دؤولت خانيمين ايگنه سی
جيزما-قاراچی : دوكتور جئری
بالانصرالدين بير قوتو خورما ايله مئيمون اوينادان يولداشي گيله قوناق گئدير. يولداشي نين مئيمونو خورمالاردان بيريني گؤتوروب قويروغونون آلتينا آپارديقدان سونرا آغيزينا قويور. بالانصرالدين مئيمونون بو حركتيندن برك اوزولور . يولداشي گولومسه يرك :
-" مئيمونون بو داورانيشيندان اينجيمه يه سن يولداش! كئچنلرده دوستلارين بيري باغيندان شفتالي پاي گتيرميشدي. بو ياراماز شفتاليني دنه سي ايله بيرگه يئديگيندن چگيردك گؤتونده قاليب عمليات ايله چيخارتمالي اولدوق. او گوندن بري یئمه لی يئينده اؤنجه گؤتوندن چيخاجاغينا امين اولور" دئيير.
گولمه ييمي ساخلايا بيلميرديم . پروفسور نصرالدين (دانيشگاهلار آزاد اولالي بيزيم بو موللا نصرالدينده ائششگي نين آرپاسيندان ووراراق گئديب آزاد دانيشگاهدان پروفسورلوق عونواني آليبدير) قهقهه مي كسيب دئدي:
ـ" گول دوكتور گول ! نييه گولمورسن. ائل بيل ايستي هله سنين جانينا گئچمه ييب .آتالاريميز دوز دئميشلر: اولونون سؤزونه باخمايان اولايا - اولايا قالار. كئچنلرده سيزه دئمه ديمي دؤولت خانيمين ايگنه سيني يئين چووالديز سيچار ؟ سيزه دئمه ديمي يارانه دئييلن بئش- اون قيرانا آلدانيب آغريماز باشينيزا دسمال باغلامايين ؟! هله كي بير شئي اولماييب . تكجه بير ايكي گاز - برق فيشي گليب. نه تئز زيرتا - زيرتا دوشموشسوز... یارانه نی ایچرییه اؤتورمه دن اؤنجه بير ....".
-" پروفسور ! واللاه من زيرتا- زيرتا دوشمه ميشم. دؤولت خانيمدان دا چوخ راضييام. وئرديگي يارانه لر بانكدا جاغ به جاغ مؤوجودور . قيرانينا بئله ال دَيمه ميشم. سو ، برق و گاز سايقاجي نين نومره لري ده اؤز يئرينده دايانيب ايشله مير ." دئيه پروفسور نصرالدينين سؤزونو قاريمچيليق قويدوم .
پروفسور نصرالدين گئچي ساققاليني تومارلاييب قوشقولو- قوشقولو :
ـ " اولمايا سايقاجلاري قوردالاييب دوردورموسان؟" دئيه ميزيلدادي.
-" يوخ ، سن اؤله سن!"
-" آخي بس بو نئجه اولا بيلر؟"
گؤزومو يئره تيكه رك دئديم :
ـ" دوزونو ايسته پروفسور ! آيدا - قيرخ گونده بير حاماما گئديرم . اونودا چوخراق قوهوم قونشو ائوينه ساليرام . آرا- سيرا ياغيش ياغاندا ايسه يويونماغيم ايكي - اوچ آيا بئله ائرته له نه بيلير. بو سو فيشيندن. قالدي گاز فيشي. تانري سندن راضي اولسون . وئرديگين پئرشيانين تس لريني يانديراراق گاز نئعمتيندن ده جانيمي قورتارميشام. (مولانصرالدين پروفسورلوق عونوانيني آلاندان بري ائششگينه پئرشيا دئيير). برقه گلينجه ، من ائله لاپ اسكي لردن قاش قارالاندا ياتارام؛ قاش آغرينجا ايسه اويانارام بو اوزدن برق -مرقه موفته پول وئرمه رم..".
پروفسور نصرالدين بير ايكي آدديم گئري چكيليب بورنونو چكه رك :
-" بو قدر اؤزونه كورلوق وئريب يارانه لري ييغماقدان آماجين ندير؟ " سوروشدو.
ايكي آدديم ايره لي له ييب بورنومو پروفسورون بورنونا داياياییب:
ـ " پروفسور ! تصميم توتموشام بير ايلليك يارانه لريمي ييغديقدان سونرا گئديب قونشو اؤلكه لرين بيرينده بير هفته آدام كيمي ياشايام " دئديم.
