چارلز بوکووسکی
جیزما-قاراچی : دوکتور جئری
گیریش :
بو گونلر بلوقلاردا ساغا گئديرسن سولا گئديرسن چارلز بوكووسكي ايله كلله – كلله يه گليرسن. بيزده، سوننت ايله سوننته مئيدان اوخويان آنتي ادبيات چي لاردان گئري قالماماق اوچون بو زيرپي جيزما قاراچي نين باشدان گئچني ايله بير شئعيريني سونوروق سيزلره . بَيَنميش اولمانيزي اومورام.
چارلز بوكووسكي
هئنري چارلز بوكووسكي 1920 ده آلمانيانين اَنديراخ شهرينده كوله دوشموش. ايكي ياشيندا ايكن آتا- آناسي دئييلن آداملارلا آمريكايا كؤچَرَك لوس آنجئلئسه يئرلشميش. آتاسي ساييلان آدام ، 1929 كيريزي ندني ايله ايش سيز قالديغيندان سوركلي چارلزي دؤيرميش.ائتكي له يرميش . بوكووسكي 1939-1941 ايللري لوس آنجلسين بيليم يوردوندا اوخودوقدان سونرا نيويوركا كؤچوب جيزما- قارايا باشلاميش.ايلك جيزما- قارالاري نين ياييملانماسيندا دوش قيريقليغينا اوغرايينجا جيزما- قارالامادان كوسوب ايچكي ایله یولداش اولموش . یولداش آیاغیندا چاخير كوپونه دوشموش. چارلز اون ايل چاخير كوپونده قالاراق معده سي نين ايچينه گؤزلجه سينه سيچميش .ايچي قاناميش. خسته خاندا ياتميش. اؤلمه ميش. اؤلومون اوجوندن قاييتميش . بوقانلي سيچيش چارلزي يئنه جيزما- قارا دونياسينا گئري قايتارميش. جيزما-قارالاماغا پاراسال دستك گره ك ميش، بو اوزدن چارلز اولمايان قالمايان ايشلره ال آتميش. قاب يوموش ، يوك داشيمش، ماشين قوروموش ، جان گودموش، آش پيشيرميش، تاكسي سورموش، توالئت يوموش و نم نره لرده ايشله ميش، اوزون سؤزون قيساسي چوخ – چوخ پوخ قاريشديرميش. 1957 ده باربارا فراي ايله ائولنميش آنجاق 1959دا بوشانميش.چارلز پوستخانادا ايشله مك اوچون لوس آنجئلئسه دؤنموش. چارلز يئنه ايچميش . ايچميشده شئعير يازماغي سوردورموش.1965 ده ائولنمه ديگي فرانسيس ايسيمت له بير قيزاوشاغي ياپميش.1969دا بلاك اسپارو يايين ائويندن عؤمورلوك 100 دولار معاش تكليفي آلينجا پوستاخاناني بوراخميش. بوكووسكي مكتوبلاري نين بيرينده " ايكي سئچه نكدن بيريني سئچملي ايديم. پوستاخانادان قاليب دليرمك يا جيزما- قارايا اويوب آجيندان اؤلمك . من آج قالماغي سئچديم" يازميش. او پوستاخانادان بير آي اولالي آيريلالي "پوستاخانا " آدلي ايلك رومانيني بيتيرميش.1976 دا بوكووسكي ليندا لي ايله تانيشميش.ايكي ايله سونرا اونونلا لوس آنجئلسين ليمان شهري سان پئدرويا داشينميش. 1985 ده ليندا لي ايله ائولنميش.چارلز بوكووسكي 9 مارت 1994 ده 73 ياشيندا اؤلموش. گَبريش تؤره ني بوديست راهيبلر طرفيندن يؤنَتيلميش.
چارلز بوكووسكي جيزما- قارالاري :
1. قادينلار
2. ايستي سو موسيقيسي
3. بيرتك منم مي بئله ياشايان
4. پوستاخانا
5. پيس موروغون نوتلاري
6. قاپالي بير قاپي دير جهننم
7. گولون كؤلگه سينده
8. سئويملي بير عشق حئكايه سي
9. سيرادان دلي ليك اؤيكولري
10. سرخوش چال پيانونو،وورمالي چالقي كيمي،بارماقلار بير آز قانامايا باشلايانا دك
11. پانسيون منظومه لري
12. اؤلولر بئله سئور
13. شئكسپير بونو اصلن ياپمازدي
14. گونشه اوزان
15. ان قيسا آن دير مؤجوزه
16. گونش ايشده بوردايام
17. كيمسه بيلمز نه چكديگيمي
18. كاپتان يئمه يه چيخدي ، طايفالار گميني اله گئچيردي
19. پولوپ
20. فاكتوتوم
چارلز بوکووسکی دن بیر شئعیر
آنتی چئویرمن : دوکتور جئری
دئمك جيزار اولماق ايسته ييرسن ؟
او،هر نه يه قارشين
ايچيندن وولقان كيمي فيشقيريب داشميرسا
جيزما چئز.
چاغيريلمادان گلمزسه اورگيندن
بئينيندن، آغزيندان ، جانيندان،
جيزما چئز.
سؤز آختاراراق،
ساعاتلارلا جا
زيلله ملي سنسه گؤزونو بيلگي سايارين گؤسترگجينه
بوکولمه لی سنسه جيزما-قارا ماكيناسي نين اؤزه رينه
جيزما چئز.
پول-پارا
آد- سان اوچون جيزيرسانسا
جيزما چئز.
ياتاغيندا قادينلار ايسته ديگيندن جيزمالاييرسانسا،
جيزما چئز.
جيزما-قارا چتين ايشدير گئچيرسه قافاندان
جيزما چئز.
دونباليب
جيزيب قارالاييرسانسا
قارالاييب يئيندن جيزيرسانسا
جيزما چئز.
باشقا بيريسي کيمي جيزماغا چاليشيرسانسا،
چئز بونو ياديندان.
اونون ايچيندن
گورولتويلا چيخماسيني گؤزله ملي سنسه،
چئزه - دؤزه گؤزله.
او، هئچ واخت گورولتويلا چيخمازسا،
ياپيش باشقا ايشه.
اونو ايلک اؤنجه ائشينه،
يا قيزيولداشينا، اوغلان يولداشينا،
يادا آنانا ، آتانا ، ياخود باشقاسينا جير-جيرلانمالي سانسا ،
سن داشماميسان .
چوخسايلي جيزارلاردان اولما،
اؤزونو جيزار آدلانديران
مينلرجه چئزرلردن اولما،
چكيمسيز، بيخديريجي ، باشي بوش اولما،
بورنون يئلي سني يئللنديرمه سين.
دونيا کيتابخانالاري
سنين کيميلرين اوزنوندن
اسنك - اسنك مورگوله يير.
بونلارين ساييني آرتيرما.
جيزما چئز.
او، روحوندان راکئت کيمي
توللانماسا ائشيگه،
سوسو وئرمك
زورلامازسا سني چيلقينليغا
يا اؤزونو اؤلدورمگه ، يا قتله
جيزما چئز.
گئرچك زاماني گلديكده
سئچيلميشسنسه ،
او، بونو اؤزو ائده جک.
و او، بونو سن و يا
او، سنين ايچينده اؤلنه کيمي
ائتمکده داوام ائده جک.
بونون باشقا يولو يوخ.
اولماييب اولماياجاقدا.
