقلاريمي بۆزۆشدۆردۆم:
- نه مينبري؟.. قهوهخانادا مينبر يوخدور!...
قارداش گؤزلريني برهلتدي:
- اؤزونو اوْ يوْلا وۇرما، قهوهخانادا، "بو ايل مدرسهلرده آناديلي اوْخوناجاق؛ كيتابلار چاپ آلتيندادير...." سؤزلريني سن دئمهييبسن؟
ياپماجيق گۆلۆشله:
- هههه.. ايندي ياديما گلدي.. قۇربان!.. ترسه عرضيزه چاتديريبلار... قهوهخانادا دوْستلارا دونن گئجه گؤردۆگوم يۇخۇنۇ تعريفلهييرديم...
قارداش چوخ سايغي ايله قولاغيمين يۇمۇشاغيني سيخاراق توْپارلادي:
- اوْلان سن يۇخۇ گؤرمكده باجارميرسان؟!..
باشيمي آشاغي سالديم:
- قۇربان سؤز وئريرم؛ بير داها بئله بير يۇخۇلار گؤرمهيم.
***
آند ايچيمشديم يوخو گؤرمهيم، گؤرمۆردۆم ده. سيراغا گون، موللانصرالدين اؤزۆ گيردي يۇخۇما. يالقيز- يالقيز شهرين كۆچهلريني دوْلاشيردي. بنيزي ساراليب چالماسي ايسه باشيندا دئييلدي. ياخينلاشيب، "سالام" وئرديم؛ تانيمادي. تانيشليق وئرديم. گۆلۆمسۆندۆ:
- نه وار نه يوخ؟...- دئدي.
- هئچ... ساغليغينيز- دئديم.
اؤزۆمۆ ساخلايا بيلمهديم:
- موْللا عمي عمّامهنيزي نئيلهميشسينيز آز قاليردي تانيمايام بيلهنيزي!..
دوْلۇخسانان كيمي اوْلدۇ. قوْلۇمدان ياپيشيب بير قيراغا چكدي. دردي دئشيلدي:
- نئچه ايل بۇندان قاباق بير توپلانتييا چاغيريلميشديم. آرادا بير مۆخبير قاباغا گليب سوْرۇشدۇ:
- موْللا! اؤلكهني بو آغير ايقتيصادي دۇرۇمدان نئجه چيخارتماق اولار؟
يالان دانيشا بيلمزديم، دئديم:
- بيلميرم!
مۆخبير قاباردي:
- سيزكي بيلميرسيز، نييه او يئكهليكده عمّامهني باشيزا قوْيۇبسوز؟
منده عمّامهني باشيمدان چيخارديب بيلهسينه اوزاداراق:
- بۇيۇرۇن عمّامهني باشيزا قوْيۇب سيز دئيين!- دئديم.
مۆخبير چاشقين-چاشقين منه باخاركن بيردن جاماعاتين آراسيندان محمود آغا آدلي بيريسي چيخيب عمّامهني اليمدن آليب باشينا قوْيۇب آرادان يوْخ اوْلدۇ. ايندي نئچه ايلدير باشي آچيق كۆچه-كۆچه محمود آغاني آختاريرام.
اورك-ديرك وئرمك اوچون موْللانين اليني سيخديم:
- بوْشۇنا محمود آغاني آختارما!...
موْللا عمي تديرگين اوْلدو:
- اوْلمايا عمّامهمه بير شئي اوْلوب؟
- يوووخ... بير شئي اوْلماييب يالنيز محمود آغا عمّامهمهني حسن آغايا وئريب بوندان بئله اوْنو آختارماليسان!
سؤزلۆك:
آنلاماميشجاسينا : تظاهر به نفهميدن كردن
اورَك-ديرَك وئرمك: قوت قلب دادن
اۆز گؤزۆنۆ تۇرشاتماق: ترش رويي كردن
بارجارماق: باشارماق/ بلد بودن
برهلتمك: چشم غرّه رفتن، چشمها را گشاد كردن
بنيز: صورت، رخسار
بوشونا: بيهوده
تديرگين: ناراحت، مضطرب
ترسه : برعكس
توْپارلاماق: تشر زدن
توپلانتي: جمع، مجلس
چاشقين : گيج، مبهوت
چاغيريلماق: دعوت شدن، فرا خوانده شدن
چالما: عمّامه
دئشيلمك: دهن باز كردن
دوْلاشماق: گردش كردن
دوْلوخسانماق: متاثر شدن
دۇرۇم: وضعيت
سايغي : احترام
سوْرغۇ : سوال
سێراغا گۆن : پريروز
قابارماق: درشتي كردن
مينبر : مِنبر
مۆخبير: خبرنگار
ياپماجيق: تصنعي، مصنوعي
يانيت: جواب
