افساريخ
افساريخ
یازان : دوکتور جئری
۱. ائپيزود
بير گون وار ايدي بير گون يوخ ايدي. بيرشاه وار ايدي. آدي كورش ايدي. كورش بيلميردي آريايي دير چونكو آريا سؤزو هله دوزلمه ميشدي. بير گون يهودي لردن بير نئچه سي كوروشون يانينا گليب، " بخت النصر بيزي اؤلدورور، دريميزه سامان تپير، گل بيزي قورتار" دئيه اونا يالوارديلار. كورش سانكي ياتميش ايدي اوياندي. نئچه واخت ايدي اؤلكه ده سامان قيتليغي باش وئريب قوشونون آت – ائششگي آجيندان قيريليردي. كورش اؤفكه ايله يئريندن قالخيب بابيله سالديري بويروغو وئردي.بابيل ايشغال اولونوب يهودي لر آزاد ، سامانلار ايسه موصاديره اولوندو.
۲. ائپيزود
بير گون وار ايدي بير گون يوخ ايدي. بير فرانسالي يازيچي وار ايدي. آدي گوبينو ايدي. گوبينو دربار آداملاري ايله گل – گئدي وار ايدي. او بولوشمالاريندا آنلادي دربار آداملاري نين باش- بدن لري قارا ميللته گؤره چوخ يئكه و آغ دير.
گوبينو بير گون تووالئتده اوتوروب دوشونوردو:
-" دربار آداملاري نين جينسي باشقا بير جينسدن اولمالي دير! بو قدر آغ ! بو قدر كؤك! بو قدر يوموشاق!...
يوخ .. يوخ.. اولا بيلمز... سيسقا ، آريق ، گودوك قارا ميللت له بونلارين جينسي بير اولا بيلمز . بونلار موطلق باشقا بير جينسدن اولمالي ديرلار .."
سونرا بيردن بيره ، بير شئي بولموش كيمي تومانيني چكمه دن تووالئتدن ديشارييا فيرلانيب باغيردي: " تاپديم! ... تاپديم!.... دربار آداملاري آريا جينسيندن دير لر...".
۳. ائپيزود
بيرگون وار ايدي بير گون يوخ ايدي. بير بالا بوي هيتلئر وار ايدي بيرده چمبرلن . گوبينونون آريا سؤزونون ايگي چمبرلنين بورنونا دگيميشدي. چمبرلن ، هيتلئري قانديردي آريا جينسيندن دير.هئيتلرين قوشونونون آت – ائششگي ، سامانلا يوخ ياغ ايله ايشله ييردي. هيتلئر ،يهودي لري اؤلدوروب ياغلاريني چيخارتدي.
۴. ائپيزود
بير گون وار ايدي بير گون يوخ ايدي. بيريئكه پر كيشي وار ايدي. اؤزو خان اولماسادا آدي رضاخان ايدي. رضاخان قوشوندا ، آت – ائششگه سامان وئره ردي.
اينگيليس لر تخت جمشيد خارابالاري قازينتيسي سيراسيندا بير جوت چكمه تاپميشديلار. دئييلنلره گؤره چكمه لر،كوروشون چكمه لري ايميش. اينگيليس لر چكمه لر كيمين آياغينا گلسه مماليك محروسه نين شاهي اولاجاق دئيه قرار وئردي لر. اردشير جي ريپورتر آدلي بير كرتنكَله چكمه لري گؤتورب اؤلكه ني گزمه يه باشلادي. چكمه لر آياقلارا گئن گليردي. اردشير يورولموشدو . او بير گون آتيني اصطبل ده باغلاياندا گؤزو رضاخانا ايليشير. چكمه لر سانكي رضاخانين آياغينا تيكيلميشدي. رضاخان اولور رضاشاه.
گونلرين بير گونونده هيتلئردن رضاشاها بير اس ام اس گلدي :
-" سن آريايي ، من آريايي ، گل آلاليم دونياني".
بو سؤز رضاشاهين طبعينه بتر ياتدي. اينگليسه تپيك آتيب آتلاندي هيتلئرين قوجاغينا. آنجاق ايكيسيده ييخيلديلار يئره (رضا شاهين يئكه پر و هيتلئرين بالا بوي اولدوغونو داها اؤنجه سؤيلميشديك).اينگيليس حيرصله نيب چكمه لري رضا شاهين آياغيندان چيخارديب گؤتونون اوستوندن بير تپيك ووراراق ايراندان ائشيگه آتدي. بيرسوره سونرا حيرصي سويويان اينگيليس چكمه لري رضاشاهين اوغلو محمدرضايا وئردي . چكمه لر محمدرضانين آياغينا گئن گلدي آنجاق اينگليس سسيني چيخارتمادي. آريابازيليق هيتلئرين اؤلومو ايله دونيادا مودادان دوشموشدو. آنجاق محمد رضا چكمه لري گئييب گئيه لي لاببا- لابلا يئنه آريابازيليق اويونونا باشلادي . او ميللت لردن آسيب كسمكله آريا خالقي دوزلديردي.
ايللر اؤتدو . بير گون جانا دويموش خالق محمدرضاني اؤلدورمك اوچون دربارينا تؤكولدولر آنجاق يئر ياش ، اوشاق يوخ ايدي. محمدرضانين تختينده تكجه چكمه لر قالميشدي . محمدرضا آياق يالين قاچميشدي.
۵.ائپيزود
بير گون وار ايدي بير گون يوخ ايدي. بير جوت چكمه وار ايدي . چكمه لر يامان قوخويوردو. آياق ايگي وئريردي ، سامان ايگي وئريردي ،ياغ ايگي وئريردي ، آريا ايگي وئريردي.
چكمه لري زيبل قابينا آتديلار، ايگ كسيلمه دي. چيخارديب موزه يه قويدولار ، ايگ كسيلمه دي. بير گون چكمه لر ، زيبيل قابي – موزه آراسيندا اولان يولجولوقدا يوخ اولدو. آنجاق ايگي كسيلمه دي . آياق ايگي ،سامان ايگي ، ياغ ايگي ، آريا ايگي....
