قوردباشي ايقتيصاديات
قوردباشي ايقتيصاديات
جيزما- قاراچي : دوكتور جئري
سوسيولوقلار دونيادا كومونيزم ، سوسياليزيم ، كاپيتاليزيم آدلي اوچ چئشيد ايقتيصادياتين اولدوغونو سؤيله ييرلر. اونلار، توپلومدا ياشايان اينسانلاري الين بارماقلارينا اوخشاتاراق، كمونيزمي بؤيوك بارماقلاري كسيب كيچيك بارماق دوزه يينه چاتديرماق، سوسياليزمي ، كيچيك بارماقلاري چكيب بؤيوك بارماقجا اوزاتماق ، كاپيتاليزمي ايسه بارماقلاري اؤز حاللارينا بورخماق كيمي بَتيم له يه رك۱ آچيقلاييرلار.آنجاق بوگونلر ايران اؤلكه سينده قورد باشي آدي وئريلن دؤرودونجو چئيشد ايقتيصاديات اورتايا چيخماقدادير.
قورد باشي ايقتيصاديات نه دئمكدير؟
توپلومدا عدالتي ساغلاماق آدي ايله سوبسيد لري نقدي اولاراق دولايسيز۲ بيچيمده خالقا اؤده ييب دولايلي۳ يوللارلا گئري آلماقدير.
قورد باشي سؤزونون قايناغي:
شهرين حاكيمي موللانصرالدينين آغيل – اوسونو يوخلاماق اوچون اونا بير قويون وئريب بيله سيندن ايسته يير حئيواني بير آي سونرا وئرديگي آغيرليقدا گئري قايتارسين. موللا قويونا چوخ يئديرتينجه آغيرلاشديغيني ، يئديرتمه يينجه ايسه يونگوللشديگيني گؤرونجه دوشونجه يه دالير. سونوندا گئديب بير قورد باشي تاپير. او قويونو دويونجا يئديرديكدن سونرا قورد باشيني گؤستره رك حئيوانين يئديگيني بورنوندان گتيريب كؤكلمه سينه انگل اولوردو.بئله ليكله او قويونو آلديغي آغيرليقدا حاكيمه گئري قايتارير.
ايللر سونرا موللانصرالدينين بو يؤنتمي ايقتصاديات بيليمينه كئچره ك قورد باشي ايقتيصادياتيني اورتايا چيخارتدي. ايندي ايران دئييلن اؤلكه ده خالق آي باشي بانكالاردان سوبسيد پوللاريني آليب زنگينلر كيمي شيشمك ايسته يينجه گاز، برق ، سو و ... فيشلري چيخيب يئللريني فيس ياتيردير.
۱- تصوير ائده رك
۲- مستقيم
۳- غير مستقيم
